LEVI 3 - Ao Naga C.L. Bible (BSI)

Yimchi-yimjung Tenla

¹ “Kodang nisung kari pei shiruru telok nungi yimchi-yimjung tenla agütsüdir, tepung saka tetsü saka pai Kibuba madang tarak maket agi tenlatsüla.

² Pai shiruru tekolak nung nemettsüla, aser aji Kibuba madang tekülemdak apu kiküm nung tepsettsüla. Aron jabasotem, putirtemi apu meketa azüji rükloktsütsüla.

³ Aser Kibuba dang mi agi tenlaba ama yimjung tenla tepseta pai tenlatsüla, poknüng meyiba temo aser poknüng nung aliba temo ajak,

⁴ aser tezüngjang ana, aser iba nung kidangkimo, aser temesen meyiba, tezüngjang denji pai agizükatoktsüla.

⁵ Aser aji Aroner jabasotemi, mi temalen aliba süng manung tarongba tenla manung tenladak arongtsüla; ibai Kibuba dang teronem tajung asoshi tenlaba lir.

⁶ “Yimchi-yimjung tenla atema tepsettsü asoshi Kibuba dang tenlabaji kiset shiruru nungi süra, tepung saka tetsü saka aji tarak maket agi tenlatsüla.

⁷ Pai tenlatsü asoshi san tepung chanu agi tenlara, pai aji Kibuba madakang tenlatsüla.

⁸ Pai iba tekolak nung nemettsü, aser sentep süki jakdang tepsettsüla. Aron chirtemi apu meketa azüji rükloktsütsüla.

⁹ Aser Kibuba dang mi agi tenlaba ama yimjung tenla tepseta pai tenlatsü, iba temo aser tepen temo, ajonga pai tongtiret tashi agizükatoktsü; aser poknüng meyiba temo, aser poknüng nung aliba temo ajak,

¹⁰ aser tezüngjang ana, iba den aliba kidangkimo, aser temesen meyiba, tezüngjang dena pai agizükatoktsüla.

¹¹ Aser aji putiri tenladak manung arongtsü ibai Kibuba dang mi agi tenlaba ama chiyungtsü tenla agütsüba lir.

¹² “Aser pai tenlabaji nabong süra, aji pai Kibuba madang tenlatsüla,

¹³ aser pa teka agi iba kolak nung nemettsüla aser aji sentep süki madang tepsettsüla; aser Aroner jabasotemi tenladak meketa azüji rükshitsüla.

¹⁴ Pai iba tenlaji, Kibuba dang mi agi tenla agütsüba ama tenlatsüla; poknüng meyiba temo, aser poknüng nung aliba temo ajak,

¹⁵ tezüngjang aser iba temo, aser temesen shilem tajungdak.

¹⁶ Aser aji putiri tenladak manung arongtsüla; iba teronem tajung asoshi mi agi tenlaba ama chiyungtsü tenla lir, temo ajakji Kibuba meyong.

¹⁷ Nenoki temo mesüra azü machitsü atema nenok alidak putu ajak nung teti asoshi ibai ozüng ka alitsü.”