Isabulin 3 - Ebaibuli

Esabuli loka Daudi, naakeria kama ka Abisalom oko kuke.

¹ EJAKAIT, eyatakinos cama noi lukasurupoka! Ipu lukanyoikis.

² Ipu luetemarete etauka atiar, Mam Edeke itajari ŋes. Sela.

³ Konye ijoŋ, wu EJAKAIT, irai ebukuka; Akaibuses, eketonyounon da loka akouka.

⁴ Eworoi kekaporoto mama ejai EJAKAIT; Kaboŋokini ŋesi eoŋ koukotoke lokalaunan. Sela.

⁵ Abu eoŋ kaper kajotoor; Kakweny; naarai EJAKAIT keganit.

⁶ Mam akurianar ilukumin itomon luka ituŋa, Luederakinos airigaun asurokin eoŋ.

⁷ Konyou, wu EJAKAIT; kitajarai, wu Ekadeke: Naarai inaŋanaŋ ijo lukasurupoka kere amateŋen; Ibilana ijo ikela luka ikaronok.

⁸ Erai aitajar naka EJAKAIT: Kojai akonisuliany mama ejaas ikonituŋa. Sela.