LEVI 25 - Ao Naga C.L. Bible (BSI)

Küm Tenetbuba

¹ Kibubai Sinai tenem nung Mosa dang ashi,

² “Israel nunger dang shiang; kodang ni nenok nem agütsüba linüki nenok arudir, küm tenetbuba nung KIBUBA dang linüki amungnü amungtsüla.

³ Küm trok nenoki alu nung metsü prokang, aser tsükmenatzü kongsang mejeptokang, süngjangtem bendena yuang.

⁴ Saka küm tenetbubaji linük ajak anisüngzükba küm, KIBUBA nem bendanga agütsüba küm alitsü, nenok alu nung metsü teprok mesüra tsükmenatzü kongsang temejep.

⁵ Nenok alu nung pei sasa atangba metsü aser nenoki memejeptoki atangba tsükmenatzü süngjang kecha nenoki mebendentsüla; linük asoshi aji bendanga anisüngzükba küm alitsü.

⁶ Iba kümji nenoki alu nung metsü meprokaka nenok alar aser alatsür, nenok den ayanga alirtem asoshi,

⁷ nenoki kiset shirurutem aser arem shirurutem asoshi chiyungtsü alitsü. Linük nungi kechisa adokdir aji nenok asoshi chiyungtsü alitsü.

Jubilee Küm

⁸ “Amungnü küm tenetben tenet koba agi küm lir tuku abensar aji nenoki züngang.

⁹ Ita tenetbuba anogo terbuba, temenen pungiba anogo nung linük ajaklen jangzü ola tulu yokang.

¹⁰ Yamaji tenembuba kümji nenoki meshitetang, aser linük alir ajak dang nüji tia sangokjang. Ibai nenok asoshi jubilee alitsü, nenok nisung shia pei meyong oset kechisa tangar dang ayok, pakümji pei oset kibur aser senmang dangi, aser nisung kar alar asütsü sen yong yoka lira, pai kinunger dangi meyipa aotsü.

¹¹ Küm tenembubaji nenok asoshi jubilee alitsü, nenoki metsü meproktsü mesüra pei sasa meibajia marutsü, mesüra memejeptoki aliba nungi tsükmenatzü mebendentsü.

¹² Ibai nenok asoshi jubilee aser temeshi alitsü, alui pei sasa kechi tangtsü aji dang achitsüla.

¹³ “Iba jubilee kümji nisung shiai pei oset kechisa tangar dang ayok aji pei kibur dangi meyipa aotsü,

¹⁴ nenoki pei kiyonger dang ali kar yoka, mesüra pa nungi alira, nenoki kati ka dang külaka tebenshi.

¹⁵ Taruba jubilee küm yongsük aser ali nungi metsü adoktsüba küm apir jenjangji ataktsüla.

¹⁶ Ano kümji aika süra iba yari jenjangji tulu saka kümji ishika dang süra iba yari jenjang ajemtsüla, kechiaser ali nungi adoktsüba metsü jenjangji apir aji atoktsüla.

¹⁷ Nenok kati ka mashioktsütsüla, saka Tsüngrem tsübuang. Ni Kibuba nenok Tsüngrem lir. Ibai Israel nunger küm tenetbuba amungnü küm tetezü lir.

Küm Tenetbuba Nung Teinyaktsü

¹⁸ “Kü temelaba aser kü ozüngtem kümdanga benshiang, aser nenok linük nung kümzüka alitsü.

¹⁹ Aser alui pei tejang tangtsütsü, aser nenoki aginüba ajak ngua aser nenok tepok sünga alitsü.

²⁰ “Onoki metsü meprokra, aser alu merura küm tenetbuba nung onoki kechi achitsü? ta kari asüngdangra,

²¹ Kibubai küm trokbuba nung kümsem atangtsü süngjang tangdaktsütsüsa aliji moatsütsü.

²² Kodang küm tibuba nung nenoki metsü prokdir nenoki aontsük chia alitsü, aser küm tukububa aluruwa matong tashi nenok aon chia chiyungtsü.

Oset Meyipa Anguba

²³ “Nenoki ali teti asoshi mayoktsüla, kechiaser aji nenok meyong masü, saka Tsüngrem meyong lir, nenok kü den aener aser semloka alirtem dang lir.

²⁴ Kodang nenoki ali yokdir ali kiburi tanaben aji alangzüktsü melatsüla.

²⁵ Nenok adianu kar sensaker küma par rongsen kar ayoktsüsa kümra idangji pa anasa aliba kimang kati arua aji ruzüktsü.

²⁶ Nisung kar aji ruzüktsü adianu melira aser tesülen pa takar küma aji ruzüktsü lenmang kar ngura;

²⁷ pai ayokba nisung nemji tanüngba asoshiji meyipa agütsütsü, aser pai pei rongsen meyipa agitsü.

²⁸ Saka pai aji tanaben agitsü sen makara, pai kechi ayok aji talizükba ket nung jubilee küm tashi alitsü, aser pakümji pei rongsen tanaben pai agütsütsü.

²⁹ “Jara agi atsübanga aliba yimti nungi kari talidak ki yokra aji yoker küm ka renteterbo, pai aji alangzüktsü akok,

³⁰ saka küm ka tsüngda nung pai aji malangzükra pai tanaben aji alangzüktsü makok, aser pa shibai aji ali, kiji teti asoshi pa aser par semchirtem meyong akümtsü. Jubilee nunga ibaji meyipa magütsütsü.

³¹ Saka yimtsüngtem nung jara agi atsüa aliba kiji alu den kasa ama züngshitsü. Item kiji kiburtem meyipa alangzüktsü akok, aser jubilee nung meyipa agütsütsüla.

³² Aji saka Levi yimlitem nung aliba parnok kitem asoshi, kodang parnoki aginüdir idangji alangzüktsü akok.

³³ Parnok yimtitem nungi Levi nunger kari ki ka yokra, aser aji malangzükra jubilee kümbo ajia meyipa agütsütsü; kechiaser Israel kin rongnung Levi yimtitemji teti asoshi parnok meyong lir.

³⁴ Saka parnok yimti meketa shiruru chimdak yimli kodanga mayoktsüla, ibai teti parnok senmangji lir.

Sensaker Nem Aputsüba

³⁵ “Israel nunger ne sosem adianu kar sensak tenra aser pei tepok mesüngra pa taküm alitsü atema ne den semloka alir aener dang yariba ama nai pa dang yaritsüla.

³⁶ Pa nungi kecha nunga tetemlok tagi, saka Tsüngrem tsübuang aser ne adianu na anasa lidakjang.

³⁷ Nai pa nem sentem agi sen taputsü mesüra na tajangzük angutsüsa chiyungtsü kecha teyok,

³⁸ nenok nem Kanan lima agütsütsü aser nenok Tsüngrem Ijip lima nungi anitetba Kibuba nenok Tsüngrem ni lir.

Alar Chiokba

³⁹ “Na anasa alir Israel nunger sosem sensak tena, pei sasa alar asütsü ne dang yokra nai pa nem alar mapa meinyakdaktsütsüla.

⁴⁰ Jubilee küm matong tashi semloka alir ayanger ka ama pa ne den alitsü,

⁴¹ iba sülen pa aser par chirtem na toktsür pei meyong aser kinunger dangi meyipa aotsü.

⁴² Kechiaser Israel nüburji kü kilir asütsü ni Ijip lima nungi anitet; parnok alar ama mayoktsüla,

⁴³ parnok dang tashiyim agi yimsü masütsüla, saka ne Tsüngrem tsübuang.

⁴⁴ Nai alar aser alatsür yunüra, meketa aliba kintem nungi alitsü akok.

⁴⁵ Ano nenok den semloka alir bendanger chirtem nungi nenoki alar alitsü akok. Item tanur ner lima nung asortemji nenok meyong alitsü.

⁴⁶ Aser parnokji ner chirtem asoshi senmang ama nai yutsütsü akok aser parnok dang tenzüktsü, saka ne adianu Israel nunger shinga daka tashiyim agi yimsü masütsüla.

⁴⁷ “Aener mesüra ne den semloka alir kar takar küma lira, aser ne adianu sensak tena, aener mesüra ne den semloka aliba dangji alar asütsü yokra mesüra par kinunger kar dang yokra,

⁴⁸ pai pei sasa alangzüktsü akok; pa adianutem rongnung kari alangzüktsü akok.

⁴⁹ Oda tebu tambu mesüra tebu tanubu, mesüra pa sosem kari pa alangzüktsü akok.

⁵⁰ Pa alangzükba nisung denji pai angatettepa, pa ayokba küm nungi jubilee küm tashi pa alizükba jenjangji küm yongsük apir ayanger ka ta-a agütsüba jenjang agütsütsüla.

⁵¹ Ano küm aika anünga lira, itemji apir pai meyipa agütsütsüla.

⁵² Aser jubilee küm atongtsü küm ishika dang anünga lira, ibaji apir pai jenjangji agütsütsüla.

⁵³ Küm shia ayanger aliba kilir ama pa ne den alitsü, aser kiburi pa dak tashiyim mamshitsü nai reprangtsüla.

⁵⁴ Pei sasa saka adianui saka pa malangzükaka, jubilee küm pa aser par chirtem chioktsüla.

⁵⁵ Israel nungertemji teti asoshi alar asütsü makok, kechiaser parnokji Kibuba kilirtem lir. Pai parnok Ijip lima nungi anitet, pa parnok Tsüngrem lir.”