YOHAN 7 - Ao Naga C.L. Bible (BSI)

Yisu Adianutemi Mamangba

¹ Iba sülen Yisui Galil lima nung senzü. Pai Yihuda lima nungji mesenzünü, kechiaser Yihuda nungeri pa tepsettsü bushi.

² Idangji Yihuda nunger Semtu Benjong anasa liasü.

³ Anungji pa adianutemi pa dang ashi, “Ne nütsüngtemia nai inyakba mapatem angutsüsa yang nungi meyipa Yihuda limai oang.

⁴ Kechiaser shibai pei sasa odia temai adokdaktsünür, pai kecha miima meinyaker. Nai itemi inyaker süra, alima tsüngdang ne sasa jungkai adokdakjang.”

⁵ Kechiaser pa adianutemia pa dak mamang.

⁶ Anungji Yisui parnok dang ashi, “Kü mapang ano matong, saka nenok mapang teti renema lir.

⁷ Alimai nenok mesempatet, saka yagi ni sempar, kechiaser iba mapatemji majung ta ni iba indang kuli agütsür.

⁸ Benjong jagi nenok tuang, nibo Benjong jagi matutsü; kechiaser kü mapang ano mabensa.”

⁹ Item o parnok dang shir, pa Galil lima nungsa ali.

Yisu Semtu Benjong Nung

¹⁰ Saka kodang pa adianutem benjong jagi tuadok, idangji odia mesüi oda miima, pa-a benjong jagi atu.

¹¹ Anungji Yihuda nungeri benjong nungji pa bushia ashi, “Pa kong ali?”

¹² Telok rongnungji pa asoshi kanga kangkokangjia liasü, kari, ashi, “Pa nisung tajung ka lir.” Ano tangar kari ashi. “Yamaji masü, telok mashileni anir.”

¹³ Aji saka Yihuda nunger tsübu nung shingaia pa indang odia mejembi.

¹⁴ Saka benjongji tom ka shi süir külen Yisui tenla kidangi tua sayumeso.

¹⁵ Anungji Yihuda nungeri süngmanga ashi, “Iba nisungi kodanga mangazük nung kechi koda tazüngba shisatsü metet?”

¹⁶ Anungji Yisui parnok dang ashi, “Ni sayuba ya kü o masü, saka ni tenyaba o lir.

¹⁷ Kari pai mulungba inyaktsü mulungra ni sayuba ya Tsüngrem o asü, ni pei sasa nungi jembir, aji pai metettsü.

¹⁸ Shibai pei sasa nungi jembir, pai pei nüngsang bushir. Joko shibai ni tenyaba nüngsang bushir paji atangji lir, ochi mashiba pa dak mali.

¹⁹ Mosai nenok nem ozüngji magütsü no? Aji saka nenok shingaia ozüngji mebenshir. Kechiba nenoki ni tepsettsü bushir?”

²⁰ Telokti-i langzü, “Ne dak mojing lir. Shibai na tepsettsü bushir?”

²¹ Yisui parnok dang ashi, “Ni mapa ka inyak, aser nenok ajaki süngmanger.

²² Mosai nenok nem temejeptokba agütsü (aji Mosa nungi masü, saka tetsü-teboutem nungi) aser amungnü nung nenoki nisung mejeptoktsür.

²³ Mosa ozüng meraksatsü asoshi amungnü nung nisung mejeptoktsü süra, amungnü nung ni nisung ka jungjunga anebtsü nung nenoki kü dang rasar ama?

²⁴ Tema tereprangtsü agi nenoki o tebendang saka ochi obendangba agi bendangang.”

Ya Khristaji Asü?

²⁵ Anungji Yirusalem nunger kari ashi, “Parnoki tepsettsü bushibato iba nisung masü no?

²⁶ Ajiangjo pai odia dang jembir aser parnoki pa dang kecha mashir. Ibai Khristaji lir ta yimsüsürtemi shitak meteta aküm südi na?

²⁷ Aji saka iba nisung ya kong nungiar asenoki metet; saka kodang Khrista arudir pa kong nungiar shingaia memetettsü.”

²⁸ Anungji Yisui tenla kidang sayudang ayimtena ashi; “Nenoki ni metet aser ni kong nungiar ajia metet; saka ni kü sasa agi maru, saka shibai ni yok pa atangji aser nenoki paji memetet.

²⁹ Ni pa metet kechiaser ni pa nungi lir; aser pai ni yok.”

³⁰ Anungji parnoki pa aputsü bushi, saka pa dak teka mai, kechiaser pa mapang ano matong.

³¹ Kechiaser telok rongnung aikati pa dak amang aser parnoki ashi. “Kodang Khristaji arudir, iba nisungi inyakba temaitsütem dang tali inyakdi ma?”

Yisu Aputsü Yokba

³² Teloki Yisu indang aji oda kangkokangjiba Farisitemi angashi; aji asü nung puti-ungertemi aser Farisitemi pa aputsü sosangtem yok.

³³ Anungji Yisui ashi, “Joko ni nenok den kenpiga dang lirbo ni tenyaba dangi aotsü.

³⁴ Nenoki ni bushitsü aser ni mangutsü aser ni kechi nung lir ajagi nenok arutsü makok.”

³⁵ Anungji Yihuda nungeri parnok o parnok na jembitepa ashi, “Asenoki pa mangutsüsa pa kongi aotsü? Pai Yihuda nunger prokshia Grik nunger den aliba dangi oa Grik nunger dang sayutsü asü?

³⁶ ‘Nenoki ni bushir, aser ni mangutsü, aser ni kechi nung lir ajagi nenok arutsü makok’ ta pai ashiba o ya kechi?”

Taküm Tzü Ayongtem

³⁷ Benjong tendinü Yisui noktak aser ayimtena ashi, “Kar tzürara, pa kü dangi arudakjang aser jemdakjang.

³⁸ Laishibai ashiba ama, ‘Shibai kü dak amangdir, pa dak nungi takümtzü ayongtem ayimtsü.’ ”

³⁹ Pa dak amangertemi agizüktsüba Tanela indang pai ya shia liasü. Kechiaser ano Tanelaji magütsüi liasü, kechiaser Yisu ano sentsü mewangshidaktsüi liasü.

Telok Rongnung Telemsa

⁴⁰ Kodang parnoki item o angashi, kari ashi, “Atangji ya ainkarji lir.”

⁴¹ Tangartemi ashi, “Ya Khristaji lir.” Saka kari ashi, “Khristaji Galil nungi adoktsü ama?

⁴² Dawid kidong nungi aser Dawid aliba Bethlehem nungi Khristaji arutsü ta Laishibai meshika ma?”

⁴³ Anungji pa indang telok rongnung telemsa adok.

⁴⁴ Parnok rongnung kari pa pua arunü, saka shingaia pa dak teka mai.

Bangdak Alirtemi Mamangba

⁴⁵ Idangji sosangtemi putiungertem aser Farisitem dangi aru shirnoki parnok dang ashi, “Nenoki kechiba pa anir maru?

⁴⁶ Sosangtemi langzü, “Iba nisungi ama kodanga nisung shingaia mejembika.”

⁴⁷ Anungji Farisitemi parnok dang ashi, “Nenoka mashileni anitaktsür asü?

⁴⁸ Yimsüsürtem mesüra Farisitem rongnung kari pa dak amang asü?

⁴⁹ Saka iba telok kobai ozüngji memetet parnok atakatem sang.”

⁵⁰ Parnok rongnung kabo Nikodima shiba akhidang pa dangi aruogo,

⁵¹ pai parnok dang ashi, “Tamasa nisungba memeteti asen ozüng agi pa bendanger asü?”

⁵² Parnoki pa dang langzü, “Na-a Galil nunger asü? Bushiang aser ajiang, Galil nungi ainkar madoker.”

⁵³ Aser parnok nisung shia pei kidangi ao.