Tioni 8 - Ata New Testament

Sema vile ane mi'oxonu susu la mine'ene noxou Iesua

¹ Ioxe, ia noxou Iesua la mulai no la'olu Olivi.

² Xe no voxo loxo ne'iela no kakau manina la mulivu mu'una no tasou Mosingela. La tamitema minene'e noxou laso anu mutalupexa kaio musoko'u so uvotone'i.

³ La ane'i tamitema so lavulavu no anu lavuloto oli'a Tapalisi mine'ene sema vile. Sema ne milai noxou mulu vile mo mixola'u taula'i la tamitema mixalisiexu. Mine'ene ka mitulusie no ie'i latala ne.

⁴ Mukalu la mivikalanu Iesua lexe, “Ai Tisao, sema ano'o milai noxou mulu vile mo mixola'u taula'i la mixalisiexu.

⁵ Io' no anu lo e Mosisi mupilixinu noxixe la upalusixe lexe taleaxe sema aloxo 'o no anu lavo'o umomomo no anu soli. Ia nini la navikala axova?”

⁶ Ane'i milemolu vaikala axone so loxo iuauoixu no anu xo ikakamulinu tavatava'u so ikotixu. Ia Iesua mutangatulu ka mukaukavu no lia no avolusi.

⁷ Ia ane'i miuolotete so itatali'i noxou xo laso anu mutulu sila muvikala lexe, “Ena'ei no tai­ngengi susu vile noxou uasi la anu u'uli laxungengi so uno'u lavo'o ka uleaxe tei.”

⁸ Mukalu la anu mutangatulu mo mukaukavu no liala.

⁹ Xe ane'i tatiatila milo­musou vaikalaou ne la mipa­xele vilevilesi. Ane'i ane tau iexa'a mutiatila la mi'uli xe leviani la milailai ili'i no tumali'a. Milailai mole Iesua olie semasi a mixolu no ie'i tamitema latala ne.

¹⁰ Ioxe, Iesua mutulu laso mutali'isie lexe, “Semao, ane'i to 'o a milailai ne'ei? Vile uxolu so ulemolu mamulosine la uasi?”

¹¹ La mikolinu lexe, “Tila, evile uxolula uasi.” Xe Iesua muvi­kalane lexe, “Eni kalumo alemolu mamulosine uasi. Laso nalai, ia nasusula uasi.”

Iesua anu lamana so lialia

¹² La Iesua muvikalane'i tamotu ne aloxo 'ola, “Eni 'o lamana so lialia a. Ena'ei ane umulileli la mua­mua'ixu no anu isivoxo la uasi, anu lamana so mauli uxolu noxousi.”

¹³ Ia Tapalisi milomu­sou la milivuxu lexe, “Nini mene a nalalanu vaikala so navalaxene tomo. Ninisi napala'anixene axone la masi nakakalavoi ane.”

¹⁴ La Iesua mukoline'i lexe, “Ani manina, eni melo apala'anixilo ia vaikala alalanu so avalaxo ne a maninasi. Xo eni elavu lexe melo ne'ei ene'e 'o xe elavu lexe u'uli se 'osi la alai ne'ei. Ia ngingi la ngalavu lexe melo ne'ei uasi o so alai ne'ei uasi.

¹⁵ Ngingi la ngalavusou ngamulinu ilixo so lialia mo ngatilovosi'a tamitema so ngakamulinu susu noxi'a. Io eni la atilovosou evile so akamulinu susu noxou uasisi.

¹⁶ Ia loxo atilovosou ilixo noxi'a tamitema la tilovo noxilo ne anu maninasi. Xo loxo atilovo la enisisi no anu uasi, nexi noxou Mamilo ane mupalusilo ene'e a oponexi vilesisi no anu.

¹⁷ No anu lo na'a ngingi to nesi kalumo la vaikala mukaukavu lexe loxo tamitema tamei ilanu vaikala vilesisi la tano'u lexe maninasi.

¹⁸ Ioxe noxilo, la eni alanu vaikala so melo apala'anixilo xe Mamilo e mupalusilo ene'e 'o la anu kalumo ulanu vaikala so uvalaxo.”

¹⁹ Laso Tapalisi mitali'i noxou lexe, “Mamine nelemolu ne, anu a uxolu ne'eio?” La Iesua mukoline'i lexe, “Ngingi ngalavusilo uasi mo ngalavusou Mamilo uasi. Loxo ngelavusilo la ngingi ngalavusou Mamilo kalumo ane.”

²⁰ Vaikala anene mulemolu loxo mutulu muvotovoto no tasou Mosinge no anu ngiou e kesikesi muta'olu so tamitema ipipilixinu iauvaxe no anu. La evile umomomo so ukasi noxou uasi xo voxosou uxali u'isalili uao.

Iesua muvikalane'i lexe imomomo uasi so ilai no apu e ulai no anu

²¹ La Iesua muvikalane'i tamotu ne aloxo 'ola, “U'uli se 'osi xe alai la ngakamulileli io ngaxalisilo uasisi. Ngingi ngaxoxolu no anu susu noxinge nesi xo mole uxali avile no anu soli noxinge ne. Apu e so alai no anu la vote'i so ngaxali ne uasisi.”

²² Ane'i Taiuta milomu axone la mivikalane'i ngato'o lexe, “Ai, vaikala ane mulemolu lexe apu e so ulai no anu la vote'i so taxali no anu uasisi, la laxu axovaio? Masi molu uvau usoli. Ia uasi, ne?”

²³ La Iesua muvikalane'i aloxo 'o, “Ngingi so no lia xo ngingi so lialia 'o. Ia eni 'o so teiteximo xo eni so lialia 'o uasi.

²⁴ Laso maixene evikalangengi lexe ngingi ngaxo­xolu no anu susu noxinge nesi xo mole uxali avile no anu soli noxinge ne. Xo loxo ngalopala uasi lexe eni Melo Axoxolumo la ngingi ngaxoxolu no anu susu noxinge kaio ngasolisi.”

²⁵ La ane'i mitali'isou lexe, “Xo nini ena'eio?” La anu mulivuxa'a lexe, “A loxo apelapela'ingexu no soko'u manina mo mune'e 'oe.

²⁶ Eni vaikala piena umomomo so alemolu mo eni a atotongonu ilixo noxinge 'o. Ia anu ane mupalusilo ene'e 'o anu xoluxoluxu no anu maninasi mo mi ma'ia alomusou noxousi la apilixinu noxi'a tatemanu lialia.”

²⁷ Anu upalasi noxi'a lexe anu uvikalasou Mosinge anu Maminge uasi.

²⁸ Laso Iesua muvikalane'i lexe, “Ili'i loxo nga'itinu teitexi Itema ane molu noxou Mosinge la upalasi noxinge lexe eni Melo Axoxolumo. Mo ngalavu lexe eni a'oxonu mi vile no anu masaxa na'a xelimo uasi, ia mimi alemolu 'o Maminge molu mupela'iloxusi.

²⁹ Xe anu ane mupalusilo ene'e 'o ne a uxoxolu noxilo. Anu uxexesilo so enisisi axolu uasi xo utotomu eni a'oxonu mi ane u'osasousi.”

³⁰ La tavu'alo noxi'a ane'i ane milomusou vaikalaou ne la milopala noxou.

Vaikala anu temanu maninasi uxalixu xoluxolu lalavulusi

³¹ Ioxe, Iesua muvikalane'i Taiuta ane milopala noxou ne lexe, “Loxo ngaxoxolu avile no anu vaikalaxeli la ngingi ngaxolu tatisaipelixeli manina ane.

³² La vaikala anu temanu manina upalasi noxinge. Upalasi noxinge laso ngaxalisou xoluxolu no anu lalavulusi.”

³³ Ia ane'i Taiuta mivikalanu lexe, “Nexi ta'ilusunu Apala'amu a. Musoko'u tatei mune'e 'o la vile no anu laili noxixe 'o muxolu usilevi noxou itema vile to uasi. Laso axova so nevikala lexe nexi taxali lalavulusi 'o?”

³⁴ La anu muko­line'i lexe, “Eni avikala manina e maninasi, tamitema mukalusi ane i'oxonu susu la ane'i tasileviou sususi ane.

³⁵ Ane'i tasilevi ixolu avile no anu tani uasi, ia mosou tani olusi a uxolu ne avile kaluxu uasi.

³⁶ Laso loxo Mosinge Olu uxalixu xoluxolu lalavulusi noxinge la ngingi ngaxolu no anu lalavulusi maninasou ane.

³⁷ Ani, eni elavu lexe ngingi ta'ilusunu Apala'amu ia ngingi a ngakakamulinu vote'i so ngavelo asoli xo noxinge la tanixu vile so vaikalaxeli u'una uxolu uasisi.

³⁸ Eni alavusou alemolu vaikala ane Mamilo mulosoielixu. Mo ngingi axone kalumo xo ngingi ngalavusou nga'oxonu ili'ilixo ane maminge ulosoiengixu.”

³⁹ Ioxe, ane'i Taiuta milomu la mikolinu Iesua lexe, “Apala'amu anu mamixe ane.” La anu mulivuxa'a aloxo 'o, “Loxo manina lexe ngingi Apala'amu ta'olu la masi nga'oxonu ili'ilixo aloxo Apala'amu mu'oxonu.

⁴⁰ Xo eni 'o la a'oxonu mi vilela uasi, apela­pela'ingexu vaikala maninasi ane elomusou noxou Mosinge. Ia ngingi a ngamolo vote'i so ngavelo asoli 'oe. Ai, Apala'amu u'oxonu mi vile axone uasisi.

⁴¹ Uasi manina, ngingi a nga'oxonu ilixo noxou maminge toe ane.” La ane'i mikolinu lexe, “Nexi 'o la texali tamolomolo so vote'i vitanisi uasi. Nexi Mamixe vilesisi, anu ane Mosingesi.”

⁴² Xe Iesua muvi­kalane'i lexe, “Loxo manina lexe ngingi Maminge anu Mosinge la ngingi ngasexelaxo ane. Xo eni exoxolu noxou Mosinge kaio ene'e 'o. Eni ene'e 'o no anu masaxa na'a xelimo uasi, anu molu mupalusilo a.

⁴³ Laso mimi ane alemolemolu 'o la upalasi noxinge uasi xo ma'ia? Anu tava'u xo opongengi ukasou vaikalaxeli uasi.

⁴⁴ Ngingi tano­xou maminge to e Uluaou mo ngingi opongengi ututulu so nga'oxonu mimi ane maminge ne umasaxau. Musoko'u tei manina mune'e 'o la anu ulavusou uve'ave'a tamitema isoisoli. Anu muamua'i­xu no anu manina uasi xo manina uxolu noxou uasisi. Loxo anu ulemolu kalavoi la anene ula no anu temanu xoluxoluxu xo anu mosou kalavoi xe anu mami'a tamitema so kalavoisi.

⁴⁵ Ia loxo eni la alemolu vaikala maninasi, laso maixene ngingi ngalopala noxilo uasi.

⁴⁶ Ngingi nga'oxo lexe eni esususu, ne? Ioxe, ena'ei noxinge umomomo so ulemolu vaikala ane upala'anixu susu noxilo? Vaikala vile axone uasi. Ia loxo alemolu vaikala ane maninasi aloxo 'o, laso axova so ngalopala noxilo uasio?

⁴⁷ Ane'i tanoxou Mosinge la ilavusou ilolomuxu vaikalaou Mosinge. Laso maixene ngingi a ngalolomuxu vaikalaou uasi xo ngingi tanoxou Mosinge to uasi.”

Iesua muvikala lexe loxo Apala'amu uxali uao la anu molu muxoxolumo

⁴⁸ La ane'i Taiuta mikolinu Iesua lexe, “Nexi te'oxo lexe nini so Samalia xe angelo masua uxolu noxine ne. La no anu anene telemolu manina, ne?”

⁴⁹ Xe Iesua mulivuxa'a lexe, “Angelo masua uxolu noxilo uasi. Eni alavusou ataxanu ualasou Mamilosi ia ngingi la ngapupuiou ualasilo.

⁵⁰ Eni 'o amolo vote'i so ualasilo u'uli'uli uasi. Ia Vile a uxoxolu e umolo vote'i so u'itinu ualasilo u'uli'uli mo anu anenesi a utilotilovo ulapusi.

⁵¹ Eni avikala­ngengi manina e maninasi, itema ena'ei ulomuxu vaikalaxeli la uxalisou soli uasisi.”

⁵² Taiuta milomu axone la mivi­kalanu aloxo 'o, “Anu ane, nexi telavu manina lexe angelo masua uxolu noxine. Xo Apala'amu muxolu xo la musoli xe tapolopeti axone kalumo. Ia nini to ne ne'oxo lexe itema ena'ei ulomuxu vaika­lameni la uxamulinu soli uasisi.

⁵³ Xo axova, nini namitema natiatila noxou mamixe Apala'amu, ne? Ne'oxo axone? Anu musoli xe tapolopeti kalumo misoisoli. Uo, nini ne'oxo lexe nini namitema to axovae?”

⁵⁴ La Iesua mukoline'i lexe, “Loxo eni melo a'itinu ualasilomo la uala e so axalisou ne anu mi vitanisi. Ia uasi, xo anu Mamilo molu u'itinu ualasilo so u'uli'uli. Anu ane ngingi nga'oxo lexe Mosingemo.

⁵⁵ Ngingi la ngalavusou uasisi, ia eni la alavusou a. Loxo eni avikala lexe alavusou uasi la eni axali amitema so kalavoi aloxo ngingi to ne. Ia uasi, eni elavusou mo alavusou alolomuxu vaikalaousi.

⁵⁶ Ngingi maminge Apala'amu oponu mulelei so lexe umaisou voxosilo. Xe mupalasi noxoui la mu'osa'ilasou misevile.”

⁵⁷ Laso Taiuta mivikalanu lexe, “Nini tau iexene 50 uao ia ne'oxo lexe nemaisou Apala'amu, ne?”

⁵⁸ La Iesua mukoline'i aloxo 'o, “Eni avikalangengi manina e maninasi, no mi ne Apala'amu uxali uao la eni Melo Axoxolumo.”

⁵⁹ Milo­mu­sou vaikalaou ne sila mitoki­tokinu lavo'o so lexe ileaxu Iesua no anu. Ia anu mutalumexa'a mole mula no tasou Mosinge avile.