MATHI 8 - Ao Naga C.L. Bible (BSI)

Zütsüra Aketer Ka Meshitettsüba

¹ Kodang Yisu tenem nungjagi alu, telok jenti pa sülen anitak.

² Aser ajiang, zütsüra aketba nisung ka pa dangi arua apudaka ashi, “Kibuba, nai mulungra nai ni merüka kümtsütet.”

³ Yisui pa teka songtok aser pa dak kongshia ashi, “Ni mulunger; na meshitetang.” Idangyongjisa pa zütsüra nungi meshiteta aküm.

⁴ Yisui pa dang ashi, “Nai ya shinga danga teshi, saka oang aser nesasa putir dang sayuang; aser na anepba kuli asütsü asoshi parnok dang Mosai melaba ama tenla agüjang.”

Noklang Madak Tanishir Kilir Anebtsüba

⁵ Kodang Yisu Kapernaumi ait noklang madak tanishir ka pa dangi arua mepishia ashi,

⁶ “Kibuba, kü kilir togimra agi shiranga aser kanga kangshia, kidang ontaka lir.”

⁷ Yisui pa dang ashi, “Ni arur pa anebtsütsü.”

⁸ Noklang madak tanishibai langzü, “Kibuba, na kü kilempoki aittsü ni metemsü, saka oji dang shiokang, aser kü kilir aneba adoktsü.

⁹ Kechiaser nia bangdak kübok aliba nisung ka lir, aser kü kübok temerangertem lir. Ni pa dang ashir, oang, aser pai aor; aser tangar ka dang ashir, arung, aser pai arur; aser kü kilir dang ashir, ya inyakang, aser pai aji inyaker”

¹⁰ Kodang Yisui ya angashi, pai süngmang aser pai tanitakertem dangji ashi, “Ni nenok dang züngpong shidi, iba ama tamang tulu Israel rongnung ni kecha nunga munguka.

¹¹ Ni nenok dang ashir, anüdoklen aser anüolen nungi aika arutsü aser Abraham, Isak aser Yakob den kotak yimli nung parnoki amentsü.

¹² Saka Yimli senmang amangtsü purtemjibo tezülen tammang nungji enoktsü; yangji tajepba aser tepu shitepba alitsü.”

¹³ Yisui noklang madak tanishiba dangji ashi, “Kidangi oang, nai amangba ama, aji na asoshi inyaktsü”. Aser kilirji iba mapang nungji anebadok.

Yisui Nisung Aika Anebtsüba

¹⁴ Kodang Yisu Peter-er kidangi aru, pai Peter kinungtsü tetsü ramen agi shiranga angu.

¹⁵ Yisui la teka nung amet aser ramen jagi la toktsü; aser lai shishir Yisu nem awazüa agütsü.

¹⁶ Kodang nikongtsütsü aküm, parnoki pa dangi temenen tanelatem agi apuba nisung aika anir aru; aser Yisui temenen tanelatemji o ka agi aridok, aser shirangertem ajak pai anebtsü.

¹⁷ Ibai Isaia ainkari jembiba o ya ataloktsü asoshi liasü; “Pai asen mokokmintem bener oadok aser asen tashitaktem anebtsü.”

Yisu Sülen Anitaktsüpurtem

¹⁸ Kodang Yisui pa meketa telok jenti angu, pai tzüyim külen jagi aotsü ozüng agütsü.

¹⁹ Aser tezülur kati arua pa dang ashi, “Kibuba, na kolenisa odir ni ne sülen anitaktsü.”

²⁰ Yisui pa dang ashi, “Shirongtem lungki kar, aser anüng ozütem tesep kar; saka nisung Chir tekolak atalokdak maka.”

²¹ Aser nütsüng rongnung tangar kati pa dang ashi, “Kibuba, ni tamasa or kübu aremtsü melaangma.”

²² Saka Yisui pa dang ashi, “Kü sülen anitakang, aser tasürtemi pei tasür aremtsü tokjang.”

Yisui Tzüsem Süngjemdaktsüba

²³ Kodang Yisu rong kati ai, nütsüngtemi pa sülen anitak.

²⁴ Aser ajiang, tzüyim nungji tzüsem ka adoka rongji mobangya liasü, saka Yisubo ayipjanga mejanga liasü.

²⁵ Nütsüngtemi Yisu dangi arua pa mesoa ashi, “Kibuba, onok kümzükang; onok tesamar!”

²⁶ Yisui parnok dang ashi, “Kechiba nenoki tsübur; Oh nenok tamang tila akartem?” Idangji pai shishi aser mopung o tzüsemji arütsü, aser tesüngjem tulu liasü.

²⁷ Aser nisungtemi süngmanga ashi, “Mopung aser tzüsemia tashi angatsüba ya kechi amala nisung ka?”

Gadara Nung Temenen Tanela Agi Apuba Nisung Ana Yisui Anebtsüba

²⁸ Yisui Gadara linük tzüyim külen jagi arudang, temenen tanelai apuba nisung ana leper nungi adoker pa den ajurutep. Parnok kanga tesashi asünung nisung shingaia iba lenmang jagi mesüitet.

²⁹ Aser ajiang, parnoki ayimtena ashi, “Na onok den kechi inyaktsü aka? Oh na Tsüngrem Chir? Mapang matongdang onok kangshitsü yagi aru no?”

³⁰ Tang parnok nungi tatsüka pila or ak lokti ka chiyimya liasü.

³¹ Temenen tanelatem jagi Yisu dang mepishia ashi, “Nai onok aridokra onok ak lokti dakji idakjangma.”

³² Yisui parnok dang ashi, “Oang.” Anungji parnok adok aser ak lokti dak jagi ai. Tang ak lokti ajongaji tzüyimküm lungren jagi asemjena alu aser tzü nung arakset.

³³ Idangji parnok pokyimertem ajen aser yimti jagi ao. Idakji parnoki tatalokba ajak indang aser talisa temenen tanelatem agi apuba indangji sangoktsü.

³⁴ Aser ajiang, yimer ajaki Yisu den ajuruteptsü adok, aser kodang parnoki pa ajuru, parnoki pa arrtsü nungi yakta oadokang ta Yisu dang mepishi.