LEVI 19 - Ao Naga C.L. Bible (BSI)

Temeshi Aser Ochi Ozüng

¹ Kibubai Mosa dang ashi,

² “Israel nungertem ajak dang shiang. Nenok temeshi liang, Kechiaser ni Kibuba nenok Tsüngrem temeshi lir.

³ Nenok nisung shiai pei tetsü aser tebu aküm tsübutsüla, aser amungnü amungtsüla. Ni Kibuba nenok Tsüngrem lir.

⁴ “Süngyanglu dangi temeyip, kecha teyanglu aser temuluba tsüngrem kecha teyanglu aser tekülem. Ni Kibuba nenok Tsüngrem lir.

⁵ “Kodang nenoki Kibuba nem yimjung tenlatem agütsüdir, ibaji nenok tenüng nung agizüktettsüsa tenla-ang.

⁶ Shiji nenoki tenlaba anogo aser tasüng tashi nung achitsüla. Anogo tasemnübuba tashi shi kar danga anünga lira ajibo mi agi rongtoktsüla.

⁷ Ibaji tasemnübuba tashi chira, aji temenen alitsü, aser tenlaji ni magizüktsü.

⁸ Shibaisa aji chidir, pai pei temenen abentsü. Kechiaser Kibuba dang kechi temeshi lir aji pai menentsüogo, aser iba nisung pei nübur nungi jentoktsü.

⁹ Kodang linük nung alu rudir, ner lu chirongbang tongabo lua teru mesüra ner lu nung nai tsüktok meshimtsüla.

¹⁰ Ner tsükmenatzü lu nungi jetzüka tsükba süngjang bendeni tanaben maotsüla, itemji sensaker aser aenertem asoshi tokjang. NiKIBUBA nenok Tsüngrem lir.

¹¹ “Nai tauya, tashioktsü, mesüra tiyazü tejembi.

¹² Kü tenüng agi tiyazü azüngashi tesü, kechiaser aji agi nenoki kü tenüng menentsür. Ni Kibuba nenok Tsüngrem lir.

¹³ “Nai shinga tekülakokdaktsü, mesüra rakzükraktem tesü. Nai aniba ayanger nem ta-a magütsüi anepdang tashi teyu.

¹⁴ Nai narongjaker atakatem tesü mesüra nükpoker jakdang temetsüdaktsü meyutsütsüla; saka nai ne Tsüngrem tsübutsüla. Ni Kibuba lir.

¹⁵ “Nai o bendangdak ochi mashiba kecha meinyaktsüla, sensaker tejak tereprang mesüra tulur dang balaka tebenshi saka ajak dang ochi agi o bendangang.

¹⁶ Shinga atema tiyazü o meprokshitsüla, aser kodang nisung kar lendong nung lia ne kuli agi pa kümzüktettsüsa lidir nai iba atema jembiang. Ni Kibuba lir.

¹⁷ Nai ne mulungjang nung adianu mesembatsüla, saka nai pa atema temenen bena marutsü asoshi otia arüjang.

¹⁸ Nai shinga daka mang mayangtsüla mesüra ne nüburtem mesembatsüla, saka nai na kiyonger dang pei ama meimtsüla. Ni Kibuba lir.

¹⁹ Nenoki ozüng benshiang. Nai ne kiset shiruru tapu balala den techanu temerepdaktsü, nai ner lu nung metsü tapu ana meproktsüla; mesüra oset balala ana meyoktepa yangluba süoshi ne dak mabentsüla.

²⁰ “Alatsür shiba nisung kari aniasünga lir, saka la chioktsü asoshi talang magütsüi alidang tangar nisung kati la den medemra, parnok metepsettsü, kechiaser la ano mechioki liasü.

²¹ Nisungba jagi Kibuba dangi sentep süki kikümi san tepong ka tai tenla abentsüla.

²² Tai tenla asoshi agütsüba san tepong jagi putiri Kibuba madang nisungba temenen pungidaktsütsü aser Tsüngremi pa tai adoktsü.

²³ “Kodang nenok Kanan limai arua chiyungtsü asoshi süngdong tapu aisü temdir nenoki tejangji küm asem tashi anempong ta züngshitsüla, item küm nungji nenoki süngjangji machitsüla.

²⁴ Küm pezübuba nung süngjang ajakji temeshi alitsü, aji Kibuba dang tenüngsang tenla alitsü.

²⁵ Saka küm pungububa nung nenoki iba tejangji achitsü. Yamaji inyakra nenok nem tali rendaktsütsü, ni Kibuba nenok Tsüngrem lir.

²⁶ “Nenoki kecha oset azü dena machitsüla; nenoki tarutsü indang tetezütsü mesüra arasentsür temezünger mapa teinyak.

²⁷ Nenoki tenapa meketa kar bangsemo tatempanglak memejeptoktsüla.

²⁸ Asür asoshi ne mangyimba sayutsü atema ne mang nung mateptsüla mesüra temaitsü ayak kecha mateptsüla, Ni Kibuba lir.

²⁹ “Ne jalatem nüktapangtatsür küma temenen tebenshidaktsü, aji oda mesüra linükji nüktapangta akümtsü aser temenen agi asüngtsü.

³⁰ Kü amungnü benshiang aser kü tekülemdak aküm tsübuang.Ni Kibuba lir.

³¹ Arasentsür mesüra asür tanela den jembiba nisung dangi nenoki meyipa to, kechiaser parnoki nenok menendaktsütsü. Ni Kibuba nenok Tsüngrem lir.

³² “Tambur dang akhümtsübuang aser parnok tsübutsüla, aser ne Tsüngrem tsübuang. Ni Kibuba lir.

³³ Ner linük nung aliba aener dang mejungi tebenshi.

³⁴ Ne den aliba aenerji nai senso pur ka ama benshiang. Na ama parnok danga meimang, kechiaser nenok Ijip lima nung aener süa liasü. Ni Kibuba nenok Tsüngrem lir.

³⁵ “Tiyazü tasadangba, toudangba, mesüra tazüngba amshiba agi shinga tashioktsü.

³⁶ Ochiba tasadangba, toudangba, aser ochiba tasazük nenoki amshitsüla. Nenok Ijip nungi anir adok, ni Kibuba Tsüngrem lir.

³⁷ Nenoki kü temelaba ozüngtem aser kü o bendang ajak ayutsüla aser item sülen anitaktsüla. Ni Kibuba lir.