MATHI 7 - Ao Naga C.L. Bible (BSI)

Tangar O Bendangba Indang

¹ “Nenok anema o mebendangtsüsa nenoki o tebendang.

² Kechiaser kechi obendangba agi nenoki o bendangdir nenoka yamaji o bendangtsü, aser kechi touzükba agi nenoki ozüktsüdir iba kasa nenok nema ozüktsütsü.

³ Kechiba nai pei tenük nung aliba anak tuluji mungui yur ne adianu tenük nung aliba anak tilaji ajir?

⁴ Mesüra ne tenük nung anak yur, ‘ni ne tenük nungi anak endoktsüdi’ ta nai ne adianu dang koda ashitsü?

⁵ Anemsüba, na pei tenük nungi tamasa anakji agiteta endokang, aser idangji ne adianu tenük nungi anakji endoktsütsü nai akoktsü.

⁶ Kechi temeshi lir aji azütem nem tagütsü, aser aktem matsüngdang nenok berem teyutsü, ashiko itemji parnoki tetsüng kübok ajemshitsü aser meyiper nenok shisatsütsü.

Meshiang, Bushiang, Akoshiang

⁷ “Meshiang, aser aji nenok nem agütsütsü, bushiang, aser nenoki angutsü, akoshiang, aser aji nenok nem lapoktsütsü.

⁸ Kechiaser temeshir shiai angur aser shibai bushir pai angur, aser shibai akoshir pa nem aji lapoktsütsü.

⁹ Mesüra pei jabasoi amtsük ka meshi nung, pa nem lung ka agütsütsü;

¹⁰ mesüra pai ango ka meshi nung, pa nem per ka agütsütsü, nenok rongnung nisung shiba lir?

¹¹ Ajangla nenok mejungia nenok chir nem sempet tajung agütsütsü nenoki metetra, kotak nung aliba nenok Tebui pa dang meimertem nem oset tajung koda tali magütsütsü?

¹² Anungji nisungtemi nenok nem kechisa inyakdaktsünür, yamaji nenokia parnok dang inyakang; kechiaser ozüng aser ainkar o ibai lir.

Süngkhümbong Temesüba

¹³ “Süngkhümbong temesüba jagi iang, kechiaser tesamadaki aniba süngkhümbongji sademsademer aser lenmangji temela aser iba lenmang jagi air aika dang.

¹⁴ Saka taküm leni aniba süngkhümbongji temesü aser lenmangji tasak aser aji agi iteter ishika dang.

Pei Süngjang agi Süngdongji Meteter

¹⁵ “Tiyazü ainkartem, shiri nenok dangi san sobutsü sobur arur, saka telunglen tesashi tsünü lir, parnok asoshi kümdangang,

¹⁶ Parnok süngjangtem agi nenoki parnok metettsü. Nisungi ayidong nungi tsükmenatzü süshia, küyilakso nungi munguzünu süshia aonger ama?

¹⁷ Anungji süngdong, tajung shia nung süngjang tajung atanger; saka süngdong tamajung nung süngjang tamajung atanger.

¹⁸ Süngdong tajung nung süngjang tamajung atangtsü makok. Mesüra süngdong tamajung nung süngjang tajung atangtsü makok.

¹⁹ Koba süngdong nungsa süngjang tajung metanglir aji lepzüker aser mi nung enoker.

²⁰ Anungji parnok süngjang jagi nenoki parnok metettsü.

Ni Nenok Kodanga Memetet

²¹ “Kü dang ‘Kibuba, Kibuba’ ta ajar shiai kotak yimli aitsü makok; saka shibai kotak nung aliba kü Bui mulungbaji inyaker paji dang aitsü akok.

²² Iba anogo nungji aikati kü dang ashitsü, ‘Kibuba, Kibuba, onoki ne tenüng nung meshinka ma, aser ne tenüng nung temenen tanelatem maridoka ma, aser ne tenüng nung yinket mapa tulu aika meinyaka ma?’

²³ Idangji ni parnok dang metetdaktsütsü, ‘Ni nenok kodanga memetet; nenok tamajung inyakertem, ni nungi oadokang.’

Teyangerdak Kimung Ana

²⁴ “Anungji shibaisa kü o itemi angashir, aser inyaker pa lungma nung ki asüba shisa taka nisung ka mesüka lir.

²⁵ Tzünglu alu, tzümetsüng adok, mopung aon, aser item jagi iba ki dakji nungshi; aser ibaji melao, kechiaser ibaji lung manung azüng.

²⁶ Shibaisa kü o itemi angashir aser meinyaker pa lisem ma nung ki asüba tamashi nisung ka mesüka alitsü.

²⁷ Tzünglu alu, tzümetsüng adok, mopung aon, aser item jagi iba ki dakji nungshi, aser iba kiji lao aser iba laobaji tulu liasü.”

²⁸ Yisui item o jembimar külen teloki pai sayuba nungji süngmang.

²⁹ Kechiaser pai parnok dang tezülurtem ama masü, saka bangdak aketba nisung ka ama sayua liasü.