Tayta 1 - Wëël Jwøk

Määdhe

¹ Aana Pøøl na laŋ Jwøk ni näga nyïïatwiel mar Jecu Krictø, kiper nee ŋäädhe mar jøøa jier Jwøki nee cääth nyïm, ki moa dege ŋääö ra adïëri ni wø kïth jiy jöör Jwøk,

² kiper mana ŋääthge kwøw mana näk adïëri mo bäŋ cuŋŋe mana buuk Jwøki cøøn, eni na kuc tööt.

³ Ni beeye na nyooth kawaane kanya näk kare ki køør dwøre, ki køør luumma wëëk aani ni køba kiper mana ö Jwøki na näk Pïëmi marø na kööm aani.

⁴ A göönna baŋï, ï na Tayta, ï na wääda ma adïëri ki ri ŋäädhe mana nywaaø. Met ec ki bëët-mëër ni en jï Jwøk na näk Wuuö ki Krictø Jecu na näk Pïëmi marø, en bäätï.

Tïïc Mano Tïïc Tayta Kariit

⁵ 'Ba gïna wiia ïïni Kariit kipere, beeye kiper nee gïïa näk ogwäyö dwøgï karge, ni kwänyï ki jaae kiper acook Jwøk yïth päänye bëët, kaawat mana caana gø jïrï,

⁶ na jiy mo bäŋ ajäla ri bëëtö marge, mo määrge oceele, na jiy mo nyïïge ojïëy ni ŋääthge, ni paa jiy mo di køø, ni räänyö ki japge, wala wïthge teek.

⁷ 'Ba ŋat wø raŋ acooŋ Jwøk, kiper mana tïme na ŋat wø tïny Jwøk, doo bäŋ ajäla ri bëëtö mare, ni paa ŋat mo koorrø, wala ŋat mo cwïnye laara ränynyö ni wëëre, wala ŋat meeye, wala wïnni, wala ŋat mo cwïnye päl kiper gïn joode.

⁸ 'Ba eni doo tïmö na ŋat mo pänhnha wëëlle, ni mëër ka gïïa beyø, ni wïïe leer, ni bëëte tiir, ni cwïnye ena køør Jwøk, ni ree ee mänö ki raay.

⁹ Ni eni doo maga luumma näk adïëri keda mana pwönynyi ki gø, kiper nee tïme ni maara pöö ki pwöc ma adïëri, ni pïëme ki jø wø taak pwöc moe thuwø.

¹⁰ Kiper da jiy mo thööth mo wïthge teek, mo wø cara oballe, na jø cwøk, ni käätha jøø no odaŋø røk yøø.

¹¹ Män geni nee lïŋge, kiper ge kiera wïth tuŋi møga karge bëët, kiper mana pööge ki pwöc mana ba dege pöö ki gø. 'Ba pwöc marge bee kiper nee ge jïtge ki gwel ki jöö mo patha kare.

¹² 'Ba këëlla dhaanhø aciel dïge ma nyikuŋ jwøge aköö, ni «Jø Kariit gena dïtööte cooth, ni gena lääy mo reyø, ni dëëtge leth na jø wärö.»

¹³ 'Ba luummögø beeye adïëri. Kiper manøgønø, jook geni ki luubö mo teek, nee putge jïëy na adïëri ni ŋääthge,

¹⁴ ni ba cekge ïthge ki leere mo jø Juuth, wala dööt jøøa kweer ka adïëri.

¹⁵ Kiper jammi bëët wø beyø jï jø wø cwïnyge leer, 'ba ki jï jø wø cwïnyge reyø na näk patha ojïëy, bäŋ gïn mo beer mo ŋäcge. 'Ba acaacge kiree ki cwïnyge reyø.

¹⁶ Ge wø köö ni Jwøk ŋäcge møn, 'ba ege kwierø ki køør jap wø tïïcge. Ge reyø døc, na jø adhala, ni ge ba rømi ki tïïc gïn mo beer, bäre bäre.