ZEKARIA 1 - Ao Naga CL Bible - SQC Edition (BSI)

Temulung Meyiptsü Kibuba i Israel Ajaba

¹ Darius küm tanabuba ita ti buba nung, ainkar Iddo chir Berekia jabaso Zekaria dangi Kibuba O aru,

² Nenok tetsü-tebou dang Kibuba kanga ain adoka liasü.

³ Anungji nai parnok dang shiang, Yamai Temeranger Kibubai ashir, “Kü dangi meyipang,” ta Temeranger Kibubai ashir, “aser ni nenok dangi meyiptsü” ta Temeranger Kibubai ashir.

⁴ “Nenok tsürabur ama nenok teli, shirnok dang alemli ainkartemi ya oda ayimtena ashir, yamai Temeranger Kibubai ashir. Tang nenok tamajung lenmangtem nungi aser tamajung inyakbatem nungi meyipang. Saka parnoki manga mesüra kü dang temulung magütsü, ta Kibubai ashir.

⁵ Nenok tsüraburtem, parnok kong ali? Aser ainkartem, parnok teti alir asü?

⁶ Aji saka kü otem aser kü tzüzüngozüngtem koba agi ni kü tenzükertem, ainkartem dang mela, item yagi nenok tsüraburtem memenep no? Anungji parnoki meyip aser ashi, Temeranger Kibubai asen lenmangtem aser aseni inyakba mapa yari, asen dang inyaktsü bilemba ama, yamaji pai asenok dang benshi.”

Mezüngbuba Mangdang: Kor Nung Amenertem

⁷ Ita terkabuba anogo metsür pezübuba nung, koba Shebat ita, Darius küm tanabuba nung ainkar Iddo chir Berekia jabaso Zekaria dangi Kibuba o aru,

⁸ Ni aonung angu aser ajiang, ni nisung ka kor temerem ka nung mena angu, aser pa myrtel süngdong rongnung noktaka lenten tarok nung angu; pa tesülen temerem, nensaa meruba, aser temesüng kortem liasü.

⁹ Angji ni ashi, “Oh kü kibur, itemi kechi?” Idangji kü den jembia aliba kotak tenyari kü dang ashi, “Itemi kechisa ni ne dang sayutsü.”

¹⁰ Aser myrtel süngdong rongnung noktaka aliba nisungi langzüa ashi, “Itemi Kibubai alima ajonga semdangtsü yokertem lir.”

¹¹ Aser idangji parnoki myrtel süngdong rongnung noktaka aliba Kibuba tenyar dangji ashi, “Onoki alima semdangogo aser angang, alima ajonga sünepsünepa süngzüka lir.”

¹² Idangji Kibuba kotak tenyari ashi, “Oh Temeranger Kibuba, kopiga Yirusalem aser Yihuda yimtitem koba den nai küm neter tashi ain adoka lir, nai yimlibilem makai alitsü?”

¹³ Aser kotak tenyar shibai kü den jembia liasü pa dang Kibubai o tajung aser tanep agi langzü.

¹⁴ Anungji kü den jembisang kotak tenyari kü dang ashi, “Yamai nai sangdongang, Yamai Temeranger Kibubai ashir, Ni Yirusalem aser Zion tenem asoshi kanga dang nükmir.

¹⁵ Aser anüanüa aliba kintem dang ni kanga ain adoka lir, kechiyong kodang ni tera dang ain adoka liasü, parnoki tali tamajungba kümdaktsü.

¹⁶ Anungji yamai Kibubai ashir, ni Yirusalemi yimlibilem nung meyipa arutsü; kü ki yangji yanglutsü ta Temeranger Kibubai ashir aser Yirusalem madak temaitsü ka yanglutsü.

¹⁷ Tanaben ya oda sangdongang, Yamai Temeranger Kibubai ashir, Kü yimtitem tanaben azükaruba agi moshitsü aser Kibubai tanaben Zion madak taochi akatsü aser tanaben Yirusalem shimtettsü.”

Tanabuba Mangdang: Tezü Aser Yintsünger

¹⁸ Ni kü tenük anünglen rangeta yok, aser yangji tezü pezü liasü.

¹⁹ Idangji kü den jembiba kotak tenyar dang ni ashi, “Itemi kechi?” Pai kü dang ashi, “Itemi Yihuda, Israel aser Yirusalem prokshidaktsüba tezütem lir.”

²⁰ Idangji Kibubai kü dang yintsünger pezü sayu.

²¹ Aser ni asüngdang, “Parnok kechi inyaktsü aru?” Pai langzü, “Item ya Yihuda prokshidaktsüba tezütem lir, aji asünung katia tekolak angüma matutettsüsa aoksadaktsütsü parnok aru, alima kintem tezü zükdoktsütsü kobai Yihuda lima aser nübur prokshidaktsü.”