LEVI 27 - Ao Naga C.L. Bible (BSI)

Kibuba Nem Tatemzükba Sempet Agütsüba Indang

¹ Kibubai Mosa dang ashi,

² “Israel chirtem dang shiang, kodang nisung kati Kibuba dang palaka tatemzükba sen agi nisung jenjang yangludir,

³ küm metsü nungi küm roker tashi tebur jenjang yanglubaji temeshidak shekel aliba amaji taribi shekel tenem alitsüla;

⁴ Aji tetsür süra jenjang yanglubaji shekel semer alitsüla.

⁵ Parnokji küm pungu nungi metsü tashi süra tebur jenjang shekel metsü, tetsür jenjang ter.

⁶ Parnok ita ka nungi küm pungu tashi süra, tebur jenjang shekel pungu, tetsür jenjang taribi shekel asem,

⁷ Parnokji küm roker tema tain süra tebur jenjang taribi shekel terpungu tetsür jenjang taribi shekel ter.

⁸ Tatemzüksang jagi jenjangji magütsütettsüsa sensaka lira, pa-a putir tsüngdangi anir arutsü aser tatemzüksangi agütsütettsüsa putiri jenjangji ajema yanglutsü.

⁹ “Tatemzükbaji shiruru ka Kibuba nem tenla agütsütsüba süra Kibuba nem agütsütsüba tenla ajakji temeshi alitsü,

¹⁰ nisung shibai ibai atemzük, pai tanga shiruru den aji memelenteptsüla, mesüra tajung ka tamajung asoshi, tamajung ka tajung asoshi memelenteptsüla, pai yamaji melentepra shiruru anaprongji temeshi aser Kibuba meyong alitsü.

¹¹ Saka tatemzükbaji memerükba shiruru ka süra, aser Kibuba nem magütsüba shiruru süra, pai aji putir dangi anir arutsü.

¹² Putiri shiruruji tajung asü jenjangji putiri yanglubaji tatembang alitsü.

¹³ Kiburi aji alangzüknüra jenjang dakji pungusü shilem nung shilem ka pai enoksemer agütsütsüla.

¹⁴ “Kari pei ki Kibuba asoshi bendanga meshitetnüra, putir kiji tajung majung ajak repranger jenjang atettsü. Putiri kechi jenjang yangludir aji tatembang alitsü.

¹⁵ Ki bendanga meshitetsangi aji alangzüknüra jenjang dakji pungu sü shilem nung shilem ka enoker agütsütsüla.

¹⁶ “Kari pei senmang alu kar Kibuba asoshi meshitettsü bendanga agütsüra alu nungji metsü prokba yari jenjangji atettsüla, aluji barley yimji ka atenshi süra iba jenjangji taribi tenem.

¹⁷ Aluji jubilee küm nungi meshitettsü bendanga agütsüra, iba jenjangji akhi ama alitsü.

¹⁸ Saka aluji jubilee küm sülen ang meshitettsü bendanga agütsüra tanabuba jubilee küm tashi nung küm kwi anünga ali putiri aji züngdanger jenjangji achema atettsü.

¹⁹ Shibai aluji bendanga agütsü pai alangzüknüra jenjang dakji pungu sü shilem nung shilem ka agütsütsüla.

²⁰ Pai aji Kibuba nungi tama malangzüki yur tangar dang yokra, pai aji kodanga alangzüktsü makok.

²¹ Tanabuba jubilee nung kodang aluji chiokdir, aji teti asoshi Kibuba dang temeshi alitsü aser aji putir meyong akümtsü.

²² “Kari sen agi alizükba alu kar Kibuba nem bendanga meshiteta agütsüra,

²³ Jubilee küm apir putiri iba jenjangji atettsü; aser nisungba jagi iba jenjangji panüjisa agütsütsü, aser aji Kibuba asoshi temeshi alitsü.

²⁴ Jubilee küm aluji pei kibur mesüra par senmanger dangi meyipa aotsü.

²⁵ Jenjang ajak temeshidak aliba shekel amaji alitsüla; shekel gera metsü asütsü.

²⁶ “Mezüng mepuba shiruru ajak Kibuba meyong. Anungji shingaia ibaji Kibuba nem temulunger tenla ama magütsütsüla. Nashi süshia san süshia aji Kibuba meyong lir.

²⁷ Saka mezüng mepubaji memerükba shiruru süra, aji jenjang yangluba dak shilem pungusü nung shilem ka enoksemer alitsüla. Kibubai aji malangzükra kasa jenjang jagi kar dang ayoktsüla.

²⁸ “Shingaia teti asoshi Kibuba nem bendanga agütsüba nisung süshia, shiruru süshia, alu süshia teti asoshi mayoktsüla, mesüra malangzüktsüla. Ibaji teti asoshi Kibuba meyong lir,

²⁹ nisung shiba samatsütsü asoshi bendanga agüja lir, aji malangzüktsüla. Pabo südaktsütsüla.

³⁰ “Ali nungi adokba süshia, süngdong süngjang süshia ter nung shilem ka Kibuba meyong lir.

³¹ Kari ter shilemji alinüra, pai iba jenjangdakji pungusü nung shilem ka enoksemer alitsüla.

³² Nashi telok aser san telok nungi ter shilemji koba tanükeri züngdanger ter bubaji Kibuba asoshi temeshi alitsü.

³³ Kiburi tajung meshimtsüla, mesüra memelenteptsüla. Pai shiruruji melentepra, anaprongji Kibuba meyong alitsü, aser aji malangzüktsüla.”

³⁴ Itemi Sinai tenem Israel nungertem asoshi Kibubai Mosa dang melaba ozüngtem lir.