LEVI 24 - Ao Naga C.L. Bible (BSI)

Milendong Atalokdak

¹ Kibubai Mosa dang ashi,

² “Israel nunger nem iba ozüng ya agüjang; Oliv totzü temenüngzükba tajungtiba milen asoshi bener arung, angji tekülemdak milenji teti tsükloka alitsü.

³ Sentep süki Ozüng Süngden temalen Aroni aji nikongdang nungi anepdang tashi Kibuba madang maneni yutsütsüla.Ya putu ajak nung ozüng ka alitsü.

⁴ Hon temeja milendong nung Aroni Kibuba madang maneni milen yutsütsüla.

Tsüngrem Dang Amtsük Tenlaba

⁵ “Amzü tanük agi amtsük terana yangluang, amtsük shia nung am tanük jangku ana agi yangluang.

⁶ Amtsükji taren ana, taren shia trokrok, hon temeja langbang manung Kibuba madang ayutsüla.

⁷ Kibuba dang amtsük tenlaba bilemtettsü asoshi, taren shia liangmesen temeja yujang.

⁸ Amungnü shia Israel nunger tenüng nung amtsükji Kibuba madang teti yutsütsüla. Ibai Israel chirtem asoshi teti atema ozüng lir.

⁹ Amtsükji Aron aser par chirtem asoshi alitsü, parnokia aji temeshi dak achitsüla, kechiaser aji putir asoshi Kibuba nem chiyungtsü tenla agütsüba kanga temeshi lir.”

Ochi Obendangba Tatishitsü

¹⁰ Israeltsür chir ka shiba tebu Ijip nunger liasü, Israel nunger rongnung oa, aser tanendak Israel nunger ka den rara.

¹¹ Israeltsür chir jagi Kibuba tenüng atakatema atalatsü; anungji parnoki pa Mosa dangi anir aru, pa tetsü tenüng Shilomit, Dan kidong nung Dibri jala liasü.

¹² Kibuba mulung kechi aji memetet tashi parnoki pa shibanga ayu.

¹³ Idangji Kibubai Mosa dang ashi,

¹⁴ “Atakatem asüsangji tanendak kimai anir arung. Pai ashiba angashir shiai kuli asütsü asoshi parnok teka pa tekolak nung nemetang; aser telok ajaki pa dak lung agi aontsü.

¹⁵ Israel nungertem dang shiang; shibaisa pei Tsüngrem atakatemdir, pai pei temenen abentsü.

¹⁶ Shibai Kibuba tenüng ataladir, pa südaktsütsü, Israel chir süaka bendanger süaka kodang pai Kibuba tenüng ataladir, Israel telok ajaki pa lung agi onseta südaktsütsüla.

¹⁷ “Shibai nisung tepsetdir, pa südaktsütsüla,

¹⁸ shibai tangar meyong shiruru tepsetdir temenok agütsütsüla, taküm melen taküm agütsütsüla.

¹⁹ “Kari pei kiyonger yirudaktsüra pai inyakba ama yamaji pa dak inyaktsü.

²⁰ Teret melen teret, tenük melen tenük, tepu melen tepu. Pai tangar yirudaktsüba ama pa daka yirudaktsütsü.

²¹ Shibaisa shiruru tepsetdir aji menokdaktsütsü. Saka shibai nisung tepsetdir pa südaktsütsü.

²² Bendanger süaka Israel nungertem süaka ajak asoshi iba ya alitsü, kechiaser ni Kibuba nenok Tsüngrem lir.”

²³ Kodang Mosai Israel nungertem dang itemji ashi, parnoki tanendak kimalen anir adoka lung agi onseta südaktsü. Yamaji Israel nungeri Kibubai Mosa dang ashiba ama inyak.