2 TIMOTI 4 - Ao Naga C.L. Bible (BSI)

¹ Ni Tsüngrem tsüngdang aser akümlir aser asür o bendanger Khrista Yisu tsüngdang, pa adokba aser pa yimli agi ne dang ozüng ya melar,

² nai oji sayutsüngiang; mapang nung aser mapang masü dang jangra-ang; talangka aremzükba aser sayuba ajak agi arürjang, metongshijang, ajungshiang.

³ Kechiyong koba mapang nung parnoki atangji sayuba maremzüktsü, saka pei-i anganüba dang angatsü pur küma, pei azüabungba amato pei sasa asoshi tesayur telong telong ayutsü,

⁴ aser ochi nungi parnok tenarong meyipa otsü dangi mashileni aotsü; ibala mapang arutsü.

⁵ Saka nai ajak nung teshisadangba liang, timtem aremang, sayutsüngir mapa inyakang, ne tenzükba mapa abensa-ang.

⁶ Kechiaser ni joko taküm agütsütsü mapang tongogo, aser ni pilatsü mapang aitogo.

⁷ Ni rara tajungji raraogo, ni alizüng tonga asemogo, ni tamangji yuogo.

⁸ Tang nungi ni asoshi temeshiba korang, koba Kibuba ochi o bendangbai kü nem dang masü, saka shiri pa jungkai adokba dakji meimer, parnok nemjia agütsütsü.

Timoti Dang Ashiba Otem

⁹ Kü dangi yakta arutsü nai merangang.

¹⁰ Kechiyong Demai iba akümli meim nung, ni toktsür Tesalonikai ogo;

¹¹ Kresken Galatiai aser Tita Dalmatiai ogo. Luk dang kü den lir. Nai Mark ne den anir arungma, kechiaser tenzükba mapa nung pa ni asoshi teyariba lir.

¹² Ni Tukika Efesai yok.

¹³ Ni Troa nung Karpo ket nung yutsüba kü indang semoksü to, aser kakettem, tongtibangsa shiküp kakettem to, na kodang arudir, itemji bener arungma.

¹⁴ Alexander, yongmenyin atsüsangi kü dang kanga majung benshi. Pa mapa yari Kibubai pa nem meyipa agütsü.

¹⁵ Pa atema na-a kümdangang, kechiyong pai onok o kanga dang noktang.

¹⁶ Ni tamasa kü temeten indang jembidang, shingaia kü den masem, saka ajaki ni toktsü, aji parnok anema Tsüngremi tezüngloktsüma.

¹⁷ Saka ni agi osangji abensa-a sangokdaktsütsü, aser Bendangertem ajaki angashitettsü asoshi, Kibubai ni anasa noktaka, ni tashi itdaktsü. Aser ni molusongzü tebang nungi kümzük.

¹⁸ Mapa tamajung ajak nungi sota kotak Yimli asoshi pai kümzüktsü. Pa dang sentsüwangshi teti tatem maka sang Amen.

Tatem Salem O

¹⁹ Nai Priskila aser Akula, aser Onesifora kibong dang salem metetdakjang.

²⁰ Erasta Korint nung lir, saka Trofima shiranga ni Mileta nung toktsü.

²¹ Nai tsüngkhüm maitdang arutsü merangangma. Eubula, Puden aser Lino aser Klaudia aser adianu ajaki ne nem salem agütsür.

²² Kibuba ne tanela den liang. Ne den taochi liang.