LEVI 8 - Ao Naga C.L. Bible (BSI)

Aron Aser Par Jabasotem Shimtetba

¹ Kibubai Mosa dang ashi,

² “Aron aser par jabasotem sentep süki jagi anir iang, aser putir sobutsü, temezüba totzü, temenen tenla atema nashi pungchi ka, aser san tepung ana, aser piyazü meinokba amtsük molok itemji bener arung.

³ Ano Israel nunger telok ajak jatepang.”

⁴ Kibubai melaba ama Mosai inyak, aser kodang Israel telok sentep,

⁵ pai parnok dang ashi, “Tang ni kechi inyaktsü lir, aji Kibubai melaba lir.”

⁶ Mosai Aron aser par jabasotem anir arua tzü agi parnok shitoktsü.

⁷ Aser pai Aron nem süoshi sobutsü, aser peremlen jagi pa nai, aser putir temeshi sobutsü sobudaktsür, sangra-a yangluba putir peremlen agi pai pa teperem alendang.

⁸ Pa dak teku semoksü semoktsü, aser Urim aser Thummim enoktsü.

⁹ Kibubai Mosa dang melaba amato pai kolakjen aser kolakjen tejaklen temeshitet bendanga agütsüba tetezü hon süji ataloka ayu.

¹⁰ Idangji Mosai temezütsüba totzü agi, aser tekülemdak süki aser iba nung aliba ajak dak totzüji mezütsü aser itemji meshitetdaktsü.

¹¹ Pai totzüji tera agia tenladak aser oset ajak, aser susa aser tamentakdak ajak nung totzü mezüja meshitet.

¹² Pai Aron kolak nung totzü shilokja aser pa dak aji mezüja shiteta ayu.

¹³ Iba sülen Mosai Aron jabasotem anir arua Kibubai pa dang melaba ama parnok nem semoksü semtsü, aser peremlen agi alendangtsü aser parnok kolak nung korang alenloktsü.

¹⁴ Aser Mosai nashi pungchiji temenen tenla asoshi bener aru, aser Aron o par jabasotemi iba kolak nung teka agi nemet.

¹⁵ Mosai ibaji tepseta azüji kar agi aser idakji pa temeyong metener tenladak tezütem manung rüklokja meshitet. Tanüngbaji tenladak züngdang pai shiloktsü. Yamaji pai aji meshitet.

¹⁶ Mosai poknüng meyiba temo ajak, temesen shilem tajungdak, tezüngjang aser iba temo, itemji agia tenladak arong.

¹⁷ Kibubai melaba ama tanüngbaji teküp, shi aser tar, item ajakji tenladak kimalen arong.

¹⁸ Iba sülen Mosai san tepungji tarongba tenla asoshi bener aru. Aron aser pa jabasotemi iba kolak nung parnok teka agi nemet.

¹⁹ Mosai aji tepset aser azüji tenladak meketa rükloktsü.

²⁰ Pai san tepungji anüka alangsa aser tekolak, shinük aser temo itemji mi nung arong.

²¹ Pai poknüng aser tetsüngji tzü agi shitok, aser san tepung rangben tenladak manung teronem tajung asoshi arong. Aji Kibubai Mosa dang melaba ama liasü.

²² Pai san tepung tanabuba koba putirtemi shiteta ayuba nüngtem yua liasü, aji bener arua Aron aser pa jabasotem nem iba kolak nung parnok teka agi nemetdaktsü.

²³ Mosai aji tepseta, azüji bener arua Aron tajichi tenarongdak, teka tajichi jemtsüba, aser tajichi tetsüng jemtsüba manung rükloktsü.

²⁴ Pai Aron jabasotem anir arua parnok tenaronglak tajichi, teka tajichi jemtsüba aser tajichi tetsüng kemtsüba manung azüji rükloktsü. Aser tanüngbaji pai tenladak meketa shiloktsü.

²⁵ Pai temo, teben temo, poknüng meyiba temo, aser tepi tajichi agitet.

²⁶ Iba sülen pai Kibuba nem bendanga agütsüba amtsük molok nungi amtsük telong ka, totzü mezüba amtsük, piyazü meinokba amtsük tapak ka agiteta itemji temo aser tepi tajichi manung ataloka ayu.

²⁷ Pai item ajakji Aron aser par jabasotem ket nung agütsü, aser parnoki aji Kibuba nem sempet palaka asoshi agütsü.

²⁸ Mosai parnok nungi chiyungtsüji agia shiteta ayuba tarongba tenla koba itemji tenladak arong. Ibai chiyungtsü tenla lir aser iba teronem Kibuba madang tajung liasü.

²⁹ Aser Mosai mamalongji agia Kibuba nem sempet balaka ama agütsü, ibai shiteta ayuba tenla san tepung nungi Mosa shilem liasü. Aser Kibubai melaba ama Mosai ajak inyak.

³⁰ Mosai temezütsüba totzü tera aser azü tera tenladak nungi agia Aron aser par jabasotem süoshi nung rükloktsü. Yamaji pai parnok aser parnok süoshi Kibuba nem bendanga agütsü.

³¹ Mosai Aron aser par jabasotem dang ashi, “Shiji sentep süki kishi züngdangi bener oa idakji soang, aser Kibubai melaba ama, bendanga agütsüba molok nung amtsük den aji chiang.

³² Amtsük mesüra shi kar danga anüngra mi nung rongang.

³³ Nenok meshitetba anogo mabensa tashi tenladak nungi anogo tenetnü metugutsüla.

³⁴ Nenok temenen pungitsü atema tanü inyakbaji Kibubai melaba lir.

³⁵ Nenoki sentep süki kiküm züngdang anüngdang aser aonung lia Kibubai melaba inyaktsüla. Nenoki aji meinyakra, nenok asütsü. Ibai Kibubai kü dang melabaji lir.”

³⁶ Anungji Aron aser par jabasotemi Mosa ajanga Kibubai melaba ajak inyak.