MATHI 15 - Ao Naga C.L. Bible (BSI)

Tsüraburtem Yimsü-yimbong

¹ Idangji Farisitem aser tezülurtem Yirusalem nungi Yisu dangi arua ashi,

² “Kechiba ne nütsüngtemi tsüraburtem yimsüyimbong alemer? Kechiaser parnoki chi chiyungdang parnok teka memetsüker?”

³ Yisui parnok dang langzü, “Kechiba nenokia nenok yimsü-yimbong atema Tsüngrem ozüng raksar?

⁴ Kechiaser Tsüngremi ashi, ‘Nebu aser netsü akhüm tsübuang, shibai pei tebu mesüra tetsü anema tamajung jembidir, pa sülanglang.’

⁵ Saka nenoki ashir, teyari kechi nenoki ni nungi ngula, aji Tsüngrem atema sempet lir ta nisung kati pei tebu mesüra tetsü dang shira pai pei tebu akhüm tsübutsü tenüngdaktsü maka.

⁶ Aji oda nenok yimsü-yimbong meji nung nenoki Tsüngrem o amajok kümdaktsür.

⁷ Anemsübatem, Isaiai nenok indang shitak yamai shina kar:

⁸ ‘Iba puri tebang agi ni akhüm tsübur, saka parnok mulungjang ni nungi talangka pila-a lir.

⁹ Parnoki nisunger tzüzüng-ozüngtemji tesayubatem ama sayua, parnoki amajok nung ni külemer!’ ”

Nisung Ka Menentsübatem

¹⁰ Aser Yisui telok pa dangi ja-a parnok dang ashi, “Angang, aser angatetang!

¹¹ Tebangi kechi air aji agi nisung menentsür masü; saka kechi tebang nungi adoker aji agi nisung menentsür.”

¹² Idangji nisungtemi arua pa dang ashi, “Iba o angashidang Farisitem jashi ta nai meteter ma?”

¹³ Saka Yisui langzüa ashi, “Kechi tsünütsüsa kotak nung aliba kü Bui metsünü, aji atsüdoktsü.

¹⁴ Parnok oda tokjang, parnok nükpoker lenirtem lir. Aser nükpokeri nükpoker anirabang, anaprongla kangla nung asongtsü.”

¹⁵ Peteri langzüa pa dang ashi “Iba o-entepba tetezü onok dang rateta shiang.”

¹⁶ Aser Yisui ashi, “Nenokia ano mangateter no?

¹⁷ Tebangi kechi air, aji tepoki ia metsümeshidaki oa endoker, aji nenoki meshitet no?

¹⁸ Saka kechi tebang nungi adoker, aji temulungjang nungi adoker aser iba jagi nisung menentsür.

¹⁹ Kechiaser nisung mulungjang nungi shisatsü tamajung, nisung tepsettsü, nüktapangta, jabujari, auyatsü, tiyazü kuli aser Tsüngrem atalatsü adoker.

²⁰ Aser item jagi nisung menentsür. Saka teka memetsüki chiyungba agi nisung memenener.”

Kanantsür Ka Tamang

²¹ Aser Yisui yang nungjagi Tair aser Sidon limai ao.

²² Aser ajiang, Kanantsür ka iba lima nungjagi arua ayimtena ashi, “Oh Kibuba, Dawid Chir, kü dang aochiang; kü jala temenen tanela agi kanga kangshia lir.”

²³ Saka pai la dang o kata melangzü. Idangji pa nütsüngtemi pa dang mepishia ashi, “La yokadokang, kechiaser lai asenok sülen ayimtener.”

²⁴ Saka pai langzü, “Israel temadokba santem dangi dang ni yok.”

²⁵ Saka lai arua pa dang külema ashi, “Kibuba, ni yariang,”

²⁶ Idangji pai langzü, “Tanur chiyungtsü bena arur azütem madang endoktsü tim masü.”

²⁷ Saka tetsür jagi langzü, “Hau, Kibuba, saka azütemia pei kibur langbang nungi tsükba tanüktaribo achir.”

²⁸ Idangji Yisui langzü, “Oh tetsür, ne tamang tulu lir; nai aginüba amaji ne dang inyakang.” Idangji la jala iba mapang nungjagi anebadok.

Nisung Aika Anebtsüba

²⁹ Yisui yang nungjagi pila aser Galil tzüyim anasai aru, aser pai tenem jagi atu aser idakji amen.

³⁰ Tsüngtsükertem, nükpokertem, suwar, tetsüng teka lemtartem aser tangar aika den telok jenti pa dangi aru. Aser teloki Yisu tsüngdang parnokji yutsü. Aser pai parnok anebtsü.

³¹ Anungji suwartemi o jembitetba, lemtartem ajungba, tsüngtsükertemi jajatetba, aser nükpokertemi anguba kodang parnoki item ain-mapatem angu, telok jagi süngmang; aser parnoki Israel Tsüngrem tenüng asang.

Meyi Pezü Chiyungdaktsüba

³² Yisui pa nütsüngtem pa dangi aja aser ashi, “Ni telok asoshi aria bilemer, kechiaser item anogo asem tashi kü den lia aruogo aser tachitsü kecha maka. Aser parnok yaseta ni meyoknür. Ashiko parnok lenmang nung lumiadoktsü.”

³³ Nütsüngtemi pa dang ashi, “Telok patakati tepok süngdaktsütsüsa arem nung asenoki amtsük paikaji kong nungi angutsü?”

³⁴ Yisui parnok dang ashi, “Nenok amtsük kwika aka?” Parnoki ashi, “Tenet aser ango ishika.”

³⁵ Anungji Yisui telokji ali nung amentsü mela.

³⁶ Aser pai amtsük tenet aser angoji amer tenüngsang agütsür pai sangsa aser nütsüngtem nem agütsü, aser nütsüngtemi telok nem agütsü.

³⁷ Parnok ajak chir tip atem. Aser parnoki tanüngba tanüktari molok tenet sünga benden.

³⁸ Tetsür tanur mezüngi aji achiba tebur meyi pezü liasü.

³⁹ Aser pai teloktemji yoker, rongi tua Magadan arrtsüi ao.