Epeca 2 - Wëël Jwøk

Beeye Met Yi Jwøk Na Piem Øøni

¹ 'Ba Jwøk uuna tïïe nou kwøw kanya bëëdu ni uuno thøw kiper gïïa dhallu ki japa reyø na tïïyu,

² japa kwøŋu køørge caath na jïëyu ki luum pinyi en, na caathu køør kwääy juuga reyø ni wø jïge da teek yi jamø, ni beeye jwøøgø ni poot tïïö cwïny jø adhala enø.

³ 'Ba gïïögø bëët, øøna kwøŋ bëëtö yïthge na bëënnø japa reyø na many cwïnynyø, na caadhø køør gïï wø many dëëlli ki cwïny, ni bëëdø ni øøna jø raay kaamar jøw bëët, ni wëëc Jwøk ena bäätø.

^4-5 'Ba Jwøk ni wø kunyö døc, këël na bëëdø ni øøno thøw ki køør gïïa dhalø, øøna døøc mo kwøw ki Krictø na aciel ki køør mëër mare na päl na mëëre ki øøni. Kiper beeye met yi Jwøk na piem uuni.

⁶ Ni tïŋ øøni maal, ni wëëk ø pïïn kanya ciel ki eni maalø ki ri Krictø Jecu,

⁷ kiper nee met yie na päl na bäŋ teeŋe nee nyoodhe jïïø ki bäth ec ki ri Krictø Jecu yi piny mano ööi.

⁸ Kiper beeye met ec na piem uuni ki køør ŋäädhe. Ni manøgø ba tïïc uuni, 'ba beeye muuy mana cïp Jwøki ki met ec,

⁹ ni paa kiper tïïe, kiper nee bäŋe ya ŋat mo töödö.

¹⁰ Kiper øøna gïïa tïïe, ni cwääc ka ri Krictø Jecu kiper tïïe moa beyø, moa näk ojiiŋ Jwøki cøøn, nee ø bëëdø ni ø tïïya geni.

Øøna Dwøk Baŋ Jwøk Ki Køør Thøw Jecu Bäät Jaadha No Odëëdö

¹¹ Kiper manøgønø, parru wïthu ni u nywöli ni uuna juurre dïkwøŋ, nou cøøri nou patha odaŋø ki jï jøøa näk odaŋø, ni beeye daŋ man wø tïïc ki cenø dëël.

¹² Ni parru wïthu ki man näk kar kaaca karu bäär ki Krictø, ni uuna jiy mo path ki po jø Icriel, nou tøør ri luupa tuut Jwøki na buuk, ni jïïu bäŋ ŋäädhe kiper yi nyïm, ni jïïu bäŋ Jwøk piny.

¹³ 'Ba kawaane ki ri Krictø Jecu uuni na karu bäär dïkwøŋ, uuna käl kany mo cään ki køør rem Krictø.

¹⁴ Ni beeye eni na wëëk ø bëët-mëër, ŋata dwal jø Juuth ki juurre na aciel, ni raany keew mar män na pääŋ øøni,

¹⁵ ki køør mana dïïm ciik moa cem ki luupa en yïthge ki rïŋ dëëre, kiper nee cwääc na dhaanhø aciel mo nyään ki ree na kar ariiø, ni tïïya bëët-mëër,

¹⁶ nee ø dwøk baŋ Jwøk karøbëët na dëël aciel ki køør thøø mare bäät jaadha no odëëdö, ni raanynya män na eno nø.

¹⁷ Ni ööe ni køp luum bëët-mëër jïïu, u na karu bäär, këël jï jøøa karge cään.

¹⁸ Ni beeye ki køøre na jïtø ki jöö karøbëët man cøø baŋ Wuuö ki ri Jwïëc Jwøk na näk aciel.

¹⁹ Kiper manøgønø, u ba path këët nou patha wëëlle, 'ba uuna wäät thwöth paac ki jø Jwøk na aciel, nou ena ri tuuŋ Jwøk.

²⁰ Ni uuna øtø mo ogeer bäät nyïïatwieli ki nyïïkuk Jwøk, ni ö Krictø Jecu ki dëëre ni näk kïn gøøt mana mak dëër ødøgø,

²¹ ŋata cuŋ øtø kare bäre ree, ni døøŋŋe ni tïme na øt Jwøk mo dwøŋ ni ena kur keere dëër Wuuö.

²² Ni beeye eni na ö uuni thuwø ni wø geer u ree, kiper nou tïmu na kar bëëtö mar Jwøk ki køør Jwïëye.