DANIEL 5 - Ao Naga C.L. Bible (BSI)

Belshazzar Benjong

¹ Belshazzar chubai par tamarener meyirijang ka asoshi benjong tulu yanglu, aser meyirijang jakdang yi ajem.

² Belshazzari yiji jemer külen, tebu Nebukadnezzari Yirusalem tenlaki nungi bener arua aliba hon aser taribi marok ausutem, chuba aser par tamarenertem, par kinungtsütem aser pa tetongtem item nung ajemtsü asoshi bener arutsü mela.

³ Idangji Yirusalem nung Tsüngrem tenlaki nungi bena aruba hon ausu parnoki bener aru; aser chuba aser par tamarenertem, par kibutsütem aser pa tetongtem item nungi ajem.

⁴ Parnoki yi ajem, aser hon aser taribi, yongmenyin, merang, süng, aser lung tsüngremtem tenüng asang.

Jara Nung Zülu

⁵ Idangyongji nisung ka teka temeyong adok aser milendong jakdang chuba ki jara temezüba manung zülu. Aser teka agi zülubaji chubai angu.

⁶ Idangji chuba tejak paklapakla-a aküm, aser pa shisa bulu, aser pa tetsüng tepen zükla zükla-a aküm, aser pa temokok tsüktep.

⁷ Tepuar Kaldi nunger, aser petinu takzür anir arutsü chubai tashi agi ayimten. Babilon tashi temetetertem dang chubai ashi, “Shibaisa iba züluba züngdir, aser iba tetezü kü dang sayudir, chuba sü abendaktsütsü, aser pa tekong nung hon zük azüktsütsü, aser yimli nung tasembuba tongti yimsüsür asütsü.”

⁸ Idangji chubar tashitemeteter ajak ait, saka parnoki zülubaji mezüngtet mesüra chuba dang tetezüji mesayutet.

⁹ Idangji Belshazzar chuba kanga shisa bulu, aser pakla-pakla-a aküm, aser par tamarenertem ratamata.

¹⁰ Chuba aser par tamarenertem asatep nung chubatsür benjong ki jagi ait, aser chubatsüri ashi, “Oh Chuba, teti taküm liang. Na shisa tebulu, mesüra na pakla-pakla-a teküm.

¹¹ Ne yimli nung, nisung ka dak temeshi Tsüngrem tanela lir; aser nebu tendak pa dak tesangwa aser tangatetba aser shisatsü ngua liasü, anungji nebu Nebukadnezzari chuba ain sayur, tepuar, Kaldi nunger, aser petinu takzür madak pa temaba kümdaktsü.

¹² Kechiaser Daniel, shiba dang Belteshazzar ta chubai jatsü, pa dak tanela balaka, aser temetetba, aser tangatetba, pungmang ratettsü, miim o ratettsüba, aser ratamataba endoktsütsü pa dak tashi liasü. Tang Daniel tajai yokang, aser pai ne dang tetezüji ashitsü.”

Jara Nung Zülu Ratettsüba

¹³ Idangji Daniel chuba madangi anir ait. Chubai Daniel dang ashi, “Kübui Yihuda nungi anir aruba Yihuda tepuoker ka, Danielji na südi?

¹⁴ Ne dak Tsüngrem tanela lir, aser tesangwa aser tangatetba aser mongyin shisatsü ne dak lir ta ne indang ni angashiogo.

¹⁵ Aser tang tashi temeteter nisungtem aser tepuar iba züluba parnoki azüngtsü aser iba tetezü kü dang sayutsü asoshi kü tsüngdangi anir aruogo; saka parnoki iba indang tetezü kü dang mesayutet.

¹⁶ Nai tetezü agütsütsü aser ratamataba endoktsütsü akok ta ni angashiogo. Tang nai zülubaji azüngtsü aser iba tetezü kü dang sayutsü kokra, chuba sü ne nem abendaktsütsü, aser hon zük ne tekong nung azüktsütsü, aser yimli nung tongti yimsüsür tasembuba asütsü.”

¹⁷ Idangji Danieli langzüa chuba madang ashi, “Ne sempettemji ne meyong sang, aser ne taaji tangar nem agüjang; aji saka tezülubaji ni chuba dang züngdi, aser pa dang tetezü sayudi.

¹⁸ Oh Chuba, Tematiba Tsüngremi nebu Nebukadnezzar nem yimli, aser tamaren, aser sentsüwangshi, aser akhüm agütsüogo;

¹⁹ aser pai pa yamai ulutsüba yong, nüburtem, kintem, aser oshi ajak, pa tsüngdang atenten aser tsübu. Pai tepsetnüba pai tepset, pai yunüba taküm ayu; pai ajungketnüba pai ajungket.

²⁰ Saka kodang pa mulung mezümeküma aküm aser pa shisatsü temerang küma pa sünütsü asü, idangji chuba menden nungi pa atsüngdok aser pa sentsüwangshi pa nungi agien.

²¹ Aser pa nisung rongnungi aridok; aser pa mulung shiruru mesüka kümdaktsü, aser pa alidak arem gadotem den liasü, aser Tematiba Tsüngremi meimchir yimli madak yimsü asür, aser pai shibasa mulunger parnok iba madak yutsür, ta pai memetet tashi nashi ama pa nem rem chidaktsü, aser pa temang anüng azüngtzü agi metendaktsü.

²² Aser na par chir, o Belshazzar, ya ajak nai metetaka, nai ne mulung ajemalua maküm.

²³ Saka kotak Kibuba anema ne sasa noktak, aser pa kidang aliba marok ausu ne tsüngdangi bener aru, aser na aser ne tamarenertem, ne kinungtsütem, aser ne tetongtem item nungi yi ajem; aser nai taribi aser hon yongmenyin, merang, süng, aser lung tsüngremtem kobai mangur, mangashir aser memeteter itemji tenüng asang, saka Tsüngrem shiba ket nung ne tangula lir aser ne sentong ajak pa meyong lir, nai pa sentsü mewangshidaktsü.

²⁴ “Idangji pa tsüngdang nungi tekaji yok,

²⁵ aser zülua alibaji ya, MENE, MENE, TEKEL, aser PARSIN.

²⁶ Iba tetezüji ya: MENE, Tsüngremi ne yimli sükdangogo, aser aji tatem kümdaktsüogo;

²⁷ TEKEL, na seret nung odangogo aser seret matu;

²⁸ PERES, ne yimli sadangogo, aser Media aser Persia nunger nem agütsüogo.”

²⁹ Idangji Belshazzari ozüng agütsü, aser Daniel chuba sü abendaktsü, aser pa kong nung hon zük azüktsü aser yimli nung pa tongti yimsüsür tasembuba asütsü ta sangdong.

³⁰ Paonungjisa, Kaldi chuba Belshazzar tepseta adok.

³¹ Aser Media nunger Dariusi yimliji agizük, shiba arishi küm roker ana shi liasü.