LEVI 12 - Ao Naga C.L. Bible (BSI)

Tanur Sor Meshitetba

¹ Kibubai Mosa dang ashi,

² “Israel nungertem dang shiang: tetsür mashisa kümra, aser lai jabaso ka sora idangji la anogo tenet memerüki alitsü, aji tetsür ita shilem aodang memerüki aliba amato alitsü.

³ Anogo tinü buba nung tanurji mejeptoktsüla.

⁴ Anogo semer asem tashi tetsürji asüngteta alitsüla, la merüktetba anogo tashi oset kecha nunga mekongshitsüla mesüra tekülemdaki marutsüla.

⁵ “Lai tetsür ka sora, la ita shilem aodang anogo ter-pezü memerüki aliba amato la memerüki alitsü, aser la meshitetba anogo mabensa tashi anogo roker trok asüngteta alitsüla.

⁶ “Kodang jabaso saka jala saka meshitetba anogo abensadir, sentep süki kikümi putir dangi lai küm ka tain san chanu ka tarongba tenla asoshi, aser posü mesüra guduru ka temenen tenla asoshi bener arutsüla.

⁷ Putir jagi Kibuba dang la tenlaji agütsütsü, aser la meshiteta alitsü. Tetsürtemi tanur tebur süshia, tetsür süshia asoba aben ibai inyaktsüla.

⁸ “Tetsür jagi san chanu ka bener marutetra, pai posü ana mesüra guduru ana tarongba tenla asoshi, aser tangabaji temenen tenla asoshi ta agütsütsüla aser putiri la asoshi temenen pungitsü aser la meshiteta alitsü.”