Isabulin 8 - Ebaibuli

Loka Ekapolokiton lueruos; aruo naka Gitit. Esabuli loka Daudi.

¹ Wu EJAKAIT, EkosiJAKAIT, Ejok ca ma noi ekonikiror kakwapisinei kere! Lokibwaikini aibusesukon kuju kakuj.

² Ibu kiticat agogoŋ kaituke nuka imukerun ka idwe luenakete, Kanuka lukasurupokon, Tetere itapalaari yenikasurup ka ikenyaŋan,

³ Naasesenia eoŋ akonikuj, aswam naka ikonibokoro, Elap ka aacer nukibwaikini ijo;

⁴ Inyo bo ituŋanan, tape jo ipodo ŋes? Okoku loka ituŋanan da, tape jo ianyanari ŋes?

⁵ Naarai ibu kosub ŋes nepetai arianakin ka Edeke, Itanapit ŋes aboko naka aibuses ka ayoŋio.

⁶ Isurumit ŋes aswamisio nuka akaninikon; Ibwaikinit iboro kere kwap kakejeneke:

⁷ Amerekekin kere ka imoŋin, Eebo, ka itiaŋ da luka ais;

⁸ Akweny nuka apak, iboro da luka ecor, Kere luitoritos orotin luka aŋololin.

⁹ Wu EJAKAIT, EkosiJAKAIT, Ejok ca ma noi ekonikiror kakwapisinei kere!