اول تِسالونيکيان 5_1 - Afghan Pashto Bible

پنځم فصل د عیسی مسیح بېرته راتللو ته تیاری نیول

¹ ای خویندو او ورونو! اړتیا نشته چې مونږ تاسو ته ولیکو چې څنګه او کله به دا هرڅه پېښیږي،

² تاسو ښه پوهېږئ چې د څښتن ورځ به د هغه غله په شان وي چې د شپې راځي.

³ کله چې خلک وایي چې سوله او امنیت دی، نو ناڅاپه به په هغوی باندې داسې مصیبت راشي لکه څنګه چې په امیدوارې ښځې باندې د ماشوم د پیدا کېدلو درد راځي او هغوی به تښتېدلی نه شي.

⁴ خو ای خویندو او ورونو! تاسو په تیاره کې ژوند نه کوئ چې هغه ورځ به تاسو د غل د راتللو په شان حیران کړي.

⁵ ځکه چې تاسو ټول د رڼا او د ورځې اولادونه یئ. مونږ د تیارې او شپې خلک نه یو.

⁶ نو بیا راځئ چې د نورو په شان ویده پاتې نه شو، بلکې ویښ او هوښیار اوسو.

⁷ ځکه چې خلک د شپې ویده کیږي او د شپې نشه کیږي.

⁸ خو څرنګه چې مونږ په رڼا کې ژوند کوو، نو راځئ چې هوښیار اوسو. مونږ باید ایمان او مینه لکه د زغرو د کالیو په شان واغوندو. زمونږ د خلاصون هیله دې د زغرو د خولۍ په شان وي.

⁹ ځکه چې خدای مونږ د دې دپاره نه یو غوره کړي چې خپل غضب په مونږ نازل کړي، بلکې د دې دپاره چې مونږ د خپل څښتن عیسی مسیح په وسیله خلاصون پیدا کړو.

¹⁰ هغه زمونږ دپاره مړ شو، ترڅو کله چې هغه بېرته راځي، که مونږ مړه یو یا ژوندي یو، وکولای شو د هغه سره یوځای ژوند وکړو.

¹¹ نو بیا تاسو یو بل وهڅوئ او قوي کړئ لکه څنګه چې اوس یې کوئ.

وروستنۍ لارښوونې او سلامونه

¹² ای خویندو او ورونو! ستاسو نه غوښتنه کوو چې د هغو خلکو درناوی کوئ چې په تاسو کې زیار وباسي او د څښتن په کار کې تاسو ته لارښوونه او نصیحت کوي.

¹³ د هغه کار له امله چې هغوی یې کوي، په مینه د هغوی ډېر عزت کوئ او یو د بله سره په سوله کې ژوند کوئ.

¹⁴ ای خویندو او ورونو! مونږ ستاسو څخه غواړو چې لټانو او بېکاره خلکو ته نصیحت کوئ، بې زړه خلک تشویق کوئ، د کمزورو خلکو سره مرسته کوئ او د هغوی ټولو سره د صبر څخه کار اخلئ.

¹⁵ ګورئ، په تاسو کې دې هېڅوک د هېچا سره د بدو په بدل کې بدي نه کوي، بلکې کوښښ کوئ چې تل یو د بل سره او د ټولو خلکو سره نېکي وکړئ.

¹⁶ تل خوشحاله اوسئ.

¹⁷ هر وخت دعا کوئ.

¹⁸ په هر حال کې د خدای شکر کوئ، ځکه چې دا ستاسو دپاره چې د عیسی مسیح سره تړاو لرئ، د خدای رضا ده.

¹⁹ د روح القدس د کار مخه مه نیسئ.

²⁰ د پیغمبرانو کلام ته په سپکه سترګه مه ګورئ،

²¹ بلکې هرڅه وازمایئ او کوم څه چې ښه وي په هغه باندې عمل وکړئ.

²² د هر ډول بدیو نه ځان لېرې ساتئ.

²³ خدای چې د سولې او سلامتۍ سرچینه ده، هغه دې تاسو په پوره توګه پاک کړي او ستاسو ټول روح، ځان او بدن دې زمونږ د څښتن عیسی مسیح د راتګ په وخت کې بې عیبه وساتي.

²⁴ خدای چې تاسو ځان ته رابللي یئ، د باور وړ دی او هغه به دا کار وکړي.

²⁵ ای خویندو او ورونو! زمونږ دپاره هم دعا وکړئ.

²⁶ ټولو ایماندارانو ته سلامونه ووایئ او په پاکه مینه هغوی ښکل کړئ.

²⁷ زه تاسو ته د څښتن په نوم حکم کوم چې دا لیک ټولو خویندو او ورونو ته ولولئ.

²⁸ په تاسو باندې دې زمونږ د څښتن عیسی مسیح فضل وي.