MATHI 22 - Ao Naga C.L. Bible (BSI)

Kiyir Benjong agi O-entepba

¹ Yisui tanaben parnok den o-entepba agi jembi.

² “Kotak Yimliji chuba kati pei chir asoshi kiyir benjong ka renemba mesüker.

³ Tejaokertem benjong jagi arung ta ajatsü asoshi pai pei kilirtem yok, saka parnoki maru.

⁴ Ano pai tanüngba kilirtem yoka ashi, ‘Tejaokertem dang shiang, kü benjong renema kar, kü nashi pungchi aser tejepketba shirurutem tepseta kar; oda kechisarena renema kar. Kiyir benjongi arung.’

⁵ Saka parnoki temulung magütsüi oadok. Ka pei lui ao, aser ka pei shishidaki ao,

⁶ aser tanüngbatemi pa kilirtemji atsüa arua, mezüngmeshi asü aser parnok tepset.

⁷ Idangji chubaji ain adok; aser pai pei temerangertem yok, aser nisung tepsetertemji samatsü aser parnok yimti rongtoktsü.

⁸ Idangji pai pei kilirtem dang ashi, ‘Kiyir benjong renema lir, saka tejaokertem metemsü.

⁹ Anungji nenoki tongtibang lenjemi oang, aser nenoki ajuruba ajak benjongi jar arung.’

¹⁰ Anungji kilirtemji lentitemi ao aser tajung majung na kwika parnoki ajuru item ajakji anir aru; aser kiyir kiji aener agi asüng.

¹¹ Saka tesentepertem ajidangtsü chubai aidang, idakji kiyir sü mabenba nisung ka pai angu.

¹² Chubai pa dang ashi, ‘Temba, kiyir sü mabeni kodaser na yagi aru?’ Aser pai koda mesüi ali.

¹³ Idangji pai kilirtem dang ashi, ‘Pa tetsüng-teben alenang aser kimalen tammangdak ajungdokang. Idakji tajepba aser tepu shitepba alitsü.’

¹⁴ Kechiaser aika ajar saka ishika dang shimteter.”

Kaisar Nem Ali Melen Agütsüba

¹⁵ Idangji Farisitemi oa pai jembiba o nung koda aputsü ta tasa asa.

¹⁶ Parnoki pei nütsüngtem den oa Herod nütsüng kar dena Yisu dangi yoka ashi, “Tesayur na ochishir, aser nai ochi nung Tsüngrem lenmang sayur, aser shinga metsübur ta onoki metet; kechiaser nai nisung jak merepranger.

¹⁷ Anungji Kaisar nem alimelen agütsütsü tim asü masü? Nai kechi bilemer? Onok dang shiang.”

¹⁸ Saka Yisui parnok tamajungba tasaji meteta ashi, “Anemsübatem, nenoki kechiba ni atitanger?

¹⁹ Alimelen sen ka kü dang sayuang.” Aser parnoki adholi ka Yisu dangi bener aru.

²⁰ Yisui parnok dang ashi, “Ya shiba noksa aser tenüng züluba?”

²¹ Parnoki pa dang ashi, “Kaisar.” Idangji Yisui parnok dang ashi, “Ajangla kechi Kaisar meyong aji Kaisar nem agüjang; aser kechi Tsüngrem meyong aji Tsüngrem nem agüjang.”

²² Aser parnoki aji angashidang süngmang, aser pa toktsür oadok.

Shia Aruba Indang Tasüngdangba

²³ Iba anogo nungji tasürtem shia marutsü ta jembiba Sadukitemi pa dangi arua asüngdanga ashi,

²⁴ “Tesayur, nisung kati techir meli-i süadokra tenui pa kibutsü agitsü, aser pa asoshi metsü adokdaktsütsü, ta Mosai ashi.

²⁵ Tang onok rongnung adianu tenet liasü. Aser mezüngbubaji ki yimer asü, aser metsü meli-i pa kinungtsü pei tenu nem toktsü.

²⁶ Iba amaji ano tanabuba, aser tasembuba, aser tenetbuba tashi dak atalok.

²⁷ Aser parnok ajak sülen tetsürji asü.

²⁸ Anungji shia arudang tenet rongnungji la shiba kinungtsü alitsü? Kechiaser parnok ajaki la agi.”

²⁹ Saka Yisui parnok dang ashi, “Laishiba mesüra Tsüngrem tashi nenoki memetet nung jimir.

³⁰ Kechiaser tanaben shia arudang parnoki ki mayimer, mesüra kiyi meyoker, saka kotak nung tenyartem ama lir.

³¹ Saka tasürtem shia aruba indang Tsüngremi nenok dang jembiba,

³² Ni Abraham Tsüngrem, Isak Tsüngrem aser Yakob Tsüngrem, ya nenoki mezüngdang no? Tsüngremji tasürtem Tsüngrem masü, joko akümlir Tsüngrem lir.”

³³ Ya angashia teloki pai sayuba nung süngmang.

Ozüng Tulutiba

³⁴ Saka pai Sadukitem ola madoki kümdaktsüba angashidang, Farisitemi külemi sentep.

³⁵ Parnok rongnung ozüng metetba kati pa atitanga asüngdang,

³⁶ “Tesayur, ozüng rongnung koba tulutiba asütsü?”

³⁷ Pai pa dang ashi, “Ne taküm ajak agi, ne tanela ajak agi aser ne mulungsentsü ajak agi nai Kibuba ne Tsüngrem meimang.

³⁸ Ya tulutiba aser mezüngbuba temelaba ozüngji lir.

³⁹ Ibai mesüka tanabubaji ya lir, ‘Nai ne kiyonger pei ama meimang.’

⁴⁰ Item temelaba ozüng ana dak ozüng ajak aser ainkar o ajak itaka lir.”

Khrista indang Tasüngdangba

⁴¹ Kodang Farisitem külemi sentep, Yisui parnok dang asüngdang,

⁴² “Nenoki Khrista indang kechi bilemer? Pa shir chir?” Parnoki pa dang langzü, “Dawid Chir.”

⁴³ Idangji pai parnok dang ashi, “Ajangla, tanela nung, Dawidi pa dang Kibuba ta ajar, ta shia aliba ama,

⁴⁴ ‘Kibubai kü Kibuba dang ashi, ni ne tsükchirtem ne tetsüng kübok mayu tashi, na kü teka tajichilen menang.’

⁴⁵ “Dawidi pa dang Kibuba ta jarabang, ajangla pa koda par chir asütsü akok?”

⁴⁶ Aser shingaia pa dang o kata melangzütet, aser iba anogo nungjagi shingaia pa dang asüngdangtsü temulung moulutet.