افسیسیان 5_1 - Afghan Pashto Bible

پنځم فصل په رڼا کې ژوند

¹ لکه د خدای د ګرانو اولادونو په شان د هغه نه پیروي وکړئ.

² په مینې سره ژوند وکړئ، لکه څنګه چې مسیح زمونږ سره وکړه او خپل ځان یې زمونږ دپاره د خوشبویه نذرانې او قربانۍ په توګه خدای ته وړاندې کړ.

³ خو ستاسو په هکله دې د هېڅ ډول جنسي بد اخلاقي او حتی د هېڅ ډول ناپاکۍ او حرص خبرې نه وي، ځکه چې دا د خدای د خلکو سره مناسب نه دي.

⁴ په تاسو کې دې چټلې، کم عقلې خبرې او یا بې ادبه ټوکې هم نه وي، ځکه چې دا ټولې بېځایه خبرې دي، بلکې د هغو په ځای د خدای شکر ادا کړئ.

⁵ ډاډه اوسئ چې هېڅ ډول جنسي بد اخلاق، ناپاک یا حریص انسان ته (ځکه چې حرص یو ډول بت پرستي ده) د مسیح او خدای په پاچاهۍ کې میراث نشته.

⁶ مه پرېږدئ چې څوک مو په پوچو او بې معنی خبرو وغولوي، ځکه چې د همدې شیانو له امله د خدای غضب په هغو خلکو باندې نازلیږي چې نافرمانه وي.

⁷ نو د داسې خلکو سره په کارونو کې مه شریک کېږئ.

⁸ که څه هم تاسو یو وخت په تیاره کې وئ، خو اوس په څښتن کې په رڼا کې یئ. نو د رڼا د اولادونو په شان ژوند کوئ.

⁹ ځکه چې د رڼا مېوه نېکي، عدالت او حقیقت دی.

¹⁰ کوښښ وکړئ، ترڅو دا معلومه کړئ چې څښتن په څه شي خوشحالیږي.

¹¹ د تیارې په بې ګټې کارونو کې برخه مه اخلئ، بلکې هغه رسوا کړئ.

¹² حتی د هغو کارونو په هکله خبرې کول چې هغوی یې په پټه کوي، هم د شرم خبره ده.

¹³ خو په کوم شي باندې چې رڼا وځلیږي، نو هغه به ښکاره شي،

¹⁴ ځکه چې رڼا هرڅه ښکاره کوي. نو له همدې امله ویل شوي دي: ای ویده، راویښ شه او د مړو نه راپاڅېږه نو د مسیح رڼا به په تا باندې وځلیږي.

¹⁵ نو پام کوئ چې څه ډول ژوند کوئ. د کم عقلو په شان ژوند مه کوئ، بلکې د هوښیارانو په شان ژوند کوئ.

¹⁶ د هرې موقعې نه ښه ګټه واخلئ، ځکه چې زمانه خرابه ده.

¹⁷ نو کم عقل کېږئ مه، بلکې په دې ځان پوه کړئ چې د څښتن رضا څه ده.

¹⁸ په شرابو ځانونه مه مستوئ، ځکه چې ستاسو ژوند تباه کوي، بلکې د روح القدس نه ډک شئ.

¹⁹ د یو بل سره زبورونه، مذهبي او روحاني سندرې وایئ او د زړه له کومي څښتن ته سندرې او خوږې نغمې وایئ.

²⁰ د هرڅه دپاره تل پلار خدای ته زمونږ د څښتن عیسی مسیح په نوم شکر وباسئ.

د ښځو او مېړونو ترمنځ اړیکې

²¹ همدارنګه مسیح ته د درناوي په خاطر د یو بل تابعداري کوئ.

²² ای ښځو، د خپلو مېړونو داسې تابعدارې اوسئ لکه څنګه چې د څښتن عیسی مسیح تابعداري کوئ.

²³ ځکه چې هر مېړه د خپلې ښځې سر دی لکه څنګه چې مسیح د کلیسا یعنې د خپل بدن سر دی او هغه خپله د هغې خلاصوونکی دی.

²⁴ نو لکه څنګه چې کلیسا د مسیح تابع ده، همداسې دې ښځې هم په هر شي کې د خپلو مېړونو تابع اوسي.

²⁵ ای مېړونو، د خپلو ښځو سره داسې مینه کوئ لکه څنګه چې مسیح د کلیسا سره کوله او خپل ځان یې د هغې دپاره قربان کړ.

²⁶ هغه داسې وکړل، ترڅو کلیسا د اوبو او کلام په وسیله ووینځي او هغه پاکه او سپېڅلې کړي.

²⁷ هغه داسې وکړل، ترڅو د ځان دپاره داسې د شان او شوکت نه ډکه کلیسا تیاره کړي چې بې داغه، بې ګونجې او کوم بل عیب په کې نه وي، بلکې سپېڅلې او بې عیبه وي.

²⁸ همدارنګه مېړونه باید د خپلو ښځو سره داسې مینه وکړي لکه څنګه چې د خپل بدن سره یې کوي. هرڅوک چې د خپلې ښځې سره مینه کوي، نو د خپل ځان سره مینه کوي.

²⁹ هېڅوک هم د خپل بدن نه کرکه نه کوي بلکې هغه ته خواړه ورکوي او پام ورباندې کوي، لکه څنګه چې مسیح یې د کلیسا دپاره کوي،

³⁰ ځکه چې مونږ د هغه د بدن غړي یو.

³¹ لکه څنګه چې د خدای په کلام کې لیکل شوي دي: له همدې امله سړی خپل مور او پلار پرېږدي او د خپلې ښځې سره یوځای کیږي او دواړه یو بدن شي.

³² دا یو لوی راز دی او زه د مسیح او کلیسا په هکله خبرې کوم.

³³ خو په هر حال، په تاسو کې دې هر مېړه باید د خپلې ښځې سره د خپل ځان په شان مینه وکړي او هره ښځه هم باید د خپل مېړه درناوی وکړي.