LEVI 26 - Ao Naga C.L. Bible (BSI)

Tashi Angaba Temoatsütem

¹ Kibubai ashi, “Nenoki süngyanglu kecha teyanglu, mesüra süngyanglu noksa angenteta süshia, tongshi süshia nenoki teyu, mesüra nenoki apudaktsü atema kecha lung agi yanglua teyu. Ni Kibuba nenok Tsüngrem lir.

² Nenoki kü amungnütem mungang aser kü tekülemdak akhüm tsübuang. Ni Kibuba lir.

³ Nenoki kü ozüngnung jajara, aser ni melaba angara,

⁴ ni mapang shitak nung tzünglu yoktsü aser ali-i tejang tangtsütsü.

⁵ Nenok mo anetba, tsükmenatzü aongba metsü prokba mapang tonga alitsü, aser linük nung nenok kümzüka alitsü.

⁶ “Linük nung ni yimjiyimjung agütsütsü aser nenoki shinga metsübui ontaka alitsü. Linük nung shiruru tamajung ajak ni aridoktsü, aser idakji rara kodanga malitsü.

⁷ Parnok madak nenoki takok angutsü,

⁸ nenok nisung pungui noklang ka, aser noklang kati meyi ter akoktsü. Nenok nok madang parnok laotsü.

⁹ Ni nenok moatsütsü aser nenok tejang jenti kümdaktsütsü, aser kü tezüngzükba nenok den yanglutsü,

¹⁰ Nenok aon tsük talangka rizünga ayuba tachitsü akatsü, aser tasen atema nenoki aontemji agientsü.

¹¹ Kü tekülemdak süki ni nenok rongnung yutsütsü, aser kü nelai nenok mesempatsü.

¹² Ni nenok rongnung jajatsü aser nenok Tsüngrem asütsü, aser nenok kü nübur asütsü.

¹³ Nenok parnok lar makümtsü asoshi Ijip lima nungi nenok anitetba ni Kibuba nenok Tsüngrem lir. Ni nenok süngra tasütangba raksatsüogo, aser nenok metong metonga jajadaktsüogo.

Tashi Mangartem Merenshiba

¹⁴ “Saka nenoki kü dang mangara aser pa temelaba meinyakra,

¹⁵ aser ni melaba magizükra, aser kü tezüngzüktepba raksara,

¹⁶ idangji ni dang ya inyaktsü; ni nenok dangi timtem yoktsü wara tashitak, ramen, koba agi nenok tenük pokdaktsütsü aser nenok taküma agitsü. Nenoki amajok nung metsü proktsü, kechiaser tsükchiri nenok akoktsü aser parnoki aji achitsü,

¹⁷ Kü jak nenok anema alitsü, anungji tsükchir jakdang nenok chinütsü, shirnoki nenok sempar parnoki nenok madak yimsü asütsü; shingaia aria marudang nenoki ajentsü.

¹⁸ “Yamaji süra nenoki kü dang mangara, ni nenok temerenshi tenetben agi tali merenshitsü.

¹⁹ Nenok asükümba tashi ni raksatsütsü, aser ni tzünglu meyoktsü, anüngji merang ama akümtsü aser aliji yongmenyin ama takong kümdaktsütsü.

²⁰ Nenoki amajok nung meranga inyaktsü kechiaser ali-i tejang metangtsütsü aser süngdongi süngjang metangtsütsü.

²¹ “Ano nenoki kü den maneni küptepra, aser kü dang mangara nenok temenen yari ni tenetben agi tali timtem yoktsü.

²² Ni nenok rongnung arem shiruru tesashi yoka nenok chirtem aser nenok kiset shirurutem samadakja nenok ishiba dang kümdakja, nenok lenmangtem azüngmeyaka kümdaktsütsü.

²³ “Item temerenshi ajanga nenoki kü dang mangai maneni kü den küptepra,

²⁴ idangji ni nenok dangi meyiptsü aser tenetben agi tali merenshitsü.

²⁵ Kü tezüngzüktepba nenoki raksaba yong ni nenok merenshitsü atema ni nok bener arutsü, nenok kümzüktsü atema yimtitem nung atenshira, manebtetba tashitak ni nenok rongnung yoktsü, aser tsükchir ketnung nenok bendanga agütsütsü.

²⁶ “Kodang nenok chiyungtsü ni sotdir, tetsür teri am asangba po ka nung dang külemi amtsük yanglutsü, aser nenok nem amtsük odanga dang agütsütsü, nenoki aji chiaka tip matemtsü.

²⁷ Yamaji saka nenoki kü dang mangai tsükchitepra,

²⁸ idangji ni ain adoka meyiptsü aser nenok temerenshi akhidang nungi tenetben agi tali tamajungba agi merenshitsü.

²⁹ Nenok ayabaji kanga sashiba agi nenoki pei chir shi achitsü.

³⁰ Tenem nung nenok tekülemdak ni raksatsütsü, aser anü süngyanglutem tepsatsütsü, aser nenok tasümangtem iba manung toktsütsü. Ni nenok sempatsü.

³¹ Nenok yimtitem aser tekülemdak ni raksatsütsü, aser nenok teronem tajung ni memenemtsü.

³² Ni nenok linük azüngmeyaka kümdaktsütsü aser idakji alir nenok tsükchirtem aji ngua süngmangtsü.

³³ Nenok madak ni rara arudaktsütsü aser ayimsünga linüktem rongnung prokshidaktsütsü. Ner lima teraksa kümdaktsütsü aser ner yimtitem azüngmeyaka kümdaktsütsü.

³⁴ Azüngmeyaka aliba mapang linüki amungnü alitsü, tsükchir lima nung nenok aliba mapang tashi linüki anisüngzüka pei amungnü amungtsü.

³⁵ Linükji kopiga azüngmeyaka lidir papigaji anisüngzük akatsü; yamaji nenok alidang mungutetba anisüngzük akatsü.

³⁶ “Shirnok anisüngzüka lir, parnok mulungjang tetsübu agi süngdaktsütsü, aser oda süngo to ka mopungi onshiba ola agi parnok jashidaktsütsü, parnok rara nungi ajenba ama asemtsü, aser shingaia aria marudang parnok laotsü.

³⁷ Shingaia aria maru sernung nok nungi ajen ama parnok kati ka dak metsüdaka laotsü, aser tsükchir anema noktaktsü nenok dak tashi malitsü,

³⁸ Nenok bendang lima tepuokdak asütsü aser tsükchirtem linüki nenok meyokadoktsü.

³⁹ Nenok anüngzüka alirtem pei temenen aser nenok tsürabur temenen yong tsükchir lima nung yareta aotsü.

⁴⁰ “Saka parnoki ni anema ozüng raksaba, kü den tsükchitepba, parnok temenen aser parnok tsürabur temenen nangzükra,

⁴¹ aser koba yong parnok tsükchitepba tsükchir linüki parnok anir aru, parnok asükümba temulungjang meyipa parnok temenen nangzükra,

⁴² ni kü tezüngzüktepba koba Yakob, Isak aser Abraham den yanglu, bilemtettsü aser linükji ni bilemtettsü.

⁴³ Linükji parnoki toktsütsü, aser parnok meli-i azüngazünga alidang linüki pei amungnü amungtsü aser parnoki pei ozüng aser temelaba magizükba tai nangzüktsüla.

⁴⁴ Aji oda süaka parnok tsükchir linük nung aliyonga parnok kü den tezüngzükba raksaba agi parnok khenyongi samatsüsa ni parnok magizüki mesüra parnok sempa-a malitsü, kechiaser ni parnok Tsüngrem Kibuba lir.

⁴⁵ Saka parnok atema parnok tetsü teboutem shirnok kintem madang ni parnok Tsüngrem asütsü asoshi ni Ijip lima nungi anitet; parnok den kü tezüngzüktepba ni bilemtettsü. Ni Kibuba lir.”

⁴⁶ Item temelaba yimsü ozüng aser obendangba ya ajak Kibuba pa aser Israel chirtem tsüngda Mosa ajanga Sinai tenem nung yanglu.