MATHI 2 - Ao Naga C.L. Bible (BSI)

Tashi Temetetertemi Semdangba

¹ Tang Herod chuba tensa nung Yihuda lima nung aliba Bethlehem nung kodang Yisu aso, ajiang, anüdoklen nungi tashitemetetertem Yirusalemi aru,

² aser asüngdanga ashi, “Yihuda nunger chuba soa alibaji kong ali? Kechiyong onoki pa petinu anüdoklen adoka angu aser pa külemtsü aru.”

³ Kodang Herod chubai o ya angashi, pa den Yirusalem nunger ajak aoksadok.

⁴ Pai putiunger aser tezülur ajak külemi ayongten aser Mesiaji kong asotsü ta parnok dang asüngdang.

⁵ Parnoki pa dang ashi, “Yihuda lima nung aliba Bethlehem nung; kechiaser ainkari yamai zülua lir.

⁶ “Na Yihuda lima nung aliba Bethlehem, Yihuda yimsüsürtem rongnung na kodaka-ang tilatiba masü; kechiaser na nungi yimsüsür ka adoktsü, shibai kü nübur Israel madak yimsü asütsü.”

⁷ Idangji Herodi tashitemeteter temji miima aja aser petinuji kodang adok ta parnok nungi tejangja metettsü asüngdang.

⁸ Aser parnok Bethlehemi yoka ashi, “Oang aser tanur indangji kümdanga nendaka bushiang, aser kodang nenoki pa ngudir, nia arua pa külemtsü asoshi kü dangi osang bener arung.”

⁹ Parnoki chuba o angashir ao, aser ajiang, tanur aliba madak tonga arur manen tashi, parnoki anüdoklen anguba petinuji parnok jakdang ao.

¹⁰ Kodang parnoki petinuji angu, parnoki kanga pelatep;

¹¹ aser parnoki kidang jagi ai aser tetsü Mari den tanurji angu. Idangji parnoki apudaka pa külem, aser parnoki senti osetlep salar pa nem hon, liangmesen, aser teronem menemba sempettem agütsü.

¹² Aser Herod madangi lepa maotsü asoshi pungmang ka nung Tsüngremi parnok songtem nung parnoki lenmang tanga kati pei limai ao.

Ijip Limai Ajenba

¹³ Parnok or külen, ajiang, Kibuba tenyar ka Yosef dangi pungmang nung adok, aser ashi, “Shishiang, tanur o tetsü na anir Ijip limai jenang aser ni ne dang mashi tashi yangji liang; kechiaser Herodi tanurji tepsettsü bushitsü.”

¹⁴ Idangji pai shishi, aser tanur o tetsü na anir ammang nung Ijipi aenshia ao;

¹⁵ aser Herod masü tashi yangji liasü. Anungji ainkar ajanga Kibubai kechi jembi aji yamai atalok: “Ijip lima nungi ni kü jabaso jatet.”

Kinü Tanurtem Tepsetba

¹⁶ Idangji tashitemetetertemi pa külakoktsüogo ta Herodi meteta, pai jashia ain adok, aser Bethlehem nung, tashitemetetertem nungi angazükba mapang apir, pai ozüng agüja tebur chanu küm ana aser tekübok rogo ajak tepsetdaktsü.

¹⁷ Anungji Yerimia ainkari shinba ya atalok,

¹⁸ “Rama nung ola ka angashi, oda jebtepba aser mangyimba tulu; Racheli pei chirtem asoshi ajeb, aser parnok mali nung lai mesüngzüknü.”

Ijip Nungi Shilangba

¹⁹ Saka kodang Herod asü, ajiang, Ijip lima nung Yosef dangi Kibuba tenyar ka pungmang nung adok,

²⁰ aser ashi, “Shishiang aser tanur o tetsü na anir Israel limai oang, kechiaser shiri tanur takümji bushi parnok süogo.”

²¹ Idangji pa arameso aser tanur o tetsü na anir Israel limai aru.

²² Saka Yihuda nung Arkeleoi pei tebu Herod melen yimsü südagi ta angashir pa ajagi aotsü tsübua liasü; aser pungmang nung Tsüngremi songtem nung, pai Galil limai meyip;

²³ aser pa Nazaret nunger ta ajatsü, ibai ainkartemi shinba ataloktsü asoshi, pa arur Nazaret ta ajaba yimti nung ali.