LEVI 17 - Ao Naga C.L. Bible (BSI)

Azü Machitsü Indang

¹ Kibubai Mosa dang ashi,

² “Aron aser par chirnurtem aser Israel chir ajak dang shiang: Ibai Kibubai melaba lir.

³ Israel kidong rongnung shibaisa tanendak tezülen nashi, san mesüra nabong tepsetdir,

⁴ aser aji tekülemdak sentep süki nung Kibuba nem tenla magütsüra, azü tokshiba tai pa madak alitsü, aser pa azü tokshiba yong pei nübur nungi pa jentoktsü.

⁵ Israel nungertemi koba tenla moapu nung tepseter, aji Kibuba dangi bener arua sentep süki kiküm nung telungjem tenla asoshi putir nem agütsütsüla.

⁶ Putiri iba züji sentep sü ki tenladak sabang nung rükloktsütsü aser temoji teronem tajung asoshi Kibuba dangi arongtsü.

⁷ Joko Israel neburtemi Kibuba dang tamang makatetba mapa inyaka moapu shiruru tepseta tenla agüja jabujari mapa meinyaktsü. Ibai parnok atema putu ajak nung ozüng alitsü.

⁸ “Nai parnok dang shiang, Israel kidang kari mesüra nenok den aliba bendanger rongnung shibai tarongba tenla, mesüra tetepsetba tenla agütsüdir,

⁹ aser aji Kibuba dang tenlatsü asoshi sentep süki kikümi bener marulir, iba nisung pei nübur rongnungi jentoktsü.

¹⁰ “Israel kidong rongnungi mesüra nenok rongnung aliba bendanger shibai shi den azü chidir, pa anema Kibuba alitsü, aser pei nübur nungi jentoktsü.

¹¹ Kechiaser shi takümji azü nung lir, anungji meimchir menen pungitsü asoshi azü ajak tenladak sabang nung agütsütsüla ta Kibubai mela. Azü koba nung taküm lir aji agi menen pungir.

¹² Anungji ni Israel nunger dang ashi, nenok süshia nenok den aliba bendanger süshia azü machitsüla.

¹³ “Israel kidong kari mesüra nenok den alir bendanger rongnung kari tachitsü asoshi temerük shiruru mesüra ozü kar kasetra shiji achitsü saka iba züji ali agi yapanga toktsütsüla.

¹⁴ Kechiaser shi takümji azü nung lir, anungji Kibubai Israel kidong dang azü machitsü indang ashi, aser kari aji mangara pa pei nübur rongnungi jentoktsü.

¹⁵ “Israel kidong süshia bendanger süaka, tasü shi, pei sasa asüba süaka shiruru tangari shisatsüba süaka shibai itemji chidir, pei süoshi shitoktsü aser tzü chigutsüla, aser pa nikongtsütsü pa merükteta mapang matong tashi atatsüla.

¹⁶ Pai yamaji meinyakra pei temenen pai abentsü.”