MATHI 14 - Ao Naga C.L. Bible (BSI)

Yohan Baptitsüba Asüba

¹ Iba mapang nungji Herod Tetrarki Yisu indang jembiba osang angashi,

² aser pai pei tenzükertem dang ashi, “Ibai Yohan baptitsüba lir; pa tasü nungi shia aruogo, aser item ain mapatem pa ajanga inyaker.”

³ Kechiaser Herodi pa tenu Filip kinungtsü Herodia atema Yohan pua alener tepuokdak ayu.

⁴ Kechiaser Yohani Herod dang ashi, “Nai la agitsü tim masü.”

⁵ Aser pai pa tepsetnüa liasü saka telok tsübu, kechiaser parnoki Yohanji ainkar ka ta züngshia liasü.

⁶ Saka kodang Herod asoba anogo tonga aru, Herodia jalai telok tsüngdang tsüngsang, aser Herod peladaktsü.

⁷ Anungji lai kechi meshidir aji la nem agütsüdi ta pai azüngashia nangzük.

⁸ Aser la tetsüi ajungshiba agi lai ashi, “Yangi kü nem Yohan Baptitsüba kolak su ka nung kua.”

⁹ Idangji chubaji jashia liasü, saka pai nangzükba aser pa den chiyungdak amenertem atema aji agütsütsü pai mela.

¹⁰ Aser pai yoka tepuokdak Yohan kolak atang.

¹¹ Aser pa tekolakji su ka nung bener arua aiürla nem agütsü, aser lai aji tetsü dangi bener ao.

¹² Aser Yohan nütsüngtem arua tasü mangji bener oa arem; aser parnoki oa aji Yisu dang ashi.

Meyi Pungu Chiyungdaktsüba

¹³ Kodang Yisui ya angashi, yang nungjagi rong ka nung azüngmeyakdak tesem kati pa kija pila-a ao; aser aji teloki angashidang yimtitem nungi parnoki tetsüng agi pa sülen anitak.

¹⁴ Aser pa adokdang nisung telok tulu ka angu, aser Yisui parnok asoshi aria bilema, parnok shirangertem anebtsü.

¹⁵ Kodang nikongtsütsü atong, nütsüngtemi pa dangi arua ashi, “Ya azüngmeyakdak aser anüa luogo; yimtaki ia parnok sasa chiyungtsü alitsü asoshi telok senshidakjang.”

¹⁶ Saka Yisui parnok dang ashi, “Parnok aotsü tenüngdaktsü maka; nenoki parnok nem chiyungtsü agüjang.”

¹⁷ Parnoki pa dang ashi, “Onok yangi amtsük pungu, aser ango ana dang lir.”

¹⁸ Yisui ashi, “Itemji kü dangi bener arung.”

¹⁹ Aser pai telokji ai manung amentsü mela; aser pai amtsük pungu aser ango anaji amer, anünglen repranga pai moatsü aser amtsükji sangsa-a pa nütsüngtemi telok nem agütsü.

²⁰ Parnoki chir tip-atem aser tanüngba tanüktari agi molok terana sünga parnoki benden.

²¹ Aser chiyungertem tetsür tanur mezüngi, tebur meyi pungu shi liasü.

Tzüma Nung Jajaba

²² Pai teloktem senshidaktsüdang, pei nütsüngtem rong kati tudaktsü aser pa dang tamasa tzü külen jagi odaktsü.

²³ Aser pai teloktemji senshidaktsür külen pa kija sarasademtsü tenem kati atu. Nikongtsütsü akümdang yangji pa kija liasü.

²⁴ Saka tang joko rongji tzüyim tiyong tongya liasü aser tzüsem agi meyipshidakja liasü, kechiaser mopungji tejaklen nungi aon.

²⁵ Ankongpang nung Yisu parnok dangi tzüyim ma nung jaja-a aru.

²⁶ Kodang nütsüngtemi pa tzüyim ma nung jajaya angu, parnoki aoksa-a ashi, “Yabo tanela ka asütsü” aser parnoki tetsübu agi ayimten.

²⁷ Saka idangji Yisui parnok dang jembia ashi, “Tasü itang; niar tetsübu.”

²⁸ Peteri Yisu dang langzüa ashi, “Kibuba, ya na süra ni ne dangi tzüma nung jaja-a arutsü mela-ang.”

²⁹ Aser pai ashi, “Arung.” Aser Peter rong nungi alu, aser Yisu dangi aotsü asoshi tzüma nung jaja.

³⁰ Saka kodang pai mopungji angu, pai tsübu aser tzü telungi aitsü tenzükdang, pai ayimtena ashi, “Kibuba, ni kümzükang.”

³¹ Aser idangyongji Yisui pei teka songtoka pa dak ameter, pa dang ashi, “Oh na tamang tila, kechiba nai atitaker?”

³² Kodang parnok rongi atu, mopungji anenadok.

³³ Aser rong nung alirtemi pa dang külema ashi, “Atangji na Tsüngrem Chir.”

Gennesaret Nung Shiranger Anebtsüba

³⁴ Parnoki tzü atena or Gennesaret lima atong.

³⁵ Kodang idakji aliba nisungtemi pa ajitet, parnoki iba linük temeket ajakleni yoka shiranger ajak pa dangi aniten.

³⁶ Aser parnoki pa sü sütsüng nung danga kongshidi ta pa dang mepishi. Aser kwikati kongshi parnok ajak anebadok.