Cak ka ki pe ici masinahiketc 1 - Kice Manito Ocki Omirwatcimowin

Cak e arimikaketc

¹ Nin Cak ka masinahamatakok, Kice Manito e atoskectawak acitc Cecoc Krist Teperitciketc. Kit arimikatinawaw kirawaw Kice Manito otirinima, kaskina e taciekw, kaskina wiec ota askik wikockatc e ki oraticohokoiekw.

Tapwetamowin kirika miro mitoneritcikan

² Niwitcicanak, ekoci mireritamokw nakickamekwe arimeritamowin papitoc ke aicinakok.

³ Ki kiskeritenawaw meka, kecpin kiapatc e asperimototawekw Kice Manito mekwata e arimihikoiekw, kirawe ki ka otci sokikapowinawaw.

⁴ Aric nanakatcihitisokw mocak kaketin kitci sokikapowiekw, mia kitci ki itatisiekw, aka kitci takok ka maratak kipimatisiwiniwak, acitc aka kitci notepariekw miro kekocic.

⁵ Kecpin aric peikw neta e taciekw aka kiskeritake ke totak, miro mitoneritcikaniw kata nataweritamawew Kice Manitowa kitci kiskeritak. Kata tca miriko. Mictahi meka caweritcikew Kice Manito e micta mirotehetc, kaskina awiriw e wi miratc aniheriw ka ici nataweritamakotc.

⁶ Patoc otcitakotc kata tapwetam kitci natotakotc. Nama kata anwetam. Anahwe meka ka anwetak, mia mitowi e mitcahak kitcikamik e rotik, kaskina wiec e aitackak, ekoni e iteritakositc.

⁷ Anahwe towi iriniw nama acteriw kitci iteritak kitci mirikotc kekociciriw Kice Manitowa.

⁸ Kwetowi iteritam meka, aka kaie e kiskeritak mia ke tapwetak.

Ka kitimakisitcik acitc ka micikitatcik

⁹ Kata micta mireritam kiwitcicanino ka kitimakisitc, e kicterimikotc Kice Manitowa.

¹⁰ Peikon kotak kiwitcicanino ka micikitatc kata micta mireritam e kiskinohamakotc Kice Manitowa aka kitci wi kicterimikositc. Tapwe wirata, micta memacic tepirak kata micikitaw, mia mitowi wapikoni notcimik ka nitawikik wipatc e nipomakak, aka kinowec e pimatisimakak.

¹¹ E pe wapak e micta kicasiketc pisimw, pactew wapikoni. Ekoni e pakitik, aci e ickwa mirwacik. Ekoni kaie wir ke iciwepasitc ka micikitatc. Kata nipo mekwata e taci manatcitatc ocoriam.

Ke totamokw nakickamokwe arimisiwin

¹² Caweritakosiw anahwe ka sokikapowitc mekwata e nakickak arimisiwiniw. Ickwa meka wapatahiwete e sokikapowitc, kata pe otitiko aniheriw ka ki kackitamatisotc. Kakike pimatisiwiniw kata cawerimakaniwiw, kotc ka ki itetc Kice Manito kitci ici miratc anihi ka sakihikotc.

¹³ Kecpin awik kokwetcihakaniwite kitci matci totak, ekwa kitci iteritak: “Kice Manito ka kokwetcihitc.” Nama meka awiriw kokwetcihew Kice Manito kitci matci totamiritci, nama kaie kata ki kokwetcihakaniwiw.

¹⁴ Tapwe wirata, tato iriniw ota askik kata ki kokwetcihakaniwiw kecpin e pakiterimitisotc kitci cakotcihikotc aniheriw ka ici pasoweritak ka maratanik otehik.

¹⁵ Minawatc kecpin e nosanetatc aniheriw e ici takonik otehik, aci nta pactatiw. Mina tca mocak pactatite, matci kata ki otci nipo otcitcakocik itekera.

¹⁶ Niwitcicanak e sakihitakok, ekwa kitci onipitikoekw ohwe:

¹⁷ kaskina ka mirwacik ka ki cawerimikoikw acitc tato caweritcikan ka kicteritakok, wakwek pe otciparin. Kotawinak Kice Manitok otciparin, anahwe ka ki ocihatc anahweriw icpimik ka wasisoritci: kicikaw pisimwa, tipiskaw pisimwa acitc atcikoca. Mocak peikon iteritakosiw Kice Manito. Nama kaie atcitaw omitoneritcikan, nama mitowi kicikaw pisimw ka atcickatc, aka e nokositc e tipiskarik.

¹⁸ Wir tipirawe Kice Manito ki nataweritam kitci miritokw pimatisiwiniw, Otitewin ka tapwemakanik e ki apatcitatc. Wetci ki totak, kirano ni nictam kitci nikanickowimokw kaskina e taciritci ka ki kicerimatc, kaskina kaie e tatinik ka ki kiceritak.

Kitci natotcikaterik Kice Manito otitewin acitc kitci sapitcikaterik

¹⁹ Ohwe mamitoneritamokw, niwitcicanak e sakihitakok: tato neta e taciekw acteriw kitci miro natotak, aka tca tecikotc kitci arimwetc, aka kaie kitci otake kiciwasitc.

²⁰ Mekwata meka e kiciwasitc awik, nama itotiskew e ici nataweritamiritci Kice Manitowa.

²¹ Ekoni wetci ititakok kitci wepinamekw kaskina ke ki ometcickakoekw kitcitcakociwak itekera, kaskina matci totamowin, kaskina ka maratak kipimatisiwiniwak. Natotamwokw Kice Manito otitewin ka ki actatc kitehiwak, tekaci e tipaterimitisoekw. Enkweriw meka ke ki akwacimikoekw.

²² Ekwa kitci onipititisoekw. Nama tepirak ki ka natotamwanawaw Kice Manito otitewin, patoc tapwe ki ka itotiskewanawaw e ici nataweritcikaterik neta.

²³ Anahwe meka tepirak ka natotak aniheriw itewiniw, aka aric e itotisketc e ici nataweritcikaterik neta, tarasak mia awik ka wapamotc iteritakosiw, ka wapamitisotc tan e icinakositc.

²⁴ Aric e ickwa wapamitisotc, ekoni e ici matcatc, tecikotc e oniketc tan e icinakositc.

²⁵ Aric anahwe mocak wewerita ka kanawapatak Kice Manitowa otirakonikewiniw, ka itotisketc ko tan e itemakanik, nama mireritam tepirak kitci natotak, tecikotc kitci oniketc, patoc kirika kata itotiskew ko e ici nataweritcikaterik. Mia meka itemakaniw aniheriw irakonikewiniw, e micta mackawisimakanik kitci ki otci wikotcihikoikw pactatowinik. Kata caweritakosiw anahwe iriniw, kaskina ke aitotisketc.

²⁶ Kecpin awik e iteritak: “nit aiamihawatisin,” aka aric e kackitatc kitci nanakatcihitisotc aka arotc kitci ici arimwetc, wiecimitiso. Nama wiec irapataniw otaiamihewin.

²⁷ Enkweriw aric tapwe aiamihewiniw ka ici mirwinak Kice Manito: kitci nakatawerimokok awacak aka ka taritci onikihikowawa acitc cikawok e nakickakik arimisiwiniw, kirika kitci nanakatcihitisoikw aka kitci onipitikoikw ka maratak ota askik.