MATHI 13 - Ao Naga C.L. Bible (BSI)

Metsü Proker Agi O-entepba

¹ Iba anogo nungji Yisui kidang nungi tugu aser tzüyim küm nung amen,

² aser pa dangi telok tulu senten, anungji pai rong kati ai aser idakji amen. Aser telok ajakji tzüküm nung noktak.

³ Aser pai parnok dang o-entepbatem ajanga jembia ashi, “Ajiang, metsü proker ka metsü proktsü ao.

⁴ Pai prokdangji metsü kar lenmang tezü nung tsük, aser ozütem aru aser aji chima.

⁵ Metsü kar ali kanga malidak lungya nung tsük, aser ali aroka mali nung, aji yakta dang mei.

⁶ Saka kodang anü adok iba dak rongloka apu aser aji tera mali nung azüladok.

⁷ Kar ai rongnung tsük, aitemji ain aser aji moksep.

⁸ Saka metsü kar ali tajung nung tsük aser tejang noklangbena, rokerbena, semerbena atang.

⁹ Shiba tangashitsü tenarong aten pai angang.”

¹⁰ Aser Nütsüngtemi arua pa dang ashi, “Kechiba nai parnok den o-entepbatem agi jembir?”

¹¹ Aser pai langzüa parnok dang ashi, “Kotak Yimli miim o metettsü nenok nem agütsü, saka parnok nem aji magütsü.

¹² Kechiaser shiba aka, pa nem ano agütsütsü, aser pa tali akatsü aser shiba tera aka ajia pa nungi bener aotsü.

¹³ Anungji ni nenok den o-entepbatem agi jembir, kechiaser parnoki nguaka majiteter, aser angashiaka mangateter mesüra parnoki tangateta mangateter.

¹⁴ Isaiai shina alibatem ya parnok dak ataloker: ‘Nenoki atangji tangashibo angashitsü saka mangatettsü; aser nenoki atangji tangubo angutsü saka majitettsü.

¹⁵ Kechiaser iba pur mulungjang shisa ramaogo, aser parnok tenarong tangashitsü anüalema kümogo aser parnok tenük amuogo. Ashiko aji oda mesüra parnoki pei tenük agi ajitettsü; aser parnok temulungjang meyipa arutsü, aser ni parnok anebtsütsü.’

¹⁶ “Saka nenok tenük tepelatsü, kechiaser parnoki angur; aser nenok tenarong tepelatsü, kechiaser parnoki angashir.

¹⁷ Kechiaser züngpong ni nenok dang shidi, nenoki angubatem, ainkartem aser temeshipur aikati ngunüaka mangu, aser nenoki angashibaji parnoki angashinüaka mangashi.

Metsü Proker Agi O-entepba Ratettsüba

¹⁸ “Ajangla metsü proker o-entepba nenoki angang.

¹⁹ Kodang nisung kati Kotak Yimli o angashir, aser aji mangateter, idangji tamajungba arur, aser pa temulung nung kechi prok aji rakzüka aor. Kechi lenmang tezülen prok ibaji pa.

²⁰ Aser shibai oji angashir aser idangyongji tepela agi aji agizüker, ibaji lungya nung prokbaji lir.

²¹ Aji saka pa dak tera mali nung, kenpiga dang alir, aser kodang Osangtajung atema timtem tekangshi mesüra, rishikangshi adokdir, idangyongji pa metsüdaker.

²² Aser shibai oji angashir, aser alima indang shisabuluba aser rongsen penbuba agi mokseper aser pai tejang matanger, ibaji ai rongnung prokbaji lir.

²³ Aser shibai oji angashir, aser aji angateter, aser tejang tanga kar noklangbena, kar rokerbena, kar semerbena ta adokdaktsür, ibaji ali tajung nung prokbaji lir.”

Sangremer Tsük Agi O-entepba

²⁴ Pai ano parnok tsüngdang o-entepba ka yutsü, aser ashi, “Kotak Yimli nisung kati pei lu nung metsü tajung prokba mesüker;

²⁵ Saka nisungtem mejangadoker alidang, parnok tsükchir aru aser tsük rongnungji sangremer tsük proka toktsür oadok.

²⁶ Saka kodang tuo adoka meitet aser tsük tangtet, idangji sangremer tsüka adok.

²⁷ Aser kilirtemi kibur dangi arua ashi, ‘Kibuba, nai ner lu nung metsü tajung meprok ama? Ajangla sangremer tsük ya kong nungi?’

²⁸ Kiburi parnok dang ashi, ‘Tsükchir nisung kati ya inyak.’ Kilirtem jagi pa dang ashi, ‘Ajangla onok oa itemji bendendaktsünür asü?’

²⁹ Saka pai ashi, ‘Nung, ashiko nenoki sangremer tsük bendendang item denji tsüka atsüsemtsü akok.

³⁰ Aluruwa matong tashi tena külemi dang meidakjangma aser alurudang ni alururtem dang shidi, tamasa sangremer tsükji bendenang aser itemji rongtoktsü asoshi tebong küma langang, saka tsükbo ozü jendang bendenang.’ ”

Jibijang Aser Piyazü Agi O-entepba

³¹ Ano o-entepba ka pai parnok dang ashi, “Kotak Yimli jibi metsüjang ka mesüker, koba nisung kati bener arur pei lu nung prok.

³² Ibai metsüjang ajak dang tilatiba, saka kodang ya ainer tsünüsembongtsü ajak dang tuluba, aser süngdong akümer, anungji anüng ozütem aruagi iba kongsang nung alir.”

Piyazü Agi O-entepba

³³ Ano o-entepba ka pai parnok dang ashi, “Kotak Yimli piyazü mesüker, koba tetsür kati aji bena arua amzü tatakzük asem nung ajak pokraka matu tashi rema ayu.”

³⁴ Item ajak Yisui teloktem den o-entepba agi jembi, aser O-entep medeni pai parnok den kecha mejembi.

³⁵ Ainkari ashiba ya ataloktsü asoshi; “O-entepba agi ni kü bang lapokdi, lipok nungi miima akaba o ni sangdongdi.”

Sangremer Tsük Indang o-entepba Ratettsüba

³⁶ Idangji pai teloktemji toktsü aser kidangi ai, idangji pa nütsüngtem pa dangi arua ashi, “Alu nung sangremer tsük agi o-entepba tetezüji onok dang rateta shiang.”

³⁷ Yisui langzü, “Metsü tajung prokbaji Nisung chir lir;

³⁸ Aser aluji iba lima lir, aser metsü tajungji Kotak Yimli chirtem lir; aser sangremer tsükji tamajungba chirtem lir.

³⁹ Aser tsükchir shibai sangremer tsükji prok ibaji mojing lir; aser aluruwaji alima tatem lir; aser alururtemji kotak tenyartem lir.

⁴⁰ Anungji sangremer tsük bendener mi nung koda rongtoker, yamaji alima tatem nunga alitsü.

⁴¹ Nisung Chiri pei kotak tenyartem yoktsü aser pa Yimli nungi metsüdaktsüba ajak aser tamajung benshirtem ajak parnoki anitentsü.

⁴² Aser parnokji misem nung puoktsü; yangji tajepba aser tepu shitepba alitsü.

⁴³ Idangji temeshipuri pei Tebu Yimli nung anü ama sangwatsü. Shiba tenarong aten pai angang.

O-entepba Asem

⁴⁴ “Kotak Yimli alu nung senti rongsen miimba mesüker, koba nisung kati angu; aser pai tepela nung pa akaba ajak ayoker aser iba aluji alir.

⁴⁵ “Ano, Kotak Yimli berem tajung bushir shide-bener ka mesüker.

⁴⁶ Pai sen jenjang aika alangba senti berem ka angu nungji, pai oa pa akaba ajak ayoker aser ibaji ali.

⁴⁷ “Ano, Kotak Yimli tzüyim nung sang mesanger, ango tapu ajak apuba mesüker.

⁴⁸ Kodang aji asüng parnoki tzükümi atsütet, aser parnoki mener tajungtemji khu nung benden, saka tamajungtemji parnoki endok.

⁴⁹ Alima tatem nung yamaji alitsü. Kotak tenyartem arutsü, aser temeshipur nungi tamajungbapur sadangtsü.

⁵⁰ Aser parnokji misem nung puoktsü. Yangji tajepba aser tepu shitepba alitsü.

⁵¹ “Ya ajak nenoki angatetogo ma?” ta Yisui parnok dang asüngdang. Parnoki langzü, “Hau.”

⁵² Aser Yisui parnok dang ashi, “Iba tetezü tezülurtem shirsa Kotak Yimli nung nütsüng kümogo, pei akaba nungi tasen aser tejen agitetba ki kibur ka mesüker.”

Yisu Nazaret Yimtak Magizükba

⁵³ Kodang Yisui item o-entepbatem jembima, pai idak nungjagi pila-a ao.

⁵⁴ Pai pei yimtaki aru aser parnok sinagog nung parnok dang sayumeso aser parnok süngmangdaktsü. Idangji parnoki ashi, “Pai kong nungi iba shisatsü aser item ain mapatem angu?

⁵⁵ Pa süng mistri chirto masü no? Pa tetsü Mari aser pa tenu nungertem Yakob, Yosef, Simon aser Yihuda masü no?

⁵⁶ Aser pa tenu tetsürtem asenok rongnung melika ma? Ajangla pai kong nungi item ajak angu?”

⁵⁷ Aser parnoki pa dak metsütakadok. Saka Yisui parnok dang ashi, “Pei yimtak aser pei kinunger dak alema ainkar kaji taolen ajak nung nüngsang makaiang malir.”

⁵⁸ Aser parnoki mamangba ajanga Yisui yangji tashi-ain mapatem aika meinyak.