Isabulin 4 - Ebaibuli

Loka Ekapolokiton lueruos; koraman lukaputio. Esabuli loka Daudi.

¹ Koboŋokinoi nakeworoo, wu Edeke loka adoliteka; Ibu kocilak eoŋ apak naajar ocan: Kitimoi, kiira akailip.

² Okwe, yes isap luka ituŋa, itodolete ai aijulanakin akaibuses toma oleic? Itodolete ai amin aamameak ka aibwapit aiŋalanut? Sela.

³ Konye kojenutu ebe abu EJAKAIT elopet kotiaka yeneyoŋit ŋes: Epupuni EJAKAIT naeworoo eoŋ ŋes.

⁴ Kobwoete koyonito, sirikidiakasi: Koomoomata kotauonokus kaperitokus, kopalarito. Sela.

⁵ Koinakisi asuban nuka adolit, Komunosi da EJAKAIT.

⁶ Ejaas luipu luineras atiar, “Iŋai bo kitodikini oni ajokis? EJAKAIT, kitonyoikinoi sio aica naka akonyenekon.”

⁷ Ibu kibwaik aiyalama otauka, Adepar naiyatakinotor akimakec ka ebinokec.

⁸ Kaper kajotoor enapakina: Naarai ijo bon, EJAKAIT, kisiboikini eoŋ kainapakina.