Hebilaio' 1 - Monoꞌ Godolo Gosohoꞌ

O'moso'mo Gipeleine Gamazi Do Va'va' O-davo Gamazi've Lamine' Lo-limine'

¹ Gozopo' nene O'moso'mo gamazi've avotemotine lo-ngemelesa nene ato ato' gameneu' monovo do ato ato' ogo polohetela molavo ingine avotemotine li-ngimi ngimi' i'mi iga' ani' ve.

² Ne neiha gamene alinge' idise mene none' gamenela nene O'moso'mo gamazi've nene leli' lo-lemelesa ei' gipele neve imiselavo ogo lo-limine' ve. A'mine gipele nene inite' mataliti me'nibo minelive lo ele'mize molo ei' gipelelo' a'mine inite' mata' muki' nene do soto' ine' ve.

³ A'mine gipele neve O'moso'mi monovo danava've atoli'mine goloso ogo lamine' neine' ne'mi gihile've gehepeve mino O'moso'mi emeni dameni ne'mido' lisihe' gehepeve o minive ne neive. Nemu' a'mine gipele ne'mo ei' amuzo'velo' molo gele mino laa' neine' gamazi ne'mo nene inite' mata' muki' nene hize ele' ivo laminekovo' minaa' neive. Ido' aza nene goloso initete apase-ledaa' aka've vele osu' lo-ledo veleta ve Guvelesi ve naba eitoti' lemo minive nenako ana hulaa' ida minine' ve.

⁴ Mino O'moso'mi gipele ve li li-dani' gulive've ne'mo O'moso gelekele' i-di gono've di-daa' ave angeloliti gulive'ine nene ivile' ogo mino a'mine votigilelo' lisihe' ogo ngivile' goloso ogo dizosa neive.

O'moso'mi Gipele'mo Angelo' Muki' nGivile' Ogo Osu' Lo Neingumu' Line' Gamazi

⁵ Ee, O'moso'mo gipelemu' line' gamazi nene angelo' hamokumukisi ma lo-ngedamine' nenako ne'mo nene aza angelo' ngivile' ogo dizosa neive. O'moso'mo ezemu' ti' lo line' mono' godolou' gizi nizani' ma neive: Idise naza gei' maho lolo' ogo neni' gipe'ne gei' nene nane lo do ote-giduvoni' ve. Ido' ma line' gizi nizani' ma neive: Naza nene ei' giduve melehine minekuvo Eze nene neni' gipe'ne minelive.

⁶ Ido' O'moso'mo gana' gipele nene misubouko imiselelesa gohi line' gamazi ma ti' li gizi nizani' ve: O'moso'mi angelo' muki' ingine gubi' izi imi opo'ni lilizave.

⁷ Ido' angelo've ingine gelekele' i-di minaa' avemu' nene O'moso'mo gamazi ti' lo line' luhuvo gizi nizani' ma neive: O'moso'mo lavo ei' angelo've nene hepe' ngemeni dameni di otuhaa' nave. Ido' lavo a'mine gelekele' i-daa' ave nene olo' gulumo ne'mine ngemeni dameni di otuhaa' nave.

⁸ Ne'mine o neine'za gipelemu' neve mono' godolou' ti' lo line': O'mosoo, gaza gizebo oga' mo'mosikau' gizebo ogo mineline' nene huko vamo minevo' minevo' ogo mineleseive. Mineleseinako Guvekasi ve lolo' ogo mineline' ne'mi monovo nene monovo do lisihe' oga' monovo nene mineleseive.

⁹ Gaza nene monovo lisihe' laminetokovo' luka molo mino goloso inite' daa' monovomu' gosele' gebelavo mehenga emaa' nane. Ne'mine oga' nane' nenako O'moso gei' O'mosoka ne'mo eveneka ngivile' ogo gaza golize izo mineline lo a'mine mo'mosito' nene gele'mize molave.

¹⁰ Ido' ma nene O'moso'mo gipelemu' Guvekasi ve lo-do ti' lo lo neine' ma neive: Guvekasi ve, gaza gana' nene me misubo do soto' molanivo amuzo molo ha neive. Ido' Okulumo' nesi gei' angadunu' lolo' aine' ve.

¹¹ Ne neiha a'mine inite' nene vi osu' lilisasine'za gaza nene minevo' minevo' ogo haza minaa' nane. Ido' okulumo' misubo nene eveneliti oko'nido' inite' hulupovo ili goloso iga' nani' ne'mine ilisasive.

¹² Ido' a'mine okulumo' misubo nene litehe inite' di gangi milani' ma'mino gango moloko gosoho' ha do soto' olosaba gaza neve ha minevo' minevo' ogo hazavo' nanivo kilisimasi nene ogo voka' voka' ogo mineline' nene osu' lamoloseive.

¹³ Ido' gipelemu' ti' lo line' gamazi ne'mino nene angelo' hamokumukisi lo-ngemesa'mive: Nezeloti' gei' nene nange. A'ne hulaa' uvoda nene minezo. Mine do vo nanivo biluvaka nete gelekele' i-gidi minilizave lo gizengau' do'mo leme-ngedelesuve.

¹⁴ Ne'mine ma lo-ngedesa'mine' nenako angelo' ingine gipele ne'minisa dizi minami ha Okulumo' ngemeni damenisi O'moso'mi gelekele' ve've minikevo O'moso'mo do lu' izelesa lele'mize molave leli' nene hize ele' i-lidilizave lo ngimiselaa' neive.