LEVI 23 - Ao Naga C.L. Bible (BSI)

Benjong Anogotem

¹ Kibubai Mosa dang ashi,

² “Israel nunger dang shiang: Itemi ni shimtetba benjongtem, Kibubai shimtetba benjongtem lir.

³ Nenoki anogo trok pei asoshi mapa inyaktsü, saka anogo tenetnübubaji Amungnü, aser aji anisüngzük anogo sentepnü ta bilemtetang. Iba anogo nung nenok kecha meinyaktsüla saka tekülemdak nenok ajak arutsüla. Nenok kong lidir liaka Amungnüji Kibuba meyong lir.

⁴ Itemi Kibuba teshimtet benjong, teshimtet mapang nung nenoki metetdaktsütsüla.

Süia Aoba Aser Piyazü Meinokba Am Benjong

⁵ “Süia aoba benjongji mezüngbuba ita anogo ter-pezübuba nikongdang Kibuba nem tetushi agüja amungtsüla.

⁶ Terpungububa piyazü meinokba am benjong tenzüktsü, anogo tenet tashi piyazü enokba amtsük kecha nenoki machitsüla.

⁷ Benjong mezüng anogo nung temeshi sentep ka akatsüla. Aser nenoki mapa kecha meinyaktsüla.

⁸ Anogo tenet nenoki Kibuba nem chiyungtsü tenla agüjang, Anogo tenetbuba nung temeshi sentep ka akatsüla aser nenoki mapa kecha meinyaktsüla.”

Mezüng Süngjang Tenla Benjong

⁹ Kibubai Mosa dang ashi,

¹⁰ “Israel nunger dang shiang: Kodang ni agütsüba linüki nenok arua alu rudir, nenoki mezüngbuba süngjang tsükpong putir dangi bener arutsüla.

¹¹ Nenok agizüktettsüsa pai Kibuba madang aji tenla balaka ama putiri aji tenlatsüla. Amungnü süir tasüngji putiri aji agütsütsüla.

¹² Nenoki tsükpong tenlaba denji külemi tarongba tenla asoshi küm ka tain san tepong ka nenoki tenlatsüla.

¹³ Iba den ano chiyungtsü tenla asoshi am tanük totzü den meyokteper iba shilem ter nung ana tenlatsüla. Iba tenla teronemji Kibuba madang tajung lir. Nenoki ano tajemtsü tenla yi hin shilem pezü nung ka tenlatsüla.

¹⁴ Nenoki item tenlaji Tsüngrem dangi bener maru tashi amtsük süshia jang atongba mesüra asenjang kongnüng süshia kecha machitsüla. Iba ozüng ya nenok asoshi putir ajak atema alitsü.

Aluruba Benjong

¹⁵ “Nenoki Kibuba dang tsükpong tenla bener aruba Amungnü süir tasüng nungi hapta tenet nenoki züngdangang.

¹⁶ Amungnü tenet buba süir tasüng anogo, tenemnü buba nung nenoki Kibuba nem asen-chi agütsütsüla.

¹⁷ Kibong shiai amtsük anana tenla balaka asoshi Kibuba dangi abentsüla. Amtsükji amzü tanük jangku ka ka nung piyazü enoka yanglutsüla, aser aji mezüng süngjang Kibuba asoshi alitsü.

¹⁸ Amtsük denji külemi tarak maket küm ka tain san tepung tenet, nashi pungchi chanu ka aser san tepung ana nenoki agütsütsüla. Itemji Kibuba madang teronem tajung asoshi tarongba tenla den külemi chiyungtsü tenla aser tajemtsü tenla alitsü.

¹⁹ Ano temenen tenla asoshi nabong tepung ka, aser telungjem tenla asoshi küm ka chanu san tepung ana nenoki tenlatsüla.

²⁰ Putiri mezüng süngjang amtsük den san chanu anaji tenla balaka asoshi Kibuba madang itemji temeshi alitsü.

²¹ Panüji nenok mapa kecha meinyaktsüla, saka temeshi sentep alitsü, nenok alidak ajak nung ibai teti asoshi ozüng alitsü.

²² “Kodang nenok alu rudir, ner lu chirongbang ajonga marutsüla, ner lu nung motok meshimtsüla, itemji sensaker aser aener asoshi tokjang, Ni Kibuba nenok Tsüngrem lir.”

Jangzü Apuba Benjong

²³ Kibubai Mosa dang ashi,

²⁴ “Israel nunger dang shiang, ita tenet buba mezüngbuba anogo nung nenoki anisüngzükang, aser Temeshi sentep nung Jangzü apuba agi nenok Tsüngrem nem tenüngsang agüjang.

²⁵ Nenoki mapa kecha teinyak, saka Kibuba nem chiyungtsü tenla agüjang.”

Temenen Pungiba Anogo

²⁶ Kibubai Mosa dang ashi,

²⁷ “Iba ita tenetbuba anogo terbubaji Temenen pungitsü anogo lir. Panüji nenoki kecha machitsüla, ibai nenok asoshi temeshi sentepnü alitsü, aser Kibuba nem chiyungtsü tenla agüjang.

²⁸ Panüji nenoki mapa kecha meinyaktsüla, kechiaser Kibuba nenok Tsüngrem nenok asoshi temenen pungidaktsütsü ibai Temenen pungiba anogo lir.

²⁹ “Kari panüji langka chira, pabo pei nübur rongnungi jentoktsü.

³⁰ Aser kari panüji mapa inyakra, Kibubai iba nisung südaktsütsü.

³¹ Nenok alidak ajak nung teti asoshi ibai ozüng alitsü.

³² Anogo tekunübuba nikongdang tashi nenoki ibai metsüngshia reta amungtsüla, aser iba mapang nungji nenoki kecha machitsüla.”

Semtu Benjong

³³ Kibubai Mosa dang ashi,

³⁴ “Israel nunger dang shiang. Anogo terpungububa ita tenetbuba nung Kibuba asoshi semtu benjong tenzüktsü aser aji anogo tenetnü tashi alitsü.

³⁵ Mezüngnüji telok temeshi sentep ka akatsü, aser nenok mapa kecha meinyaktsüla.

³⁶ Anogo tenetnü anogo shia nenoki chiyungtsü agütsütsüla, anogo tinübuba nung nenoki temeshi sentep ka akatsüla: ibai benjong shibangba sentep alitsü, nenok mapa kecha meinyaktsüla.

³⁷ “Itemi Kibubai atakteta yutsüba benjongtem lir, kong nenok temeshi sentep akar, aser chiyungtsü tenla, tarongba tenla, tenlatem aser tajemtsü tenla, anogo shia tataktet mapang nung agütsütsüla.

³⁸ Item benjongtemji teti amungba amungnü den külemi, aser item tenlatemji nenoki teti agütsüba dak alema, nenok azüngashiba atalokba tenla, aser nenoki mulungba tenla Kibuba nem agütsütsü alitsü.

³⁹ “Kodang nenok alutem ruzükdir, iba benjong ya anogo tenetnü, anogo ter-pungububa ita tenetbuba nung amungtsü, mezüngnüji anogo balaka bendanga agütsüba anisüngzük anogo alitsü.

⁴⁰ Panüji nenoki süngdong nungi süngjang tajungtiba, asangdong kongsang aketba aser to aketba süngsang bener arua Kibuba nenok Tsüngrem nem tetushi agüjang.

⁴¹ Anogo tenetnü tashi nenoki benjongji amungtsüla. Iba ozüng ya nenok putu ajak nung ayutsüla.

⁴² Tenetnü nenoki sempak nung alitsüla. Israel nung asoba senso ajak semtu nung alitsüla.

⁴³ Anungji Kibubai Israel nunger Ijip lima nungi aniteta semtu nung lidaktsü ta nenok semchirtemi metettsü. Ni Kibuba nenok Tsüngrem lir.”

⁴⁴ Anungji Israel nunger dang shimtetba benjong anogotem indang Mosai metetdaktsü.