Mathiew 11 - Wëël Jwøk

¹ 'Ba na løny Jecu ki pwöny bääge moa na apaar kurriiø, ena aay kaace ni ci kuna pööye ni køpa luum Jwøk dï mïëri.

Kanya Ö Jøønni Na Pëëe Kiper Jecu

² Kanyøgøøni Jøøn na näk dïlööy na nyuudhi na en øt twöc, kanya wïny tïïe mo Krictø, dwøl ajääŋŋe ki bääge,

³ ni pëënynya Jecu, ni «?Bee ïïni, ŋata wäŋŋi ni öö, wala cäŋwa dhaanhø mør neetø?»

⁴ Ni dwøgi ya Jecu jïge, ni «Cou ni køpu gïï wïnynyu ni neetu ii jï Jøøn,

⁵ ni cööye nyeŋge adøø karge, ni ö ŋööte ni cääthge, ni ö jøøa näk dëëtge da dhøøbø ni døø dëëtge karge, ni ö meŋŋe ni wïnyge luup, ni ö jøøa näk othøw ni tïŋ ge maal ki yi thøø, ni ö jøøa canni ni køp luumma nyään na met jïge.

⁶ 'Ba gwïëth en bäät ŋat maa käre taaø.»

⁷ 'Ba kanya aac bääk Jøønni, Jecu atägö ki man caan gïr Jøøn jï lwaak, ni kööe, na «?Agïnaŋø na cou baŋe paap nee neennu? ?Aŋø, u cøøa baŋ otöök mo tuuŋŋa jame?

⁸ ?A agïnaŋø na cou baŋe nee neennu? ?U cii nou neena ŋat mo oruyö ka abïïe mo beyø? Neennu, jø wø käär abïïe mo beyø wø bëëdö kwör bëëte mo nyeye.

⁹ ?A aperŋø nø, na cou paap? ?U cøøa kuna neennu nyikuŋ Jwøk? Kare møn, a caana gø jïïu, ni eni kaala cer nyikuŋ Jwøk.

¹⁰ Ŋatøgø beeye ŋata göör gïn kipere yi wëël Jwøk, na køp, «ni ‹Neenï, a jääŋŋa nyïïatwiel mara nyïmï, ŋato jiiŋ jöörï nyïmï.›

¹¹ Adïëri møn, a cäänna uuni, ni bäŋ dhaanhø mo othïïŋö mo dwøŋŋa kare ki kar Jøøn na näk dïlööy na nyuudhi dï jøøa nywøl määnni. 'Ba eni na kare thiinhnha eni yi buya käl maal, tïmö ni dwøŋŋa eni ki Jøøn.

¹² Ki mana täge ki yïth nïr Jøøn na näk dïlööy na nyuudhi këël kawaane ennø, jøøa teek bëëdö ni tïïö ki gïï mo leth dëër buya käl maal, ni ge manynya gø nee makge ki teek.

¹³ Kiper nyïïkuk Jwøk bëët ki ciik Jwøk acäänö kiper buya käl maal këël mana ö Jøønni.

¹⁴ 'Ba ni näk mo yïthu met ki man jïëyu luumma caana kiper Jøøn, Jøøn beeye Ilaaja, ŋata wäŋŋi ni öö.

¹⁵ Ŋat mo jïre da ïdhi mo wïnye ki ge, beerra man cek ïthe.

¹⁶ «?'Ba jø pinyi en päära gø ki ŋø? Päära kö obwöre mo opï piny kwör ŋïëw, mo cøøra rege ni köge,

¹⁷ «ni ‹Waani opelø akoothwa jïïu, ni käru miel. Ni jwöŋwa ki jwøk thøø, ni käru kïmmö.›

¹⁸ Kiper Jøøn aöö ni ba cämö ni ba mädhö, ni kö jiyi, ni ‹Eni wïïe da anägö.›

¹⁹ 'Ba Wär Dhaanhø aöö ni cämö ni mädhö, ni kö jiyi, ni ‹Neennu, ŋat wärö, na ŋat maath, na nyawat jø ajwäk ki jø raay.› 'Ba leec wïc ojoot na adïëri ki køør tïïe moe.»

Luum Ajäla Kiper Mïëri Moa Näk Rege Kärge Løø

²⁰ Kanyøgø Jecu atägö ki man jääl mïëri kiper na kärge rege løø, ni beege mïëya tïïe yïthge døc ki tïïe mo døøŋŋø.

²¹ Ni kööe, no «Otïmö ni raac jïrï, ï na Köradhin. Noo tïmö ni raac jïrï, ï na Betheeda. Kiper doo naa tïïe moa døøŋŋø na tïïc dïïu, tïïca yi Tayar ki Caydan, cwïnyge doo na ege nø løk cøøn, ni ge käära keece na abïïe ni ge bëëdö yi bur.

²² 'Ba a cäänna uuni, noo tïmö ni theemma ajäl Tayar ki Caydan ka ajäla maru, dïcäŋo ŋøl luup yie.

²³ ?Aŋø, ï na Kapernaam, iï caarø niï doo røønyø maal? Beeye kar ajäla noo leeŋ ïïni yie. Kiper doo naa tïïe moa døøŋŋø na tïïc jïrï, tïïca Cødam, paanøgø doo poodø ni nut këël dïcäŋi en.

²⁴ 'Ba a cäänna uuni, noo tïmö ni theemma ajäl jø Cødam ka ajäla maru dïcäŋo ŋøl luup yie.»

Kanya Ö Jecu Na Cwøl Jiy Nee Mooe Ki Jwömö

²⁵ Kanyøgø Jecu aköö, ni «Ïïna pwøa, Awuuö, ï na Kwääc maal ki piny, kiper mana mänï gïï ki jøøa wïthge leer na ŋäc jammi, ni nyoothï geni jï obwöre moa mar.

²⁶ Kiper beeye mana manynyï ki met yiï, ï na Wuuö.

²⁷ «Jammi bëët onø wëëk Wära aani; ni bäŋ ŋat mo ŋäc Wäädö, 'ba beeye Wuuö keere, ni bäŋe dhaanhø mo ŋäc Wuuö, 'ba beeye Wäädö keere, ki ŋat wø met yi Wäädö ki man nyooth eni jïgø.

²⁸ «Ööu baŋa, u na näk ööl bëët ki gïï wø tïïyu ki gïïa peek ni wø kääru ki cwïnynyu; uuno mooa ki jwömö.

²⁹ Kïthu jaadha bäätu, ni wø caal jaath puur man wø rïï ŋut dhieŋ, ni kwänynyu ki køøra, kiper a mwöl ni cwïnya bäŋ atöör. 'Ba uuno jïti ki jwömö kiper gïïa en cwïnynyu.

³⁰ Kiper jaadha man wø rïï ŋut jööt, ni tëër mara ba peek.»