Tiemisi 5 - Ata New Testament

Tamitema ilitisi mo i'osasou mimi'a la'oluxusi la ilaxa'i laixe

¹ Xe eni vaikala so alemolu noxi'a tamitema ane ixolu ilitisi no anu mimi. Anu laixe so ngaxavutalanu tu'utu'umaxu e so uxalisinge la ngatatama mo ngaungaungasi.

² Xo lakakongenge mu'ui'ui xe lavuluti lailaixe noxinge tasaisave mixotosou mukalu.

³ Mo mimi­mengi no anu koli ilou siliva mulosu. La losusou upala'anixu susu noxinge xe anu u'ou vasimenge loxo navu. Ngingi a ngaxolu no anu kaluxusou voxo ia ngingi to a ngasu'asu'anu la'oluxu mimimengi lailaixesio.

⁴ La nga­lomu, ngepalusi'a tauokuvoi so mitaxusou nene'axu xaingenge une'e noxinge, ia nge'apisou lapei'a. Laso anu loxo lape ne u'ava'ava so upala'anixu susu noxinge ne. La tamaisi'a tauo­kuvoi e mitaxusou xaingenge nene'axu a muxali noxou Tata­nanenge anu Mosou Xavi.

⁵ Ngingi ngexolu la ngepalava no anu mimi so lialia mo mi ma'ia opongengi mu'avutiou la ngeka­lusou masaxa no anu avile. La ngexolu loxo tamisoposi ane i'ani'ani tatila so tongolixa'a, ia ilavu uasi lexe voxo so tamosi'a ive'a isoli a alaimanasi.

⁶ Ngingi ne ngekotixa'a ka ngeve'a misoisoli tamitema talapusi ane ixililiiengi uasi.

Mosinge ta'olu taxolu se'isisi mo tatavulenu tu'umaxu

⁷ Laso tavivilo, ngaxolu se'isisi so ngatavulenu tu'umaxu xo mo uxali avile no anu lailivuxu Tatana­nenge. Loxo ngelavu, itema loxo utounu xai la uxolu xo xe taimusou la'iua vile xe tameisou ukalui, la xai uleme. Uleme la mosou uxolu se'isisi mo uxomaiou lialia so uxalixu nene'axu lailaixe.

⁸ Laso ngingi kalumo ngaxolu se'isisi mo nga'oxonu opongengi pumuxu xo voxosou lailivuxu Tatananenge a alaimanasi.

⁹ Tavivilo, ngakalakalapu noxinge ngato'o mamu xo loxo 'o io Mosinge utilovosou ilixomengi kalumo lexe masua. Ngalomu, anu ane so utilovosou mi ma'ia ta'oxonu a unene'e mo a no aitenga sesi.

¹⁰ Xo tangengiou so ngamu­linu ilixo noxi'a tapolopeti e milalanu vaikala no anu ualasou Tatananenge tatei. Tavivilo, ane'i ne mitavulenu tu'umaxu no avo'a taxilili ia mi'oxonu opone'i pumuxu so mixolu se'isisi no anusi.

¹¹ Ai nenge talavusou tavikala lexe, “O laixe manina noxi'a tamitema so mixolu se'isisi no anu tu'umaxu axone.” A loxo ngelomusou a'alosou Tiopu tatei e muxalisou tu'utu'umaxu tavu'alo ia mu'oxonu oponu pumuxu so mutavulenusi. Mo ngelavu lexe mutavulenu mutavulenu xo laso Tatananenge mu'oxonu laixe noxoula. Ani, Tatananenge anu tanunenge misevile mo anu mosou alaunasi.

Talemolu mi vile so tasakinu vavalima uasi

¹² Ioxe tavivilo, mi vile mutiatila aloxo 'o. Loxo ngavavalima la mamu so ngalemolu mi vile no anu tualasou Mosinge o no anu lialia so ngasakinu vaikalamengi no anu. Loxo ngavikala ani, la utulu axonesi. Xe loxo ngavikala uasi, la uxiu uasi. Mo so axone la Mosinge utilovosou mi vile masua noxinge no anu uasi.

Linga noxi'a tamitema talapusi ne xavinu

¹³ La axova, vile no taingengi utavulenu tu'umaxu? Anu laixe so upilixinu noxou Mosinge. Mo axova, vile no taingengi uxamulinu osa? Anu laixe so ulexenu lexe so u'itinu Mosinge ualasou.

¹⁴ Mo axovala, vile noxinge upipiena? Anu laixe so u'avali'a tamitema so isaxila'u pita ine'e noxou ka ilutunu ueli se no vasimolu so ilingau su'ulisou no anu ualasou Tatana­nenge.

¹⁵ Xo loxo ivikala noxou Mosinge no anu lopalasi la Tata­nanenge upamaulinu anu ane mupipiena ne ka laixenusi. Xe no anu susu loxo mu'oxonu la Tatananenge uxavutalanula uae.

¹⁶ Laso ane, ngingi vilevilesi ngalu'engengi no iengi ngato'o so ngapala'anixu susu noxinge. Mo ngapilixingengi ngato'o noxou Mosinge so upaipoungengi xo anu ulomuxu vaikalai'a tamitema talapu mo linga noxi'a uxalixu nene'axu tavu'alo.

¹⁷ Xo polopeti tatei e Elaitia anu itema loxo nenge 'osi. Ia anu xavinu so mulinga noxou Mosinge lexe uali usilila uasi. La muxali axonesi xo muxolu tau ie tatalu mo so'io 6 la uali usili uasisi.

¹⁸ Xe mukalu la muvikala noxou Mosingela sila uali musili no loxotolo mulu'e mo la'ilali no xaixai munene'ala.

Pelototo kaluxusou

¹⁹ Tavivilo, loxo vile noxinge upolo va'axu no anu vaikala anu temanu manina la anu laixe manina so vile noxinge uxiunu ulivunoxu.

²⁰ La tangengiou vaikala ano'o laixe. Anu ane muxiunu mulivu­noxu vivinge musususu olele, la mupamaulinu no anu soli ane. Mo no anu anene la mu'oxonu vote'i so susu tavu'alo noxou vimou ne Tatananenge uxavutalanula uae. Anu anesi.