Hilemoni' 1 - Monoꞌ Godolo Gosohoꞌ

Paulo' Luhuvo Nite' Api' Ogo Gizelesa Hilemoni'ni Opo'ni Lo Gizine' Gamazi

¹ Luhuvo nite' meve nene Izesu' Kilisito'nimu' ve lo nalato' nouve Paulo' nenitatikisi ido' leze zuho Timoteodatikisi nene novive. A'mine luhuvo nite' meve nene lelikisi hamo' gono daa' nounive lute geme nonive Hilemoni' geikumukisi

² ido' leze zuho vene' Ahia'nimukisi ido' monoli'mi lovou' maka' zege' zege' oga' unive Alakipo'nimukisi ido' Kilisito' evenele gei' numungau' mulise milaa' naave engikumukisi nene nogize-lingiduve.

³ Nemu' nene luhuvo nite' mene nogize-lengedo O'moso metehosi Guvetesi ve Izesu' Kilisito' neesi nasahili' i-lingidikesivo ne'mo lengi' muludingu' nene hongu minivoo mine lamine' igi minilizave loo O'mosola noluve.

Paulo' O'mosola Laa' Ingu' Nene Hilemoni' Monovo've Laminekumu' Gelo A'minemu' Isaa' Neve Lo-daa' Nouve Lo Hilemoni'ni Lo-imine' Gamazi

^4-5 Hilemoni' gaza Guvelesi ve Izesu'nimu' gele ele'vole' ogo mino luka ezesi ido' O'moso'mi evenele mukikisi ngemaa' naningumu' nene gelosa naza O'mosola laa' nouvongu' nene geikumu' gamene gamene isaa' neve lo-daa' nouve.

⁶ Ido' a'mine O'mosola laa' nouvoni' nene gaza Kilisito'nimu' gele ele'vole' ogo leliku' omo gi'mizo naine' ne'mo nene laza Kilisitoda mine molo inite' lamine' daa' noune' mukikumu' nene gele osu' lo mineline losa O'mosola laa' nouve.

⁷ Ido' neze zuho make, O'moso isaa' neve lo-daa' nouvoni' nene gaza luka O'moso'mi evenele ngeme naine' ne'mo lu'ine amuzo gohi dani' ne'mo nene lu'ne do ngi lo-nedavo mulu'neu' gulumo avile atoli'mine ogo lisivoo nouvoni' nenako nemu' nene O'moso isaa' neve lo-daa' nouve.

Paulo' Aza Onesimo'ni Nene Hilemoni' Gohi Do Eita Ilingumu' Longo' Ogo Line' Gamazi

⁸ Naza amuzo molo lovo kiselevo' ogosa Kilisito' velemu' ogo gaza lisihe' o neine' inite' me'mine nene ozo lo lo-huko lo-gedelodo' o nouvoni'za

⁹ Kilisito' evenele laza lute ge neme ne geme lo minelonido' o neinako nemu' nene amuzo molo lo huko lo-gedamo asi haza nevo longo' ogo gele-gedelesa nene noluve. Ee, Paulo' naza Kilisito' velemu' medelo mino gamazi've lo soto' oga' uve ido' idise a'mine Izesu' Kilisito'nimu' ve li nalato' huli-nimikave neni' nene haza nevo longo' ogo gele-gedelesa nene noluve.

¹⁰ Ido' longo' ogo gele-gedelesa noluvoni' nene nalato' mene minuvongu' meleho lolo' okuvo aza izipaha'ne lolo' ive Onesimo'nimu' nene muhele' gamazi nolo-gimuve.

¹¹ A'mine ve aza gomu' geikisi minasida nene gonoka do-gedelido' lisihe' amo minine' ma neine'za idise gei' gonokasi neni' gono'ne nesi do-ledelido' lisihe' gehepeve ogosa neive.

¹² Aza neve nene neni' ve'ne gihile gehepeve neine'za a'minemu' nene gele hulosa geita gohi noimisele huluve.

¹³ Naza Kilisito' gamazi've lamine' lo soto soto' ogo minaa' uvongumu' nalato' mela nouvongu' geito' medelo mino gono'ne do-nedaa' ilingumu' nene nenikisi ha minelive lo gele minuha ma imiselamuvodine'za

¹⁴ geitati' gamazi ma gele nemamo nolinido' nene inite' do ne'mine mana'mine uvoni' gelalive losa nene alamuve. Ido' ne'mino alamuvoni' nene Onesimo' gono'ne do-nedelingumu' nene o've lo-deline' aka hize tile-gedekuvosa gaza monovo do lamine' ogo a'mine gono dalive loo lo nemeline' nene edamiline' o neivosa gasika nene lukalo' do molosa neni' gono do-nedelive lo lo nemeline losa nene alamuve.

¹⁵ Ido' O'moso'mo lavo gamene li'nibemukovo' gei' hulo-gedo hota vo minine' nene alinge' tine' molo ogo geikisi mudise minivi' minivi' ilisive lo nemu' hulo-gedo vihe losa nene gele nouve.

¹⁶ Ido' tine' molo ogo geikisi mineline' nene ha gonou' ve ne'minevo' nene minelivoba asi Kilisito' evenele geze zuho luka emelinido' o minelivesi nene mineleseive. Ee, neze zuho lu'ne eme lamine' o nouve lolo' ogo neiha geita nene gonou' ve minosa ido' Guvelesi vela gi'mizo minosa geze zuho gehepevesi nene lolo' ogo mineleseinako neni' lu'ne eme nouvoni' nene ivile' ivosa gaza nene luka vauve elosa emelinido' mineleseive.

¹⁷ Nemu' nene gaza nenikumu' gelanivo zogo naa' olosive lamine' nane lo gele naine' nenako nemu' nene Onesimo' aza gei' nanida naavo ma nene naza nanida alodo' nele'mize lamine' iline' akalo' do molosa ele'mize lamine' ozo.

¹⁸ Ne'mine iline'za aza neve gomu' maka' minasida ma do goloso o-gede nolihe ido' geitati' inite' malo' golo hizo ma gemelido' o neivo ma nene a'mine inite' mukito' nene neni' golo hize-gedeloze. Neni' gehe-nedezo.

¹⁹ Ido' a'mine mene neni' golo hize-gedelove noluvoni' gamazi nene do amuzo molalosa luhuvo a'me ve nene Paulo' neni' a'nedunu' gehepeve nogizuve: A'mine neve neni' golo hizo gemelesuve. Gemelesuha nenitati' dina' naba geita nene ha neine' ma neine'za naza a'minemu' nene ha luvodine'za ma lolosa gelamuve. A'mine dina' nene ado' Kilisito'nimu' neni' lo soto' ogo lo-gemekuvo ezemu' gele ele'vole' ogo minevo' minevo' gemeni dameni daningumu' nene noluve.

²⁰ Ne neiha neze zuho make, laza nene Guvelesi ve'mi evenele nosine' nenako geitati' inite' ma daloho lo nogiluve. A'mine nene ado' Kilisito' evenele nosingumu' ve lo neni' lu'neu' do lamine' o-nedo gele emanivo Onesimo' nenita alive losa noluve.

²¹ Ido' ne'mine lo nogizuvoni' nene gaza longo' o-gedeloni' votigile ivile' ivosa inite' lamine' gohi masi imine' molo olosane losa gele nouvoni' nenako gamazi'ne mene mo gele dalosane lo gele mu'musi' o minosa nene nogizuve.

²² Ido' gamazi hamo' gohi ma neine' neve nene ne'mine lo noluve: Lingine nenikumu' ve li O'mosola laa' naani' malo' nene O'moso'mo gele lengemo neni' neve nene lengita nimiselavo alosuve losa gele nouze. Ongaloni' numuno lulo nene ma do va'va' o nimikezo.

Paulo' Gamazi Gize Osu' Lolosa Ezesi Gono Daa' Avesi Hilemoni'ni Opo'ni Lani' Gamazi Gizine'

²³ Ido' nenikisi maka' Izesu' Kilisito'nimu' nalato' nosive Epahala' ne'mo nene gopo'ni nolive.

²⁴ Ido' maka' gono daa' unive ado' Maleko' ve Alisitako' ve Dema' ve ido' Luka' ve engi' nete nene a'mine'mine igi gopo'ni nilave.

²⁵ Guvelesi ve Izesu' Kilisito' nasahili've nene lengi' lutingu' mine molo minivoo.