DANIEL 6 - Ao Naga C.L. Bible (BSI)

Dairus Chubai Daniel Ajongketba

¹ Yimli ajonga madak yimsü asütsü tongtipur noklang ka ser metsü ayutsü Dariusi mulung;

² aser parnok madak mendenpur asem, aser kabo Daniel liasü; oda chuba takoksa malutsü aser pa dang metetdaktsütsü asoshi item tongtipur khu liasü.

³ Aser item mendenpur asem aser tongtipur dang nungi Daniel balaka shisanga aküm, kechiaser pa dak tanela kanga balaka liasü; aser yimli ajonga madak pa yutsütsü chubai atong.

⁴ Idangji mendenpur aser tongtipurtemi Daniel anema yimli nung pa tai aputsü jenjang bushi; saka parnoki jenjang mesüra tai kecha meputet, kechiaser pai temulung lema tenzük, aser pa dak aibelenba mesüra tai kecha mangu.

⁵ Idangji item nisungi ashi, “Pa Tsüngrem ozüng len dangashi asenoki iba Daniel anema kecha jenjang mangutsü.”

⁶ Idangji item mendenpur aser tongtipur chuba dangi külemi nungtepa arua pa dang ashi, “Darius chuba, teti taküm liang.

⁷ Yimli nung mendenpur ajak, tir, tongtipur shisa agütsür, aser governortem külemi sentepa, chubai tzüzüng-ozüng ka yanglutsü, aser ozüng tesashi ka yanglutsü bangjemtepogo, oda shibaisa, Oh chuba, ne dak alema, tsüngrem mesüra nisung kar dang semernü tashi sarasademdir, pabo molusongzü kangla nung puoktsütsü.

⁸ Tang, Oh chuba, Media aser Persia nunger memelenshitetba ozüng amato aji memelenshitsü atema ozüng tesashi yangluang aser tezüluba nung tenüng züluangma.”

⁹ Yamaji, Darius chubai tezüluba aser ozüng nungji tenüng zülu.

Danieli Maneni Sarasademba

¹⁰ Aser kodang Danieli tezüluba nungji tenüng züluogo ta metet, pai pei kidangi ai; tang pa kichibatemji pa temaba taktang nung Yirusalem tsütsü lapoka liasü; aser pai anogo nung asemben temokok agi apudak, aser sarasadem, aser pai mezüng inyakba ama pa Tsüngrem madang tenüng asang.

¹¹ Idangji item nisung külemi nungtepa aru, aser Danieli pa Tsüngrem madang sarasademba aser mepishiba parnoki angu.

¹² Idangji parnoki chuba anasa aru, aser chuba ozüng indang chuba dang ashi, “Na dak alema, Oh chuba, shibai anogo semer tsüngda nung tsüngrem mesüra nisung kar dang sarasademdir, pa molusongzü kangla nung puoktsütsü ta ozüng nung nai mezülu no?” Chubai langzüa ashi, “Media aser Persia nunger memelenshitetba ozüng amato aji noktaka lir.”

¹³ Idangji parnoki chuba dang langzüa ashi, “Daniel, shiba Yihuda lima nungi tepuoker ka lir, Oh chuba, pai na mesüra ne ozüng mesükoker, saka anogo nung asemben sarasademer.”

¹⁴ Idangji chubai item o angashidang kanga mepelai aküm, aser Daniel kümzüktsü pa mulung nung atong; aser anü malu tashi pai pa kümzüktsü kanga merang.

¹⁵ Idangji item nisung chuba dangi külemi nungtepa aru aser chuba dang ashi, “Oh chuba, ozüng mesüra tzüzüng-ozüng chubai yangluba kecha memelentsü Media aser Persia nunger ozüng lir.”

Daniel Molusongzü Kanglai Yokba

¹⁶ Idangji chubai mela, aser parnoki Daniel anir aru aser molusongzü kangla nung puoktsü. Chubai Daniel dang ashi, “Ne Tsüngrem shiba nai maneni tenzüker, pai na kümzükangma.”

¹⁷ Aser lung ka bena aru, aser molusongzü alidak kishi bang nung ataloka yutsü; aser chubai aji pei tenüng ajenba, aser par tamarenertem tenüng ajenba agi, oda Daniel indang kecha temelenshi makatsü ajena toktsü.

¹⁸ Idangji chubai pei kidangi ao, aser paonungji mechiyungi süidaktsü, mesüra pa dangi shinga anir marudaktsü, aser pa amua moutet.

Molusongzü Nungi Daniel Kümzükba

¹⁹ Idangji chuba anepdang yakta shishi, aser ilunga molusongzü kanglai ao.

²⁰ Aser pai Daniel alidaki molusongzü kanglai aru, aser pai tejashi ola agi ayimtena Daniel dang ashi, “Oh taküm Tsüngrem tenzüker Daniel, ne Tsüngrem shiba nai maneni tenzüker, pai molusongzütem nungi na kümzüktsü koker ma?”

²¹ Idangji Danieli chuba dang ashi, “Oh chuba, teti taküm liang.

²² Kü Tsüngremi pei kotak tenyar yok, aser molusongzütem tebang shibangtsü, aser parnoki kü dak kecha mesüka; kechiaser pa madang kü dak tai maket angu, aser ano ne tsüngdanga, Oh chuba, ni kecha tai meinyak.”

²³ Idangji chuba kanga dang pela, aser parnoki Daniel molusongzü kangla nungi anitetang ta mela. Anungji Daniel kangla nungi anitet aser pa dak kecha zübu mangu, kechiaser pai pei Tsüngrem dak amang.

²⁴ Aser chubai ozüng agütsü, aser Daniel aitsür nisungtemji anir aru, aser parnoki molusongzü kangla nung parnokji puoktsü, parnok, parnok chirtem, aser parnok kinungtsütem; aser parnoki kangla bonglang matongdangsa, molusongzüi parnok angepzük, aser parnok teret anüka raksatsü.

Dairus Chuba Tamang Akangshiba

²⁵ Idangji alima nung alir ajak, nübur, kin, aser oshi ajak dangi Darius chubai zülu; “Nenok den tesünep züinang.

²⁶ Kü yimli yimsüsüba ajak nung, Daniel Tsüngrem madang atentenang aser tsübuang ta ni ozüng ka yanglur. Kechiyong pa taküm Tsüngrem, teti marakzüi aliba; aser pa yimli kodanga mesamatsü, aser pa yimsüsüba teti tatem tonga alitsü;

²⁷ pai kümzüker aser soter, kotak aser alima nung pai temaitsü aser tesüngmangtsü inyaker; pai molusongzü ain nungi Daniel kümzük.”

²⁸ Anungji iba Daniel Darius chuba tendak, aser Persia nunger Cyrus chuba tendak azükarua ali.