LEVI 18 - Ao Naga C.L. Bible (BSI)

Shiazü Medemba Anema Ozüng

¹ Kibubai Mosa dang ashi,

² “Israel nungertem dang shiang, Ni Kibuba nenok Tsüngrem lir.

³ Nenok aliba Ijip lima nung inyakba ama mesüra Kanan nunger koba limai ni nenok anir odagi parnoki inyakba ama nenoki meinyaktsüla.

⁴ Kü ozüngtem tashi angang, aser ni nenok dang melaba inyakang, ni Kibuba nenok Tsüngrem lir.

⁵ Ni nenok nem agütsüba yimsü ozüngtem nenoki benshiang; aji benshiba agi nisung taküm alitsü. Ni Kibuba lir.

⁶ “Shingaia pei sosem den nüktapangtatsü asoshi anasai maotsüla. Ni Kibuba lir.

⁷ Nai netsü shiba nebu kibutsü lir la maksüdakja la den temedem.

⁸ Nai nebu kinüngtsü den maksü tebenshi, aji nebu maksü lir.

⁹ Ne adianu, nebu mesüra netsü jala, kidang mesüra tangalen asoba den temedem.

¹⁰ Nai pei semchir den temedem, kechiaser aji na asoshi maksü lir.

¹¹ Nai rabitsür jala den temedem: kechiaser la ne adianu lir.

¹² Nai nebu adianu den temedem, kechiaser la nebu kinunger lir.

¹³ Nai netsü adianu den temedem kechiaser la netsü kinunger lir.

¹⁴ Nai nebu tambu mesüra tanubu kinüngtsü den temedem kechiaser la namu lir.

¹⁵ Nai ne jabaso kinungtsü den temedem kechiaser la ne jabaso kinungtsü lir. Nai la mak tesüdaktsü.

¹⁶ Nai nedi mesüra nenu kinungtsü den temedem aji nedi mesüra nenu maksü lir.

¹⁷ Nai tetsürla aser la jala den temedem, lar jabasor jala mesüra lar jalar jala den temedem; parnokji anasatiba kinunger lir. Aji larlapongba lir.

¹⁸ Nai ne mezüng kibutsü taküm alidang teyi mesüra tenu den toktepa kibutsü asütsü maksü tebenshi.

¹⁹ “Tetsür ita shilem aoba mapang la den temedem.

²⁰ Nai ne kiyonger kinüngtsü den temedem. Aji agi na la den külemi menentsütsü.

²¹ Nenok chir shinga Molek Tsüngrem külemtsü magütsütsüla. Kechiaser nenoki nenok Tsüngrem tenüng memenentsütsüla, Kibubai lir.

²² Tebur shingaia tebur den memedemtsüla; ibaji Tsüngremi sempar.

²³ Tebur süshia tetsür süshia shingaia shiruru den memedemtsüla, aji tesempatsü lir.

²⁴ “Ne sasa ibala kecha nunga temenen temena, kechiaser ni nenok jakdang aridokya aliba kintemi ibala ajak nung menena lir.

²⁵ Alinükjia menena lir. Anungji iba temenen asoshi Kibubai parnok merenshitsü, aser alinüki iba nüburtem saktsüdoktsü.

²⁶ Saka nenoki kü ozüng aser temelabatem benshitsüla. Sensopur süshia nenok den aliba bendangeri süshia iba tesembatsü mapaji meinyaktsüla.

²⁷ Kechiaser ibala mapaji item nisungtem shir nenok dang tama iba linük nung liasü, parnoki inyakba agi alinükji menentsü.

²⁸ Nenoki linükji menentsüra, nenok jakdang tamasa aliba nisungtem saktsüdokba ama nenoka saktsüdoktsü.

²⁹ Kari danga yamala tesempatsü mapaji inyakra, parnokji pei nübur nungi jentoktsüla.”

³⁰ Aser Kibubai ashi, “Kü ozüngtem nenoki angang, aser nenok jakdang aliba nisungtemi inyakba sülen manidaktsüla, nenoki ibalaji inyaker pei sasa menena teküm. Ni Kibuba nenok Tsüngrem lir.”