LEVI 20 - Ao Naga C.L. Bible (BSI)

Tashi Mangaba Temerenshi

¹ Kibubai Mosa dang ashi,

² “Israel nunger dang shiang. Nenok rong nung süshia shibai pei chir Molek tsüngrem nem agütsüdir, pajibo südaktsütsüla. Israel telok ajaki pa dak lung agi aontsüla.

³ Shibai pei chir Molek tsüngrem nem tenla agütsüdir, aser kü temeshi tekülemdak menendaktsür, kü temeshi tenüng maksüdaktsüdir ni iba nisung anema noktaktsü.

⁴ Saka iba nisung inyakba anema Israel nungertemi kecha meinyakra aser pa mesüdaktsüra,

⁵ ni kü sasa iba nisung aser par kinunger ajak anema, aser shirnokisa kü dang tamang makatetba mapa inyakba agi Molek Tsüngrem külemer parnok ajak anema ni noktaktsü, aser parnok jentoktsü.

⁶ “Süli aoba aser arasenertem dangi parnok dang asüngdangba nisung anema ni noktaktsü aser ni pa nüburtem nungi jentoktsü.

⁷ Nenok sasa meshiteta liang, kechiaser ne Kibuba nenok Tsüngrem lir.

⁸ Nenoki kü ozüngtem yuang, aser itemji inyakang, kechiaser ni Kibuba aser ni nenok temeshi yanglu.

⁹ Kari pei tebu mesüra tetsü atakatemra, pa südaktsütsü, pai tebu mesüra tetsü atakatem nungji pa zü pa tekolak manung alitsü.

¹⁰ “Tebur shibai tangar kinungtsü den nüktapangtadir, nüktapangtasang aser nüktapangtala tenaprongla südaktsütsüla.

¹¹ Shibai pei tebu kinungtsü den nüktapangtadir pai tebu maksüdaktsüogo. Tebur aser tetsür anaprongla südaktsütsü, parnok zü pei kolak manung alitsü.

¹² Shibai pei jabaso kinungtsü den nüktapangtadir tenaprongla südaktsütsü, kechiaser parnoki kinunger den larlapongba benshiogo, parnok anaprongla südaktsütsüla; parnok zü parnok kolak nung alitsü.

¹³ Tebur kari tebur den tetsür den ama medemra, tenapronglai tesempatsü benshiogo, parnok südaktsütsüla; parnok zü pei dak alitsü

¹⁴ Tebur kati tetsür ka aser la tetsü kinungtsü asütsü agira, aji temenen lir. Nenok rongnung yamala tamajung mapa malitsü asoshi tebursang aser parnok ajak mi agi rongsettsüla.

¹⁵ “Nisung kati shiruru den medemra paji südaktsütsüla; aser nenoki shirurujia tepsettsüla.

¹⁶ Tetsür kari shiruru dangi oa medemra, nenoki tetsürla aser shiruruji tepsettsüla. Parnok atangji südaktsütsüla; parnok zü parnok madak alitsü.

¹⁷ “Nisung kati pei teyi mesüra tenu, pei tebuer jala mesüra tetsür jala agia nüktapangtara, aji maksü mapa lir; parnokji pei nübur nükdang nungi jentoktsüla. Pai pei aianu dak maksü benshi nungji pei menen pai abentsüla.

¹⁸ Nisung kari tetsür ita shilem aoba mapang la den nüktapangtara, pai la azü ayimba jungkai adokdaktsür aser laia aji miima mayu nungji tenaprongla pei nübur nungi jentoktsüla.

¹⁹ Nai netsü tetsü mesüra nebu aianu den nüktapangta tebenshi, kechiaser iba jagi sosem adianu maksüdaktsür. Parnoki larlapongba menen abentsü.

²⁰ Nisung kari pei tebu tambu mesüra tebu tanubu kinungtsü den nüktapangtara, pai pei tebu tambu mesüra tanubuji maksüdaktsür. Parnoki pei tai abentsü, aser parnok techir meli-i asütsü.

²¹ Nisung kari pei tedi-tenu kinungtsü agira, aji memerükba lir, pai pei tedi-tenu odia maksüdaktsür. Parnok tanur malitsü.

²² Kü ozüng aser temelaba ajak nenoki benshiang, sürapangla alinük kobai ni nenok anir odagi aji agi nenok mesaktsüdoktsü.

²³ Nenok jakdang ni aridoktsüba kintem yimsü amato nenoki mebenshitsüla, kechiaser parnoki kü madang item ajak inyak nung ni parnok sempar.

²⁴ Saka iba temo aliba lima nenok nem agütsütsü ta ni nangzükogo. Tangar kintem nungi nenok balaka shimtetba Kibuba nenok tsüngrem ni lir.

²⁵ Anungji nenoki temerük aser memerükba shiruru aser ozüngtem benteta ayutsüla. Memerükba shiruru mesüra ozü shi nenoki machitsüla, kechiaser itemji memerük ta ni shimtettsüogo, aser aji achiba agi nenok pei sasa memerük kümdaktsür.

²⁶ Nenok kü dang temeshi liang kechiaser ni Kibuba temeshi lir. Nenok kü meyong asütsü asoshi kintem dang nungi balaka shimtetogo.

²⁷ Tebur süshia tetsür süshia shiba dak süli-aoba mesüra arasenba tanela lidir südaktsütsüla. Parnok dak lung agi aontsüla, parnok zü parnok dak alitsü.”