YOHAN 9 - Ao Naga C.L. Bible (BSI)

Nükpoker Ka Anebtsüba

¹ Pa oya alidang tenük poker asoba nisung ka ajuru.

² Pa nütsüngtemi pa dang asüngdang, “Tesayur, iba nisung tenük poker asotsüsa pai asü, pa tsüraburi asü, shibai temenen benshi?”

³ Yisui langzü, “Iba nisungi mesüra pa tsüraburi temenen mebenshi, saka pa dak Tsüngremer mapatem jungkai adoktsü asoshi liasü.

⁴ Anüngdang alidang ni tenyaba mapatemji asenoki inyaktsüla. Shingaia kecha meinyaktettsüsa ammang arudagi.

⁵ Ni alima nung ali tashi ni alima tesangwa.”

⁶ Pai yamaji jembir külen ali nung metzü metsü, aser metzü jagi lishi küma yanglu, aser

⁷ lishiji pa tenük nung mezütsür, pa dang ashi, “Oang, Siloam (tetezü agi, yok) tzütu nung shidokang.” Anungji pa oa shidoker ngua meyipa aru.

⁸ Anungji kiyongertem aser akhidang shiri pa meshimetsür ka ta angu, parnoki ashi, “Meshimetsüa amensang to pa masü no?”

⁹ Kari ashi, “Hau”, Tangartemi ashi, “Masü, saka mesüktur.” Nisungba jagi ashi, “Paji ni lir.”

¹⁰ Parnoki pa dang asüngdang, “Ajangla ne tenük kodaser lapok?”

¹¹ Pai langzü, “Yisu ta ajaba nisung kati lishi yanglua kü tenük nung mezütsü, aser kü dang ashi, ‘Siloami oang, aser shidokang.’ Anungji ni ao aser shidok aser ni ngua aküm.”

¹² Parnoki pa dang ashi, “Pa kong ali?” Pai ashi, “Ni memetet.”

Tanebtsüba Indang Farisitemi Bushir

¹³ Tamasa tenük tapok aliba nisungji parnok Farisitem dangi anir aru.

¹⁴ Yisui lishi yanglua pa tenük lapoktsüba anogoji Amungnü ka liasü.

¹⁵ Anungji tana Farisitemia pai koda ngua aküm ta pa dang asüngdang. Pai parnok dang ashi, “Pai kü tenük nung lishi mezütsü aser ni shidok, aser ni ngua aküm.”

¹⁶ Anungji Farisitem rongnungi kari ashi, “Iba nisung Tsüngrem nungi masü, kechiaser pai Amungnü mamshir.” Tangartemi ashi, “Temenen nisung kati koda sür ibala ama temaitsütem inyaktet?” Aser parnok rongnung telemsatep adoka liasü.

¹⁷ Anungji parnoki tanaben nükpokba dangji ashi, “Pai ne tenük lapoktsüogo aji asünung naia pa indang kechi ashir?” Pai ashi, “Paji ainkar ka lir.”

¹⁸ Saka pa tenük tapok liasü aser pai ngua aküm ta Yihuda nungertemi pa tsürabur jar parnok dang masüngdang tashi, pa indang mamang.

¹⁹ Aser parnok dang asüngdang, “Tasodang nungi tenük tapok aso ta nenoki ashiba ibai ner chir südi? Ajangla tang pai koda angur?”

²⁰ Pa tsüraburi langzü, “Ya ozü chir aser pa tenük tapok aso ta onoki metet;

²¹ saka tang pai koda angur, mesüra shibai pa tenük lapoktsü onoki memetet. Pa dang asüngdangang, pa nübu jungogo.”

²² Yihuda nunger tsübu nung pa tsüraburi yamaji shia liasü kechiaser kari danga Yisuji Khrista ta nangzükra sinagog nungi jentoktsü ta Yihuda nunger bangjemer liasü.

²³ Anungji pa tsüraburi ashi, “Pa tain lir, pa dang asüngdangang.”

²⁴ Anungji parnoki tanaben nükpokbaji aja aser pa dang ashi, “Nai ochi shiang, ibai temenen nisunga ta onoki metet.”

²⁵ Pai langzü, “Paji temenen nisung asü masü ni memetet; ni nükpoker ka liasü, saka tangbo ni angur aji dang nibo metet.”

²⁶ Anungji parnoki pa dang ashi, “Pai ne dak kechi inyak? Pai ne tenük koda lapoktsü?”

²⁷ Pai parnok dang langzü, “Ni tangang shikato koda, saka nenoki manga, kechiba nenoki tanaben anganür? Nenoka pa nütsüng kümnür asü?”

²⁸ Aser parnoki pa atalaja ashi, “Na pa nütsüng; saka onokbo Mosa nütsüng lir.

²⁹ Tsüngremi Mosa den jembi ta onoki metet, saka iba nisungibo pa kong nungiar onoki memetet.”

³⁰ Nisung jagi parnok dang langzü, “Ajangla tesüngmangtsüji yangi lir, oda pa kong nungiar nenoki memetet, aji saka pai kü tenük lapoktsüogo.

³¹ Tsüngremi temenen purtem dang mangar ta onoki metet, saka nisung ka Tsüngrem külemer lira, aser pai mulungba inyakra, pa dang Tsüngremi angar.

³² Tenük poker asoba nisung ka, pa tenükji kari lapoktsü ta ali pokli nungi nisungi kodanga mangashika.

³³ Iba nisung Tsüngrem nungi masü asübo, pai kecha meinyaktetla.”

³⁴ Parnoki pa dang ashi, “Na khenyongi temenen nung aso, aser nai onok dang sayur ama?” Aser parnoki pa jentok.

Tanela Tenük Tapok

³⁵ Parnoki pa jentokogo ta Yisui angashi, aser kodang pai paji ajuru, pai pa dang ashi, “Nai Nisung Chir dak amanger asü?”

³⁶ Pai langzü, “Kibuba, ni pa dak amangtsüsa paji shiba?”

³⁷ Yisui pa dang ashi, “Nai pa nguogo, aser shibai ne den jembidagi, ibaji pa lir.”

³⁸ Pai ashi, “Kibuba ni amanger.” Aser pai Yisu madang apudak.

³⁹ Yisui ashi, “Shiri mangur, parnoki angutsüsa aser shiri angur parnok nükpok kümdaktsütsüsa o bendangtsü asoshi ni iba limai aru.”

⁴⁰ Farisitem shir pa den liasü parnoki item oji angashir pa dang ashi, “Onoka nükpok asü?”

⁴¹ Yisui parnok dang ashi, “Nenok tenük tapok asübo, nenok dak temenen melila, saka tang nenoki ashi, ‘onoki angur;’ anungji nenok temenen maneni lir.”