LEVI 6 - Ao Naga C.L. Bible (BSI)

¹ Kibubai Mosa dang yamai ashi,

² “Nisung kari temenen mena-a KIBUBA anema tai inyakra, aser pei kiyonger den oset rizünga ayuba nung külakoktsüra, mesüra tenangzüktepba nung mesüra rakzükraktem nung mesüra pei kiyonger kangshia lira,

³ mesüra langka samaba pai ngur nung mangu ta azüngashiba, mesüra yamala mesükba mapa kar nung tai menara,

⁴ kodang pei temenen mena-a tai benshibaji metetdir, pai rakzükraktema agiba oset mesüra tashiyim agi bena aruba oset mesüra tesamaba oset pai anguba, itemji pai meyipa agütsütsüla,

⁵ mesüra kechi nungsa pai aibelena azüngashia ali, pai item ajakji meyipa agütsütsüla, aser pa temenen tenla agütsüba anogo nung oset kibur nem pungusü nung shilem ka enoksemer agütsütsüla.

⁶ Pa tai asoshi putir dang san telok nungi tarak maket san tepung ka bener arua, pa temenen tenla atema Kibuba nem agütsütsüla, aser aji jenjang talang aketba asütsüla.

⁷ Putiri aji nisungba tai ajak asoshi Kibuba nem tarongba tenla agüja pa temenen pungitsü, aser pa tai ajak atoktsü.”

Tarongba Tenla Tenlaba Indang

⁸ Aser Kibubai Mosa dang ashi,

⁹ “Aron aser pa jabasotem dang mela-a shiang, Ibai tarongba tenla ozüng lir: tarongba tenlaji tenladak manung mimung nung nanger mesangwa tashi alitsüla; aser iba manung tenladak mi jangrua ayutsüla.

¹⁰ Aser putiri pei kümpa sü sobutsüla, aser pa temang kümpa sü tetsüng semoktsü asemtsüla; aser tenladak tarongba tenla mi agi rongzükba aut pai agizüka tenladak tezülen ayutsüla.

¹¹ Aser pai pei sobutsü agizüker tanga sobutsüla, aser tanendak kimalen temerükdaki autji bener arutsüla.

¹² Aser tenladak miji maneni iba manung jangrua ayutsüla, aji meremseptsüla; aser anepdang shia putiri iba manung süng atsüktsüla, aser iba manung pai tarongba tenla tiptema ayutsüla, aser iba manung yimjung tenla temo arongtsüla.

¹³ Maneni iba mi jangrua ayutsüla, aji meremseptsüla.

¹⁴ “Aser ibaji chiyungtsü tenla ozüng lir: Aron jabasotemi Kibuba madang tenladak tsüngdang aji tenlatsüla.

¹⁵ Aser iba nungi pa tekabu ka sünga, chiyungtsü tenla amzü tanük agitettsü, aser iba nungi totzü, aser chiyungtsü tenla manung aliba liangmesen ajak, aser Kibuba dang tebilemtettsü atema tenladak manung teronem tajung asoshi aji arongtsüla.

¹⁶ Aser iba nung anüngbaji Aron aser pa jabasotem achitsü, aji piyazü meteni temeshidak achitsüla; sentep süki kima nung parnoki aji achitsüla.

¹⁷ Aji piyazü meinoki asangtsüla. Aji ni parnok nem kü dang mi agi tenlaba parnok shilem agütsüogo; temenen tenla aser tai tenla amato aji kanga temeshi.

¹⁸ Mi agi Kibuba dang tenlaba nungi putusa putu asoshi tangutsüba shilem amato, Aron chir rongnung tebur shiai aji achitsüla, shibaisa item dak kongshidir temeshi akümtsü.

¹⁹ Kibubai Mosa dang ashi,

²⁰ “Ibai Aron aser pa jabasotem Kibuba madang totzü mezütsüba anogo nung tenlatsüba lir; teti chiyungtsü tenla asoshi amzü tanük efa shilem ter nung ka anepdang tesadang ka aser nikongdang tesadang ka,

²¹ totzü den kanga junga meyokteper susa ka nung asangtsüla; aser aji tilala küma yanglur Kibuba dang chiyungtsü tenla teronem tanang asoshi agütsütsüla.

²² Aron chirtem rongnungi putir, shiba mezüja shimtetdir pa melen, ozüngi melaba ama ibaji pai tenlatsüla. Ajongaji arongtsüla.

²³ Putir asoshi chiyungtsü tenlaba shia ajakji arongtsüla, aji machitsüla.

²⁴ Kibubai Mosa dang ashi,

²⁵ “Aron aser pa jabasotem dang shiang, Ya temenen tenla ozüng lir, tarongba tenla kong tepseter, idakji Kibuba madang temenen tenla tepsettsüla, ya kanga temeshi.

²⁶ Putir shibai shiruruji temenen asoshi tenladir, pai iba shiji tekülemdak kima temeshidak ka nung achitsüla.

²⁷ Kari mesüra langka agi iba shi nungji kongshira temeshi alitsü. Süoshi kar dak azüji rükloka lira, ibajibo temeshidaki bener oa shitoktsüla.

²⁸ Ali po koba nung shiji aso, aji raksatsüla. Saka yongmenyin po nung sora, meyipshia meyur tzü nung shizüka yoktsüla.

²⁹ Putir rongnung tebur shiai iba shiji achitsü akok; ya kanga temeshi lir.

³⁰ Saka temenen tenla koba nung azü tekülemdak temenen pungitsü bener aiter, ibaji machitsüla; aji mi agi rongtoktsüla.