YOHAN 4 - Ao Naga CL Bible - SQC Edition (BSI)

Yisu Aser Samariatsür

¹ Yohan dang nungi Yisui nütsüng timba kümdaktsür aser baptitsür ta Farisitemi angazükogo ta Yisui meteta liasü.

² Saka Yisuibo shinga baptija maliasü; pa nütsüngtemiang baptitsü.

³ Aser pai Yihuda lima toktsü aser Galil-i meyipa ao.

⁴ Pai Samaria lima ajanga aotsüsa aküm;

⁵ anungji Yakobi pei chir Yosef nem kechi ali tila ka agütsü iba li anasa Samaria nunger yim Saikar-i aru.

⁶ Yakob tzübu yangji liasü. Lenmang nung belemseter, Yisu tzübu kümbang nungji mena liasü. Aji terana baji meta liasü.

⁷ Samariatsür ka ajagi tzütai aru. Yisui la dang ashi, “Kü nem tajemtsü tzü kua,”

⁸ kechiaser pa nütsüngtem yimti jagi chiyungtsü alitsü oadoker liasü.

⁹ Samariatsür jagi pa dang ashi, “Na Yihuda nunger ka sür nung ni Samariatsür ka dang tajemtsü tzü koda meshir?” (Kechiaser Yihuda nungeri Samaria nunger den keyin mechiteper).

¹⁰ Yisui la dang ashi, “Nai Tsüngrem sempet meteta ali asübo shibai ne dang tajemtsü tzü meshir, nai pa dang meshir lila, aser pai ne nem takümtsü tzüji agütsür lila.”

¹¹ Tetsür jagi pa dang ashi, “Tulur, na tzü tatettsü kecha maka aser tzübuji tarok; ajangla nai kong nungi takümtsü tzü angur?

¹² Ozü tebou Yakob, shibai onok nem tzübuji agütsü aser pa, par chirtem aser pa shirurutem dena iba nungjagi ajem, pa dang nungi na tuluba asü?”

¹³ Yisui la dang ashi, “Shibaisa iba tzü jemdir tanaben tzüratsü,

¹⁴ saka shibaisa ni agütsüba tzüji jemdir pai kodanga metzüratsü; saka ni pa nem agütsüba tzüji pa dak teti takümtsü pokteta tzüpokdak ka akümtsü.”

¹⁵ Tetsür jagi pa dang ashi, “Ni metzüratsü aser yagi tzütai marutsüsa iba tzüji kü nem agüjang.”

¹⁶ Yisui la dang ashi, “Oang aser ne kinungpu jar yagi arung.”

¹⁷ Tetsür jagi pa dang ashi, “Ni kinungpu mali.” Yisui la dang ashi, “Ni kinungpu mali ta nai shitak shiogo,

¹⁸ kechiaser ne kinungpu pungu liasü aser tang na shiba den lidagi paji ne kinungpu masü. Nai ya atangji shiogo.”

¹⁹ Tetsür jagi pa dang ashi, “Tamarener, na ainkar ka ta ni meteter.

²⁰ Ozü tetsü-teboutemi iba tenem nung külem, aser kechi nung nisungtemi külemtsü tim aji Yirusalem ta nenoki ashir.”

²¹ Yisui la dang ashi, “Tetsür, kü o nung amangang, nenoki iba tenem nung süshia, Yirusalem nung süshia, Tebu dang mekülemtsü mapang ka arudagi.

²² Nenoki kechi memetet aji külemer, saka onoki kechi metet aji külemer kechiaser tekümtetji Yihuda nunger nungi lir.

²³ Saka ochi nung külemertemi Tebu dang Tanela nung aser atangji nung külemtsü mapang arudagi aser aji tang lir; kechiaser pa külemertem asütsü Tebui ibala bushir.

²⁴ Tsüngrembo Tanela, aser shiri pa külemdir Tanela nung aser atangji nung külemtsü tim.”

²⁵ Tetsür jagi pa dang ashi, “Mesia (shiba dang Khrista ta ajar) arudagi ta ni metet; kodang pa arudir pai onok nem ajak metetdaktsütsü.”

²⁶ Yisui la dang ashi, “Ne den shibai jembir aji Pa.”

²⁷ Idangji pa nütsüngtem aru aser pai tetsür ka den jembiba angudang parnoki süngmang. Saka “Nai kechi aginür? ta mesüra kechiba nai tetsürla den o jembir?” ta pa dang shingaia meshitet.

²⁸ Anungji tetsür jagi tzü mori toktsür yimtaki ia nisungtem dang ashi,

²⁹ “Ni kechisa inyak item ajak kü dang shiogo, ibala nisung ka aruagi ajiang; ibai Khristaji asü na?”

³⁰ Anungji parnoki yimtak nungi adoka Yisu dangi aruya liasü.

³¹ Iba tsüngda nungji nütsüngtemi pa dang mepishia ashi, “Tesayur, chiyungang.”

³² Saka pai parnok dang ashi, “Nenoki memetetba kü chiyungtsü kar.”

³³ Anungji nütsüngtemi jembitepa ashi, “Pa nem kari chiyungtsü langka bena arua agütsü asü?”

³⁴ Yisui parnok dang ashi, “Ni tenyaba mulung chia inyaktsü aser pa mapa atalokdaktsütsü, aji kü chiyungtsü.”

³⁵ Ano ita pezü lir külen idangji aluruwa arutsü ta nenoki mejembir no? Ajiang ni nenok dang shidi, “Roka asoa alulen ajiang, tang tarutsü junga mesünga lir.

³⁶ Shibai arur pai taa angur, anungji alu atenba aser aluruba tenaprongla külemi pelateper.

³⁷ Kechiaser kati atener aser kati arur ta ashiba o yagi putepa adoker.

³⁸ Kechi nung nenoki belema meinyak aji arutsü ni nenok yok; tangari belema inyakogo aser parnok belema inyakba rongnung nenoka aden.”

³⁹ Tetsürla jagi “Ni kechisa inyaka liasü item ajak pai kü dang shiogo” ta kuli agüja ashi nung iba yim nungjagi Samaria nunger aikati pa dak amang.

⁴⁰ Anungji kodang Samaria nunger pa dangi aru, pa parnok den liang ta parnoki pa dang mepishi aser pa yangji ananü ali.

⁴¹ Ano jenti-i pa o ajanga amang.

⁴² Aser parnoki tetsür dangji ashi, “Nai ashibayong onoki amanger masü, saka onok sasa ya angashiogo aser ibai atangji Kümtetdakbaji lir ta onoki metet.”

Tamarener Ka Jabaso Anebtsüba

⁴³ Anogo ana süir külen pai yang nungjagi Galili ao.

⁴⁴ Kechiaser ainkar kaji pei lima nung nüngsang maka ta Yisui pei sasa kuli agütsü.

⁴⁵ Anungji pa kodang Galili aru, pai Yirusalem nung benjong mapang nung inyakba ajak ngua Galil nungeri pa agizük; kechiaser parnoka benjong jagi oa liasü.

⁴⁶ Anungji Galil nung aliba Kana yim, kechi nung pai tzü agi yi kümdaktsü ajagi pa tanaben aru. Iba mapang nungji tamarener jabaso ka Kapernaum nung shiranga liasü.

⁴⁷ Kodang pai Yisu Yihuda nungi Galili aruogo ta angashi, pai Yisu dangi ao aser pa arur par jabaso anebjang ta pa dang mepishi, kechiaser tanurji tasür liasü.

⁴⁸ Anungji Yisui pa dang ashi, “Nenoki temaitsütem aser tesüngmangtsü mapatem mungura mamangtsü,”

⁴⁹ Tamarener jagi pa dang ashi, “Kibur ozü chir masüdangsa alungma.”

⁵⁰ Yisui pa dang ashi, “Oang, ner jabaso taküm lir.” Yisui pa dang ashiba oji pai amang aser pai ao.

⁵¹ Pa luya alidang par kilirtemi par jabaso taküm lir ta shia pa den ajurutep.

⁵² Anungji pai parnok dang pa kodang nungi jungtutsü tenzük ta asüngdang. Anungji parnoki pa dang ashi, “Yashi ka baji meta nungi rameni pa toktsü.”

⁵³ Anungji “Ner jabaso taküm lir” ta Yisui pa dang iba mapang nungji ashi ta tebui metet; aser pai pei sasa aser par kibong ajaki amang.

⁵⁴ Ano ibai Yisu Yihuda nungi Galil-i arur inyakba temaitsü tanabuba liasü.