MATHI 16 - Ao Naga C.L. Bible (BSI)

Temaitsü Ka Meshiba

¹ Farisitem aser Sadukitem aru aser Yisu atitanga anüng nungi temaitsü ka sayuang ta parnoki pa dang asüngdang.

² Saka Yisui parnok dang langzü, “Nikongtsütsü arudang nenoki ashir, tsüngsang ajungtsü, kechiaser anüng merema lir.

³ Aser anepdang, tanübo tsüngsang majungtsü, kechiaser anüng merema mepet süloka lir. Nenoki anüng tereprangtsü ratettsü akoker, saka temaitsü mapangtem nenoki meshiteter.

⁴ Tamajung aser nüktapangta putui temaitsü bushir, saka Yona temaitsü dak alema parnok nem kecha temaitsü magütsütsü. Aser pai parnok toktsür oadok.”

Farisitem Aser Sadukitem Piyazü

⁵ Nütsüngtemi tzüyim külen jagi aru aser parnoki amtsük abentsü amadok.

⁶ Yisui parnok dang ashi, “Farisitem aser Sadukitem piyazü asoshi mita liang.”

⁷ Parnoki parnok rongnung jembitepa ashi, “Asenoki amtsük kecha maben.”

⁸ Yisui aji meteta ashi, “Oh tera amangertem nenok amtsük maka nung kechiba nenok rongnung jembiteper?

⁹ Tang tonga nenoki mangateter no? Mesüra amtsük pungu agi meyi pungu chir nenoki molok kwi shitenar nenoki mebilemteter no?

¹⁰ Ano amtsük tenet agi meyi pezü chir, nenoki molok kwi shitenar mebilemteter no?

¹¹ Ni nenok dang amtsük indang mashi ta nenoki mangateter? Saka Farisitem aser Sadukitem piyazü indang kümdangang.”

¹² Idangji pai amtsük piyazü indang masü, saka Farisitem aser Sadukitem tesayuba indang kümdangang ta ashiba parnoki angatet.

Peteri Yisu Nangzükba

¹³ Kodang Yisu Kaisaria Filipi limai aru pai pei nütsüngtem dang asüngdang, “Nisungtemi Nisung Chir shiba-a ta ashir”

¹⁴ Aser parnoki langzü, kari ashir, “Yohan Baptitsüba ta,” tangar kari ashir, “Elija ta,” aser ano tangar kari, “Yerimia mesüra ainkartem rongnung ka” ta ashir.

¹⁵ Yisui parnok dang ashi, “Saka nenoki ni shiba-a ta ashir?”

¹⁶ Simon Peteri langzü, “Na taküm Tsüngrem Chir Khristaji lir.”

¹⁷ Idangji Yisui pa dang langzü, “Yona chir Simon, na tepelatsü, kechiaser shi aser azüi ya ne dang rakpoka mesayu, saka kotak nung aliba kü Bui sayu.”

¹⁸ Aser ni ne dang shidi, “Na Peter aser iba lung manung ni kü arogo yangertsü; aser tasüba; aintemi ibaji makoktsü.

¹⁹ Ni ne nem kotak yimli süngkhümrütsü agütsütsü; aser nai alima nung kechisa alendir aji kotak nunga alentsü, aser nai alima nung kechisa saladir aji kotak nunga salatsü.”

²⁰ Idangji paji Khrista ta shinga danga teshi ta pai pei nütsüngtem dang ajang ajanga ashi.

Yisui Pa Asütsü Aser Shia Arutsü Indang Ashiba

²¹ Yisu Yirusalemi aotsüla aser tamburtem, puti-ungertem aser tezülurtem nungi timtem toushi jenti angutsüla, aser tepsettsüla aser asemnübuba nung shia arutsüla ta pai iba mapang nungjagi nütsüngtem dang sayutsü tenzük.

²² Idangji Peteri Yisu anien aser pa arütsümesoa ashi, “Tsüngremi aji nokdangangma, Kibuba, ya ne dak kodanga mataloktsü.”

²³ Yisui meyiper Peter dang ashi, “Kü sülen atsüngzükang, Satan, na ni asoshi temetsüdaktsü ka lir, kechiaser ibai Tsüngrem indang bilemba nungi masü, saka nisung mapa indang bilemba nungi arur.”

²⁴ Idangji Yisui pei nütsüngtem dang ashi, “Kari kü sülen arunüra pai pei sasa azüokang, aser pei kangki apur kü sülen anitakang!

²⁵ Kechiaser shibai pei taküm kümzüknür aji samatsü saka shibai ni atema pei taküm samadir aji angutsü.

²⁶ Kechiaser nisung kati alima ajak ajangzüker pei taküm samara, pai kechi ajangzüktsü, mesüra nisung kati pei taküm melen kechi agütsütsü.

²⁷ Kechiaser Nisung Chir pei Tebu sentsüwangshi nung pei tenyartem den arutsü aser idangji pai nisung shia mapa yari sempet agütsütsü.

²⁸ Ni nenok dang züngpong ashir, yangi noktaka alir rongnung kari, Nisung Chir pei yimli nung aruba mangu tashi tasü marok kodaka-ang mejemdangtsü.”