YOHAN 8 - Ao Naga CL Bible - SQC Edition (BSI)

Nüktapangtatsür Ka

¹ Saka Yisubo Oliv tenemi atu.

² Anepdang yakta pa tenla kidangi tanaben aru, aser nisung ajaki pa dangi aru aser pai amen aser parnok dang sayutsü tenzük.

³ Tetsür ka nüktapangta benshia aliba ngua pur Farisi aser tezülurtemi la Yisu dangi anir aru. Aser laji parnok aser Yisu tsüngda nung noktakdaktsü.

⁴ Parnoki pa dang ashi, “Tesayur, iba tetsür nüktapangtaya alidang apu.

⁵ Yamalaji lung agi onsettsüla ta Mosa ajanga agütsüba Ozüng nung lir. Anungji naia la atema kechi ashir?”

⁶ Pa aitsütettsüsa, pa atitanga parnoki ya ashi. Saka Yisui angema alu aser pa temeyong agi ali nung zülu.

⁷ Saka kodang parnoki pa dang maneni asüngdang, pai aka asor parnok dang ashi, “Nenok rongnung shiba dak temenen mali, pai tamasa la dak lung agi ondakjang.”

⁸ Idangji pai tanaben angema alu aser pei temeyong agi ali nung zülu.

⁹ Parnoki kodang ya angashi, tambuti nungi tenzüka tesübuba tashi ka khen, ka khen ta oadok. Aser Yisu pa kija aser tetsürlaji la noktakdak tiyong nung toktsü.

¹⁰ Yisui aka aso aser la dang ashi, “Tetsür, parnok kong ali? Nisung shingaia na maitsü asü?”

¹¹ Idangji lai langzü, “Hau, Kibuba, shingaia maitsü.” Idangji Yisui ashi, “Nia na maitsür. Oang; joko tang nungi tanaben temenen tebenshi.”

Yisu Alima Tesangwa

¹² Yisui tanaben parnok den jembia ashi, “Ni alima tesangwa; Shibai kü sülen anitaker pai tammang nung kodanga mejajatsü; saka taküm tesangwaji angutsü.”

¹³ Idangji Farisitemi pa dang ashi, “Nai ne sasa kuli agütsür, ne kuliji ochi masü.”

¹⁴ Yisui parnok dang langzü, “Ni kü sasa kü indang kuli agüjaka, kü kuli ochi lir, kechiaser ni kong nungi aru aser kongi aotsü aji nenoki memetet.

¹⁵ Nenoki meimchir jenjang apir o bendanger, nibo shinga o mebendanger.

¹⁶ Saka ni o bendangaka kü obendangbaji ochi lir, kechiaser ni kü kija masü. Saka Tebu shibai ni yok Pa kü den lir.

¹⁷ Nisung ana kuliji ochi ta nenok Ozüng nung zülua lir.

¹⁸ Kü indang kuli agütsüsangji ni lir aser ni tenyaba Tebui kü indang kuli agütsür.”

¹⁹ Parnoki pa dang ashi, “Nebu kong ali?” Yisui langzü, “Nenoki nia memetet aser kübua memetet; nenoki ni metet asübo kü Bua metetla.”

²⁰ Yisui item o tenla kidang sayudang, tenla sen ayudak noktaker jembi, aser nisung shingaia pa mapu, kechiaser pa mapang ano matong.

Ni Kongi Aor Ajagi Nenok Arutsü Makok

²¹ Pai tanaben parnok dang ashi, “Ni taor aser nenoki ni bushitsü, saka nenokbo pei temenen nung asütsü. Ni kongi aor ajagi nenok marutettsü.”

²² Anungji Yihuda nungeri ashi, “Ni kongi aor ajagi nenok marutettsü ta pai shidarji pai pei sasa tepsettsü südi na?”

²³ Pai parnok dang ashi, “Nenok teküpoklen nungi, nibo temalen nungi; nenok iba lima meyong nibo iba lima meyong masü.

²⁴ Anungji ni nenok dang nenokbo pei temenen nung asütsü ta ashi; kechiaser nenoki ‘Ni Pa-a’ ta mamangra, nenok pei temenen nung asütsü.”

²⁵ Anungji parnoki pa dang ashi, “Na shiba?” Yisui parnok dang ashi, “Ibajiang nia nenok dang tetenzük nungi ashir-ato.

²⁶ Nenok indang ni ashitsü aser o bendangtsü jenti kar; Aji saka shibai ni yok pa ochi lir. Aser ni pa nungi kechi angashi, aji meimchir madang jembir.”

²⁷ Pai parnok dang Tebu indang jembir ta parnoki mangatet.

²⁸ Anungji Yisui ashi, “Kodang nenoki Nisung Chir ajungketdir, idangji ni pa-a ta aser pei sasa tashi agi kecha meinyaker, saka Tebui kü dang sayuba ama ni itemi jembir ta nenoki metettsü.

²⁹ Aser shibai ni yok pa kü den lir, pai ni kija metoktsü; kechiaser ni teti pa mulung achitsü mapa inyaker.”

³⁰ Pai itemi jembidang aikati pa dak amang.

Ochi-i Nenok Nüji Kümdaktsütsü

³¹ Anungji Yihuda nunger shirnoki pa dak amangogo, pai parnok dang ashi, “Nenoki kü o nung lira, ajangla nenok atangji kü nütsüngtem lir.

³² Aser nenoki ochiji metettsü aser ochi jagi nenok nüji kümdaktsütsü.”

³³ Parnoki pa dang langzü, “Onok Abraham semchirtem lir, aser onok kodanga shinga lar süa melidang. Ajangla ‘Nenok nüji kümdaktsütsü’ ta nai koda shiteter?”

³⁴ Yisui parnok dang ashi, “Atangji züngpong ni nenok dang shidi, shibaisa temenen benshidir pa temenen lar.

³⁵ Alar kidang teti asoshi malir, techirbo teti alir.

³⁶ Anungji Techiri nenok nüji kümdaktsüra, nenok shitak nüji alitsü.

³⁷ Nenok Abraham semchirtem ta ni metet; saka nenoki ni tepsettsü bushir, kechiaser kü o nenok dak sadema mamunger.

³⁸ Kü Bu den ni kechi angu aji ni nenok dang ashir, aser nenokia nenok tebu nungi kechi angazük aji inyaker.”

Nenok Tebu Mojing

³⁹ Parnoki pa dang langzü, “Onok tebu Abraham lir.” Yisui parnok dang ashi, “Nenok Abraham chirtem asübo, nenoki Abraham mapa inyakla.

⁴⁰ Saka Tsüngrem nungi ochi angashir nenok dang ashibaji ni lir, aser tang nenoki ni tepsettsü bushir. Abrahami ya meinyak.

⁴¹ Nenoki nenok tebu mapa inyaker.” Parnoki pa dang ashi, “Onok kida chir masü; onok Tebu ka oda Tsüngrem lir.”

⁴² Yisui parnok dang ashi, “Tsüngremji nenok Tebu asübo nenoki ni meimla; kechiaser ni Tsüngrem nungi adoka aru; kechiaser ni pei sasa agi maruka, saka pai ni yok.

⁴³ Kechiba nenoki kü o mangateter? Kechiaser ya oda nenoki kü o angatsü makoker.

⁴⁴ Nenok pei tebu mojing meyong lir; aser nenok tebui jangraba inyaktsü nenoki mulunger. Pa tetenzük nungi nisung tepseter liasü, aser ochi nung menoktaker kechiaser pa dak ochi mali. Pai kodang tiyazü jembidir, pai pei temulung nungi jembir; kechiaser pa tiyazü tebu.

⁴⁵ Saka ni ochi jembi nung nenoki kü dak mamanger.

⁴⁶ Nenok rongnung shibai ni temenen nisung ta kuli agütsütet? Ni ochi ashi nung nenoki kechiba kü dak mamanger?

⁴⁷ Shiba Tsüngrem meyong lir, pai Tsüngrem o angar, nenoki aji mangar kechiaser nenok Tsüngrem meyong masü.”

Abraham Masodang Ni Lir

⁴⁸ Yihuda nungeri pa dang ashi, “Na Samaria nunger ka aser ne dak temenen tanela lir ta ashibato onok shitak masü ama?”

⁴⁹ Yisui langzü, “Kü dak temenen tanela mali, saka ni kü Bu akhüm tsübur aser nenoki ni akhüm metsübur.

⁵⁰ Ni pei nüngsang mebushir, aji bushitsü aser o bendangtsü ka lir.

⁵¹ Atangji züngpong ni nenok dang shidi, kari kü o benshira, pai kodanga tasüba mangutsü.”

⁵² Yihuda nungertemi pa dang ashi, “Ne dak temenen tanela ka lir ta onoki metetogo. Abraham aser ainkartem süogo, aser nai ashir, ‘Kari kü o benshira, pai kodanga tasüba mangutsü.’

⁵³ Ozü tebu Abraham, shiba süadokogo, pa dang nungi na tuluba asü? Ainkartema süadokogo. Na-a shiba ta nai ashir?”

⁵⁴ Yisui langzü, “Ni kü sasa sentsüwangshira, kü sentsüwangshibaji kecha nunga. Ni sentsüwangshidaktsübaji kü Bu lir. Shiba dang nenoki ashir, ‘Pa ozü Tsüngrem lir.’

⁵⁵ Nenoki pa memetet, saka ni pa metet; aser ni pa memetet ta shira nia nenok ama tiyazür alitsü. Saka ni pa meteta lir aser pa o benshir.

⁵⁶ Nenok tebu Abrahami kü anogo angutsü pela-a liasü; pai aji angu aser pela.”

⁵⁷ Yihuda nungertemi pa dang ashi, “Na tasoba küm tenema masü, aser naibo Abraham angu asü?”

⁵⁸ Yisui parnok dang ashi, “Atangji züngpong ni nenok dang shidi, Abraham masodang nungi Ni liasü.”

⁵⁹ Anungji parnoki pa dak lung agi aontsü lung shia aru, saka Yisui pei sasa atsük aser tenla kidang nungi aenshia ao.