YOHAN 21 - Ao Naga CL Bible - SQC Edition (BSI)

Nütsüng Tenet dangi Yisu Adokba

¹ Iba sülen Tiberia tzüyim nung Yisu tanaben nütsüngtem dang pei sasa jungkai adoka sayu. Yamaji pai pei sasa jungkai adoka sayua liasü.

² Simon Peter, chakrep chir ta ajaba Toma, aser Galil nung aliba Kana nunger Nathanel aser Zebedi chirtem aser tangar nütsüng ana, parnok ajak külemi liasü.

³ Simon Peteri parnok dang ashi, “Ni ango apui aor.” Parnoki pa dang ashi, “Onoka ne den arudi,” Parnoki tugur rongi ai. Saka paonungji parnoki kecha mapu

⁴ Saka anepungi Yisu tzüküm nungji noktak; aji saka nisungtemi paji Yisua ta memetet.

⁵ Anungji Yisui parnok dang ashi, “Tebusangtem nenok chiyungtsü langka aka asü?” Parnoki pa dang langzü, “Maka.”

⁶ Pai parnok dang ashi. “Rong tajichileni zütsükji onang, aser nenoki angutsü.” Anungji parnoki züktsükji aon aser ango jenti ambang nung parnoki zütsükji atsütettsü mokoki aküm

⁷ Anungji nütsüng shiba Yisui meim, pai Peter dang ashi, “Ya Kibuba.” Kodang aji Kibuba-a ta Simon Peteri angashi, pai pa sepoksü semok kechiaser pa mangsa liasü, aser tzüyim nungji pungok.

⁸ Saka tangar nütsüngtembo rong tila nungji zütsük ango agi sünga atsür aru, kechiaser parnok tzüküm nungi talangka pila masü, süklep noklang ana shi dang.

⁹ Kodang parnoki tokongi tugu, yangji mijang nung mi jangrua aser iba manungji ango aser amtsük parnoki angu.

¹⁰ Yisui parnok dang ashi, “Nenoki tang apuba ango nungi ishika bener arung.”

¹¹ Anungji Simon Peter rongi atu aser ango tulu noklang ka ser tenemer-asem agi sünga aliba zütsükji tokongi atsütet; aser ango paikaji liaka, zütsükbo meshisa.

¹² Yisui parnok dang ashi, “Arung aser chiyungang.” Aji Kibuba ta meteta, nütsüngtem shingaia “Na shiba?” ta pa dang asüngdangtsü temulung moulutet.

¹³ Yisui arua amtsük aser ango amer parnok nem agütsü.

¹⁴ Yisu tasü nungi shia arur nütsüngtem dang jungkai adoka sayuba ya asemben buba liasü.

Yisu Aser Peter

¹⁵ Parnok chiyungzüker külen, Yisui Simon Peter dang ashi, “Yona chir Simon item dangi tali nai ni meimer asü?” Simoni pa dang langzü, “Hau, Kibuba, ni na meimer ta nai metet.” Pai pa dang ashi, “Kü sanchanutem mesüang.”

¹⁶ Pai pa dang ano tanaben ashi, “Yona chir Simon, nai ni meimer asü?” Pai pa dang ashi, “Hau, Kibuba ni na meimer-a ta nai metet.” Pai pa dang ashi, “Kü santem nükang.”

¹⁷ Pai pa dang tasemben ashi, “Yona chir Simon, nai ni meimer asü?” Yisui “Nai ni meimer asü?” ta pa dang tasemben asüngdang nung Peter jashi. Anungji pai pa dang ashi, “Kibuba, nai ajak meteter; ni na meimer-a ta nai metet” Yisui pa dang ashi, “Kü santem mesüang.

¹⁸ Atangji züngpong ni ne dang shidi, na asangur alidang, nai ne sasa nangri akang, aser nai koleni onü ilenji ao, saka na kodang tambur kümdir, nai ne teka mekangtsü aser tangar kati na nangri kangtsütsü aser nai koleni monür ilenji anir aotsü.”

¹⁹ Kobala tasüba agi pai Tsüngrem sentsüwangshidaktsütsü, aji sayua pai ya jembi. Aser pai ya jembir külen pai Simon dang ashi, “kü sülen anitakang!”

Yisui Meimba Nütsüng

²⁰ Peteri tejak meyipa nütsüng shiba Yisui meim aser ano shibai aonung chiyungdang Yisu teku nung mangaloker “Kibuba na bendanga agütsübaji shiba?” ta asüngdang iba nütsüngji anitaka angu.

²¹ Anungji Peteri pa ngua Yisu dang asüngdang, “Kibuba aser iba nisungi kechi asütsü?”

²² Yisui pa dang langzü, “Ni maru tashi ni pa atadaktsünüra na kechi rongnung aden? Na kü sülen anitakang”

²³ Anungji iba nütsüngi masütsüa ta adianutem rongnung iba oji prokshi; aji saka pa masütsüa ta Yisui pa dang mashi. Pai ashi, “Ni maru tashi ni pa atadaktsünüra, na kechi nung aden?”

²⁴ Item indang shibai kuli agütsür aser shibai itemi zülu pa iba nütsüngi lir, aser pa kuli atangji ta onoki metet.

²⁵ Aser ano Yisui inyakba tanga mapa-a aika lir, item ajakji zülu asübo item kakettemji alima nung mesemla ta ni bilemer.