Filemoun 1 - Safeyoka

¹ U nje nɨngkwahwo Filemoun, nje hungkuno tɨfo upa'nyo. Ngko Poulɨ'ni nekwoe nɨngkwahwo Timouti'nji nohumentayo kikine'no olo iyoswo loso mtɨ'mokalokuhwoyo. Ngko a'amumo Jisas Kɨlaisɨye hungkuno ulɨmale so'no hofɨko ngkimo impo'angomo intofanɨhumalofofoho. U Filemoun kɨko nekwo'nji Anɨtumne'no syoho afa hwosoho. Nekwo sɨmeho kijopalokuhwoyo.

² Nekwoe hungkuno loso olo a'amu lomo uhwojalokuhwoyo. Nekwoe nampohwo Apiya'nji Akiposɨ'njoho. Akipos ngko pa'nyo Anɨtumne'no yokumpohn'nyo lohofonto Anɨtuye hungkuno lutɨhwalofoho. Nom'ne a'amu Jisas Kɨlaisɨmo inɨngkawentɨfi jɨje angomo uhu'mokuwo'nɨngkohofo somo hungkuno loso mtɨ'mokalokuhwayo.

³ Nanɨngkwohwo Anɨtu sohwo'nji nakwoe Hwe Engo Jisas Kɨlaisɨ'nji siko'monta'i siko yo'mayo wopɨngo selohofosɨsi sɨmeho pompengo wosejopanjiyoho.

Filemoun kako Hwe Engo Jisas sohumo sɨmeho uyɨmojo hweho.

⁴ Nje nɨngkwahwo Filemoun, ngko Anɨtumo jomo ulontnne sohonta ngko kikine'no isamoyoka mɨkunɨmposo ulɨwo'nɨngkohefoho.

⁵ Hwapɨngoso ole, Olo hungkuno loso upa'nɨmalefoho. Kɨko nakwoe Hwe Engo Jisas osohumo sɨmeho hi'ntnnono engo uyonji a'amu Jisas sohumo inɨngkuwo'nɨngkohofo oso'ntnne'no sɨmeho uyalokuno. Oso'no Mpohumo isamoyoka ulalokweno.

⁶ Olo so'no nɨmo'nɨngkohoho. Nakwo Jisas Kɨlaisɨmo inɨngkawo'nɨngkuhwone hn'nwi nakwo yokumpohn'nyo sosofito'nɨngkuhwasi fo'ma'nososo yo'mayo wonyoangkafo Jisas Kɨlais nejapɨwo'nɨngkiso so'no nakwo huno ito'no naisoso ito'nohini wokemokosyohumantanoho. Oso'no Mpohumo jomo ulalokweno.

⁷ Filemoun kɨko a'amu Jisas Kɨlaisɨmo inɨngkawo'nɨngkohofo somo sɨmeho engo uyalokuno so'no ngkimo yokumpohn'nyo nɨsosofitofonji nje sɨmeho wopɨngo kɨko nɨmokuwo'nɨngkino hwosoho. Anɨtuye a'amu hopi'nonohinoso kikine'no syakufɨsyontɨfi sɨmeho wopɨngo umo'nɨngkohoho.

Poul Filemounɨmo ulɨmento, Kɨko Ounesimosɨmo maho. Jɨje nɨngkwahwo hopa umo'nono.

^8-9 Hungkuno anga'nohino Ounesimosɨmne'no wakilohonɨmonne'no yohono. Nakwoe Hwe Engo Jisas Kɨlais a'amumo sɨmeho uyo yahino loso nejapmmentiso so'no ngko hungkuno yokumpohn'nyo kɨko inɨngkayo'neso nokilɨ'mnesohilo. I oso'no ngko sɨmeho kijapmmentohe so'no olo so'no jomo wakilohonɨmonne'no yohono. Kɨko ngkine'no huno kiyohoho. Ngko a'mane imo'nonji Jisas Kɨlaisɨye syohomne'no impo'angomo humaleno.

¹⁰ Oso'no Ounesimosɨmne'no wakilohonɨmonne'no yohono. Kako nje hwomu pa'nyo imo'nɨngkiso hweho. Impo'angomo nohumanji Anɨtuye hungkunoso Ounesimosɨmo ulahonɨngko hungkuno hiloso kako sɨmeho hi'ntnnono uyonto Anɨtuye a'amu imo'nɨmasofoho. Oso'no ngko kanɨngkwohwo pa'nyo humaleno.

¹¹ Oso hwe huhwo sohwo Ounesimosɨyo kakoe yofe hwapɨngoso olenoho. Fo'mayo'nefoho. I hohonta Ounesimos kako jɨje syoho kilohofimentiso sohonta kako wonyo kiloho'mentisofoho. I olohonta kako kɨko'nji ngko'nji syoho wonyoangkafo elohofiyo hweho. Kako wefo'ma'montonoho.

^12-14 Anɨtuye syohomne'no impo'angomo nohumentanɨ'mo kɨko ango kengopo nohumahoji ngkimo manɨfo'matnnehino. Kɨko ngko'nji humentontasi ngkimo wopɨngo nonɨmokosyohumantnnesohilo. I oso'no jɨje syoho kilohofiyo ngko'nji humayo so'no ngkimo wopɨngo nɨmokosyohumahwoso'no nje sɨmeho wopɨngo wanɨmo'nɨmonte'no yohoho. Jɨje uyohope hweho. Ounesimos ngko'nji wohumano lonji ko yoheso kɨko olo hilo so'no manjoso'no ngko jɨje honɨngkano jɨje syoho kilohofiyo osohumo asomo utɨmayo'ne mopɨjwakumo'mnehono. O'o, kɨko ngkimo nɨfo'mayo so'no asomo uhwajisoso oso wonyoangkafofoho. I oso'no jɨje hunofoho. Oso'no kikiyepono Ounesimos sohumo uhwojalokweno. Hwe huhwo sohumo sɨmeho engo uyonji uhwojalokweno.

^15-16 Hohonta kako kuhwotɨ'mofonto we'enehwo hiyaso umentisofoho. Osohonta kako hamniyoho momaso'njo siki syoho kilohofiyo hweho. I olohonta syoho kilohofiyo'nohino hwo'maho. O'o, kako hnnɨngkwa'wehweho. Hwapɨngoso kako Hwe Engo Jisasɨmo sɨmeho uyɨwo'nɨngkiso hweho. Sɨmo'mo Ounesimos we'enehwo kuhwotɨ'mo'mentisoso olelɨkeno, kɨko'nji ne'no nohumuhnne so'no kakuhwotɨ'mo'mentono. Nenɨngkwohwo Ounesimosɨmo sɨmeho uyɨmentohe hwo'nyoho. I olohonta kɨko kakimo sɨmeho engo uyɨmonnoho. Kako jɨje syoho kilohofiyo'nji hnnɨngkwa'wehwo'njoho.

¹⁷ Kɨko ngkimo Anɨtuye syohomne'no nje tatohwo hwosoho syonɨfɨsyɨwo'nɨngkino'manji kɨko ngkimo ntohofɨwo'nɨngkino hopaso kɨko Ounesimosɨmo ulohofo.

¹⁸ Hohonta kako kikimo wonyo pipi kiloho'mentiso'manji kɨko ngkine'no oso hiso'no hungkuno filɨhwajo. Ngko jɨje yo'mayo so'no kikimo aku wokijapmmo.

¹⁹ Ngko Poulɨ'ni yo'mayoso aku wokijapmne'no nehopi kilalokweno. U kɨko uhwonyo. Olo hungkuno loso nje aho'nji ifalifaliyo mtɨ'mokalokweno. Ngko jɨje hunomo huno makufohoto'mnehono. Hohonta ngko Anɨtuye hungkuno lokitɨhwahonɨngko kɨko olo hungkuno hilo somo sɨmeho hi'ntnnono umentohino so'no kɨko songo ne'no humayo'neso ma'mentohinofoho. I oso hungkuno kilɨmentohe so'no kɨko ngkimo aku peho ntapmmentohinoto. Awonoho. Oso hiso'no ngko huno makufohoto'mnehono.

²⁰ U nje nɨngkwahwo, kɨko ngko'nji nakwoe Hwe Engo Jisas Kɨlaisɨye syoho ntnne'no syafɨsyohoji kɨko Ounesimosɨmo ito'no mokosyohumaho. Kɨko ose isoso nje sɨmeho wopɨngo wanɨmo'nɨmontonoho.

²¹ Olo hungkuno ngko kikimne'no mtɨ'mokuyohojalokwe loso kɨko uhwonɨngkohoji haloho peso'no ngko huno niyohoho. Ounesimosɨmne'no yahino wopɨngo kɨko ulohofo so'no kilohe somo tɨfi inɨngkahuji oso mta'ni kɨko yo'mayo yahino wopɨngo ne'no mjɨmɨsoso jɨje yahino wopɨngoso nje hungkuno kilohe loso jɨje hunoso nje hunomo wonɨyakolo'monnoho.

²² Nom'ne hungkuno tɨfo upa'nyo. Ounesimos kikimo ku'maso sohonta kɨko ngkine'no ango anga'no ito'no fesyohumaho. Hwapɨngoso sekwo ngkine'no Mpohumo jomo ulɨwo'nɨngkohofo so'no hontohumaleno. Anɨtu sekuyepono ngkimo asomo wonɨhwajono ntnne'no yalokweno.

Nom'ne a'amuso Filemoun ne'no nakwoe a'amu hweho lɨmentohofofoho.

²³ Epeefɨlos kako'nji ngko ntnne'no Kɨlais Jisasɨye syohomne'no impo'angomo humalohwoyo. Kako kikimne'no nje a'amu hweho lonto huno syokufɨsyalofoho.

²⁴ A'amu nom'ne sohwa ngko'nji Anɨtuye syoho yalokuhwone sohwa kikimne'no nakwoe a'amu hweho kilalokwofo. A'amu huhwo sohwa ole, Mak, Alisɨtakos, Ntemas, Luk. Osohwa kikimne'no syokufɨsyalokwofo.

²⁵ Nakwoe Hwe Engo Jisas Kɨlais kako yo'mayo wopɨngo waselohofono. Nje hungkuno tɨfo osohopeho.