ROM NUNGER DANGI PAUL SHITI 2 - Ao Naga C.L. Bible (BSI)

Tsüngremer Ochi Obendangba

¹ Anungji, Oh nisung, na shiba südir süaka, shibai obendanger kümdir na telangzülen maka. Kechiaser nai ne sasa na aitsür. Kechiyong nai obendanger saka naia item kasaji inyaker.

² Tang item amala inyakertem madaki Tsüngremer ochi obendangba arur ta asenoki metet.

³ Oh nisung, yamala inyakertem madaki nai o bendanger, saka itemji nai ne sasa inyaker Tsüngremer obendangba nungji jenbutsü ta nai bilemer asü?

⁴ Mesüra Tsüngrem ajungba agi na temulung meyipba leni anir ta memeteti, nai Tsüngrem ajungba aser tazüzükba aser taremzükba rongsen mezüngmeshir no?

⁵ Saka na temulung temerang aser memeyipnüsang, obendangba anogo nung kodang Tsüngremi pei ochi obendangba jungkai adoktsü aka, aji asoshi ain adokba nai ne sasa rizünger.

⁶ Tsüngremi nisung shia nem pei mapa yari agütsütsü.

⁷ Shiri taremzük nung, tajung inyakba nung, sentsüwangshi, tetushi aser tamasüba bushir, parnok nem teti taküm pai agütsütsü.

⁸ Saka bangsenertem aser shirnoki ochi dang tashi mangar, saka ochi masüba dangang tashi angar, parnok madak ain adokba aser terasaba arutsü.

⁹ Shirnoki temenen inyaker parnok ajak dangji, oda mezüngbuba nung Yihuda nunger aser Grik nunger dangi timtem tekangshi aser toushi arutsü.

¹⁰ Saka shiri tajung inyaker, tamasa Yihuda nunger aser ang Grik nunger item ajaki sentsüwangshi, tetushi aser tesünep angutsü.

¹¹ Kechiyong Tsüngrem tsüngdangbo tejak ajia inyakba maka.

¹² Kechiyong kwikati ozüng makai temenen menaogo, parnok ozüng makai samatsütsü, aser kwikati ozüng kübok temenen menaogo, parnok ozüng agi o bendangtsü.

¹³ Kechiyong Tsüngrem madang ozüng angashirtem memetendaktsür, saka ozüng benshirtem metendaktsür.

¹⁴ Kechiyong kodang ozüng makaba Bendangertemi yimya ozüngi akangba ama mapatem inyaker, parnok ozüng makai parnok pei asoshi ozüng akümer.

¹⁵ Kechiyong parnoki ozüng mapaji parnok mulungjang nung zülua aliba sayur, parnok mulungsentsüi aji kuli asür. Aser parnok tebilemba kati ka den aitsüteper mesüra tai tokteper.

¹⁶ Ni sayuba Osangtajung amato iba anogo nungji nisungtem temulungjang nung miima aliba tebilembatem ajakji Tsüngremi Yisu Khrista ajanga o bendangtsü.

Yihuda Nungertem Aser Ozüng

¹⁷ Saka nai ne sasa Yihuda nunger ta ajar, aser ozüng dak imlar; aser Tsüngrem den na tesendaktep kar ta mezümekümer.

¹⁸ Kechiaser na ozüng nung sayuteta alinung, pai mulungbaji nai metet aser tajung o majung na bendangtet.

¹⁹ Nükpoker lenir ka aser ammang nung alirtem dangi tesangwa ka ta nai amanger,

²⁰ aser tamashir metongshitsür ka aser tila tanurtem sayusang ta temulung alemer. Ozüng nungji ochi shisatsü kar ta nai metet.

²¹ Sürabang na shibai tangar dang sayur, nai ne sasa mesayur no? Mauyatsü indang nai sayutsüngir, nai auyar asü?

²² Nai nisung ka dang nüktapangta mebenshitsü ashir; aser nai kasaji benshir ama? Nai süngyanglutem sempara, tekülemdak aliba osettem nai rakzüker ama?

²³ Na shibai ozüng nung ulur nai ozüngji raksa-a Tsüngrem akhüm metsübur ama?

²⁴ Kechiaser zülua aliba amato, “Nenok asoshi Bendanger rongnung Tsüngrem tenüng atalar.”

²⁵ Kechiyong na ozüng benshir ka süra, temejeptokbaji atangji tajangzük lir, saka na ozüng raksar ka süra, ne temejeptokbaji memejeptokba ama lir.

²⁶ Anungji memejeptokbai ozüng nung aliba benshira, pa memejeptokbaji temejeptokbai ama mezüngshitsü ama?

²⁷ Aser na tezüluba ozüng aser temejeptokba ozüng raksar ka süra, aser memejeptokbai ozüng ataloktsüra, yimya agi pai naji o mebendangtsü no?

²⁸ Kechiyong shiba tema agi Yihuda nunger masü; mesüra tema shi nung mejeptokba temejeptokba masü,

²⁹ saka shiba telung nung Yihuda nunger, pa Yihuda nunger; aser temejeptokba tezüluba ozüng nung masü, saka temulung aser tanela nung lir. Aser ibala nisung tenüngsangji nisung nungi masü, saka Tsüngrem nungi lir.