LEVI 4 - Ao Naga C.L. Bible (BSI)

Memeteti Aibelenba Asoshi Tenla

¹ Kibubai Mosa dang ashi,

² “Israel nungertem dang shiang, kari Kibubai teinyak ta ashiba mapa memeteti inyaka tai menara pai item ozüngtem ya benshitsüla.

³ “Tai menasangji totzü mezüa shimtetba putir ka süra, nisungtem dak tai bena arutsüra, idangji pai menenba temenen asoshi pai temenen tenla atema Kibuba dang nashi pungchi chanu ka agüjang.

⁴ Pai nashi pungchiji tekülemdak kishi züngdang bener arua, iba kolak nungji pa ket agi nemettsüla, aser Kibuba madang aji tepsettsüla.

⁵ Idangji mezüja shimtetba putir jagi nashi pungchi azüji tera tekülemdaki bener arutsü.

⁶ Aser putir jagi pei temeyong azü nung metena temeshidak teyindangba sü jakdang Kibuba madang pai azüji tenetben rükshitsü.

⁷ Aser sentep süki nung, Kibuba madang aliba teronem tajung tenladak tezütem manung putiri azü mezütsüla; aser nashi pungchi zü ajakji sentep süki nung aliba tarongba tenla tenladak züngdang meketa pai shiloktsütsüla.

⁸ Aser temenen tenla atema nashi pungchi temo ajakji pai iba nungi agizüktsü; poknüng meyiba temo, aser poknüng nung aliba temo ajak,

⁹ aser tezüngjang ana aser iba nung aliba kidangkimo, aser temesen meyiba, tezüngjang dena pai agizükatoktsüla,

¹⁰ (yimjung tenla nung nashi pungchi tepseta tenlaba nung agizükba amato), aser aji putir tarongba tenla tenladak manung arongtsü.

¹¹ Saka nashi pungchi teküp aser iba den shi ajak, tekolak, tetsüng, poknüng, aser jana,

¹² nashi pungchi rangbenji tanendak kimalen, merükmerüka alidak, kong aut toktoker idakji mi agi rongang; kong aut toktoker idakji aji arongtsüla.

Putirtem Atema

¹³ “Israel pur telok ajongai memeteti tai menaba, aser aji telok tenük nungi miima lira, aser Kibubai teinyak ta shia lira;

¹⁴ kodang kechi nung parnoki temenen mena aji metetdir, idangji teloki temenen tenla asoshi nashi pungchi chanu ka agi tenlatsüla, aser aji sentep süki-i bener arutsüla.

¹⁵ Aser Israel pur tamburtemi nashi pungchi kolak Kibuba madang parnok teka agi nemettsüla, aser Kibuba madang nashi pungchiji tepsettsüla.

¹⁶ Aser mezüja shimtetba putiri nashi pungchi züji sentep jagi bener arutsü;

¹⁷ aser putir jagi pa temeyong azü nung metena teyindangba sü jakdang tenetben tashi Kibuba madang aji rükshitsüla.

¹⁸ Aser tekülemdak nung Kibuba madang aliba apu tezütem dak azüji mezütsüla, aser tanüngba azüji tekülemdak kikümdang aliba tarongba tenla tenladak atem nung pai shiloktsütsüla.

¹⁹ Aser iba temo ajakji agiteta tenladak manung arongtsüla.

²⁰ Yamaji pai nashi pungchi jagi inyaktsüla; temenen tenla nashi pungchi agi inyakba ama, yamaji pai iba agi inyaktsüla; aser parnok asoshi putiri temenen pungitsü inyaktsüla, aser parnok tai atoktsü.

²¹ Aser tanendak kimaleni pai nashi pungchiji bener aotsü, aser aji mezüngbuba nashi pungchi arongba amaji arongtsüla, ibai telok asoshi temenen tenla lir.

Tatar Atema

²² “Kodang yimsüsür kati temenen menadir, aser memeteti Kibuba ozüng anema aibelendir,

²³ aser pai kechi nung aibelen aji meteta kümra, pa temenen asoshi tarak maket nabong tepong ka pai bener arutsüla.

²⁴ Pai nabong kolak nung pa ket agi nemettsü, aser aji tenladak septsülen kong tarongba tenla asoshi shirurutem tepseter idakji pai aji tepsettsüla. Ibai pa temenen pungiba tenla lir.

²⁵ Putiri shiruru azü nungji pa temeyong metener tarongba tenladak tezütem manungji mezütsü, aser tanüngbaji tenla tenladak züngdang shiloktsütsü.

²⁶ Yimchi-yimjung tenla atema shiruru tepseta arongba ama pai temo ajakji tenladak arongtsü. Yamaji putir jagi yimsüsür temenen asoshi tarongba tenlaji agütsütsü, aser pa tai atoktsü.

Kija Taküm Atema

²⁷ “Aser Kibubai teinyak ta ashiba mapa kar, inyakdang memeteti telok rongnung kari temenen menara, aser tai lira;

²⁸ temenen koba pai menaogo, aji pai meteta kümra, idangji pai menaba temenen asoshi tenla asoshi nabong bener arutsüla, tarak maketba tsüla ka.

²⁹ Aser pai temenen tenla tekolak nung pa ket agi nemettsüla, aser tarongba tenla tenladak temenen tenlaji tepsettsüla.

³⁰ Aser putiri iba züji pei temeyong agi bena arua tarongba tenla tenladak tezütem manungji mezütsüla, aser azü tanüngbaji tenladak züngdangji shiloktsütsü.

³¹ Aser yimjung tenla tepsetba nung temo ajak agizükba amato iba temo ajak pai agizükatoktsüla, aser Kibuba dang teronem tajung asoshi tenladak manungji aji putiri arongtsüla; aser pa asoshi putiri temenen pungitsü atema inyaktsüla, aser pa tai atoktsü.

³² “Aser pai tenla atema san chanu ka bener arua, aji pai tarak maket tsüla ka abentsüla.

³³ Aser pa temenen tenla agütsüba kolak nung pa ket agi nemettsüla, aser tarongba tenla tepsetdak pai aji temenen tenla atema tepsettsüla.

³⁴ Putiri shiruru zü nungi pa temeyong metener tarongba tenladak tezütem manungji aji mezütsü, aser tanüngbaji tenla tenladak züngdang shitoktsüla.

³⁵ Aser yimjung tenladang san chanu temo ajak bener aoba ama, pai temo ajak bener aotsüla, aser putiri itemji tenladak manung arongtsüla, aji Kibuba dang mi agi tenlabatem temo lir; aser pai menaba temenen indang putiri pa asoshi temenen pungitsü inyaktsüla, aser pa tai atoktsü.