DANIEL 9 - Ao Naga C.L. Bible (BSI)

Daniel Sarasadem

¹ Media kin Ahasuerus jabaso Darius mezüngbuba küm nung, shiba Kaldi nunger yimli madak chuba atadakja liasü,

² pa yimsüsüba mezüng küm nung, ni Daniel, Yerimia ainkar dang Kibubai Yirusalem raksa-a küm yongsük jungkai adokdaktsüba kakettem nung aji küm neter ta ni angatet.

³ Anungji ni sarasademba aser temepishiba agi, lumia aser anem sü aben, aser aut mezüa ni Kibuba Tsüngrem dangi kü tejak meyip.

⁴ Aser Kibuba kü Tsüngrem dang ni sarasadem, aser tai nangzüka ashi, “Oh Kibuba, tulusang aser akhüm tsübutsü Tsüngrem, na meimer aser ne ozüng benshir dang nai ne tezüngzüktepba aser yimlibilem akar.

⁵ Onoki tai menaogo aser aibelenogo, aser mejungi inyakogo, aser tashi manga; oda ne ozüng nungi aser ne yimsü ozüng nungi meyipadokogo,

⁶ aser ne tenzüker ainkartem shirnoki ne tenüng nung, ozü chubatem, yimsüsürtem, aser tsüraburtem dang, aser linük nisung ajak dang jembi, parnok dang onoki manga.”

⁷ Oh Kibuba, ochiba ne meyong lir, saka tanü aliba ama, Yihuda nunger, Yirusalem nung alirtem, aser Israel ajak, nai aridokba linük ajak nung, ana nung aser talang nung alir, parnoki na anema ozüng raksaba yong onok asoshi maksü dang lir.

⁸ Oh Kibuba, onoki na anema temenen mena nungji, onok asoshi, ozü chubatem asoshi, onok tamarenertem asoshi, aser onok tsüraburtem asoshi maksü agi atonger.

⁹ Kibuba ozü Tsüngrem meyong yimlibilem aser tatok lir; kechiaser onoki pa anema apuso.

¹⁰ Kibuba ozü Tsüngremi onok tsüngdang pa ozüng nung jajatsü ajaba onoki manga.

¹¹ “Hau, Israel ajaki ne ozüng raksaogo, aser ne ola mangai meyipadokogo, anungji atakatem aser tenangzükba koba Tsüngrem tenzüker Mosa ozüng nung zülua toktsü, iba atakatem nai onok dak meküploktsüogo; kechiyong onoki pa anema temenen menaogo.

¹² Onok anema aser onok madak shirnoki yimsü asür, parnok anema pai jembiba onok dak lendong tulu arudaktsüba agi pai sayangtsüogo. Kechiyong anüng kübok ajonga nung Yirusalem dak inyakba ama meinyak

¹³ Mosa ozüng nung zülua aliba ama, iba lendong ajak onok dak tongogo; aji saka onok tai nungi meyipa aser ne atangji nung temulung tanga onoki Kibuba ozü Tsüngrem yimlibilem mebushi.

¹⁴ Anungji Kibubai lendong renema ayu aser aji onok madaki bener aru; kechiyong Kibuba onok Tsüngrem pei mapa ajak nung ochi inyaker, aser onoki pa ola manga.”

¹⁵ “Aser tang, Kibuba ozü Tsüngrem, shibai tashi tait teka agi Ijip lima nungi ne nübur anir aru, aser tanü aliba ama, ne nüngsang bena aru, onoki temenen menaogo, onoki mejungi inyakogo.

¹⁶ Oh Kibuba, ne temeshi mapa ajak ama, ne ain adokba aser ne mit adokba, ne yimti Yirusalem, ne temeshi tenem nungi meyipa odakjang ta ni ne dang mepishir; kechiaser ozü temenen yong, aser ozü tsürabur tai yong onok meketa alir ajak tsüngdang Yirusalem aser ne nüburtem tai taaktsü otsü ka kümogo.

¹⁷ Anungji tang, Oh ozü Tsüngrem, ne tenzükeri sarasademba aser mepishiba angang, aser ne tenüng atema danga, Oh Kibuba, menena aliba ne temeshidak, ne tejak agi yalokjangma.

¹⁸ Oh kü Tsüngrem, ne narong tenjang aser angangma; ne tenük lapokang aser ozü azüngmeyaka aliba aser ne tenüng nung ajaba yimti dak ajiangma, kechiyong ozü temeshiba yong ne tsüngdang mepishir masü, saka ne taochi tulu aliba yong mepishir.

¹⁹ Oh Kibuba, angashiang, Oh Kibuba, tai tokang; Oh Kibuba temulung agüjang aser inyakang. Oh kü Tsüngrem ne tenüng atema danga, menua teli, kechiaser ne yimti aser ne nübur ne tenüng agi ja-a lir.”

Gabrieli Shin O Ratettsüba

²⁰ Kodang ni jembia liasü, aser kü temenen aser kü nübur Israel temenen nangzüka sarasadema liasü, Kibuba kü Tsüngrem madang kü Tsüngrem temeshi tenem asoshi mepishia liasü.

²¹ Ni ano sarasadema jembidang, Gabriel nisungbaji, shiba mezüng mangdang nung ni angu, pa nikongdang tenla mapang nung ilunga yima kü dangi aru;

²² aser pai kü dang angatetdaktsütsü aru aser kü den jembia ashi, “Oh Daniel, ne nem tashi temetet aser tangatetba agütsütsü tang ni arua lir.

²³ Ne temepishiba tetenzüklen temelaba ka aru, aser ni ne dang ashitsü aru; kechiyong na kanga temeimba lir. Anungji oji shisadangang, aser mangdangji angatetang.”

²⁴ “Ozüng raksaba anentsü, temenen menaba ojang asütsü, tai menaba pungtoktsü, teti tatem maka temeshiba anioktsü, mangdang aser ainkar ajenbanga ayutsü, aser Temeshitiba talidak mezüja shimtettsü, ne nüburtem asoshi aser nenok temeshi yimti asoshi hapta neter züngzükja lir.

²⁵ Anungji ya metetang aser angatetang, Yirusalem yanglushitsü aser tanaben yanglutsü temelaba o aoba nungi mezüja shimtetba, chuba chir aru tashi hapta tenet alitsü; ajiser hapta roker ana yimdong aser settu dena oda timtem tensa nung aji yanglushitsü.

²⁶ Aser mapang tatembang nung, hapta roker ana sülenji, mezüja shimtetsangji leptokadoktsü, aser kecha makatsü, aser tarutsü aliba chuba chir nübur jagi yimti aser temeshidakji raksatsütsü; aser pa tatembangji tzü metsüng agi alitsü, aser tatem tashi rara alitsü, azüngmeyaka alitsüji renemogo;

²⁷ aser aika den hapta ka asoshi pai akang akanga tezüngzüktepba yanglutsü, aser hapta tesadang kaji tekülemba aser tenla agütsüba anendaktsü, aser tesempatsütem melenji teraksatsü atemzüka aliba tatem matong tashi, teraksatsüba madak meküploktsütsü.”