YOHAN 14 - Ao Naga CL Bible - SQC Edition (BSI)

Tebu Dangi Aoba Lenmangji Yisu

¹ “Nenok temulung teraksa. Nenoki Tsüngrem dak amanger; kü daka amangangma.

² Kü Bu kidang talidak jenti lir. Yamaji masü asübo ni nenok dang shila, kechiaser ni nenok asoshi talidak renemi aotsü.

³ Aser kodang ni or nenok asoshi talidak renemdir, ni kong lidir nenoka yangji alitsü asoshi ni tanaben nenok dangi arutsü.

⁴ Ni kongi aotsü nenoki lenmangji metet.”

⁵ Tomai pa dang ashi, “Kibuba, na koleni aotsü onoki memetet; ajangla onoki koda sür lenmangji metettsü?”

⁶ Yisui pa dang ashi, “Lenmang atangji aser Taküm ni lir. Ni ajanga mesüra shingaia kü Bu dangi marur.

⁷ Nenoki ni metet asübo, nenoki kü Bua metetla. Tang nungi nenoki pa metet aser pa nguogo.”

⁸ Filipi pa dang ashi, “Kibuba, onok dang Tebuji sayuang, ajagi onok teperi.”

⁹ Yisui pa dang ashi, “Filip, ni nenok den papigati liaka, nai ni memetet no? Shibai ni nguogo, pai Tebu nguogo. Onok dang Tebu sayuang ta nai koda ashir?

¹⁰ Ni Tebu dak lir aser Tebu kü dak lir ta nai mamanger no? Ni kechi o nenok dang ashir, aji kü sasa nungi jembir masü, saka Tebu kü dak lia, pai pei mapatem inyaker.

¹¹ Ni Tebu dak lir aser Tebu kü dak lir ta kü o ya amangangma; aji mesüra mapatem atema ni amangang.

¹² Atangji züngpong ni nenok dang shidi; shibai kü dak amanger, kechi mapatem ni inyaker, paia aji inyaktsü aser item mapatem dang nungi tuluba pai inyaktsü; kechiaser ni Tebu dangi aotsü.

¹³ Aser nenoki kü nüng nung kechisa meshidir aji ni inyaktsü, anungji Techir dak Tebu sentsüwangshitsü.

¹⁴ Nenoki kü dang kü tenüng nung langka meshira aji ni inyaktsü.

Tanela Temeshi Nangzükba

¹⁵ “Nenoki ni meimra, nenoki kü Ozüngtem benshitsü;

¹⁶ aser nenok den teti alitsü asoshi tangar Teyarir ka nenok dangi yokang ta ni Tebu dang asüngdangtsü.

¹⁷ Paji Ochi Tanela shiba alimai magizüker, kechiaser alimai pa mangur aser memeteter. Nenoki pa metet kechiaser pa nenok den dena lir aser nenok dak alitsü.

¹⁸ Ni nenok ala-ashia metoktsütsü; Ni nenok dangi arutsü.

¹⁹ Tatsüka lir külen, joko alimai ni mangutsü, saka nenokibo ni angutsü: Ni taküm lir, ajagi nenoka taküm alitsü.

²⁰ Iba anogo nungji ni kü Bu dak lir aser nenoka kü dak lir aser ni nenok dak lir ta nenoki metettsü.

²¹ Shiba kü ozüngtem aka, aser itemji kü Bui pa meimtsü aser ni pa meimtsü aser kü sasa pa dangi jungkai adoka sayutsü.”

²² Yihudai (Iskariot masü) pa dang ashi, “Kibuba, kechisünung alima madang nai pei sasa jungkai madoki, onok madang ang jungkai adoktsü?”

²³ Yisui langzü, “Kari ni meimra pai kü o angatsü, aser kü Bui pa meimtsü aser onok pa dangi arutsü aser pa den alitsü.

²⁴ Shibai ni memeimer pai kü o mangar aser nenoki kechi o angashir aji kü o masü, saka ni tenyaba Tebu o.

²⁵ “Ano ni nenok den alidang ni item o nenok dang jembiogo;

²⁶ Saka Teyarir, paji Tanela Temeshi, shiba Tebui kü nüng nung yoktsü, pai nenok dang ashiba ajak bilemtetdaktsütsü.

²⁷ Ni nenok den tesünep toktsür; kü tesünep ni nenok nem agütsür. Alimai agütsüba ama ni nenok nem magütsür. Nenok temulung teraksa aser tsübua teli.

²⁸ Ni aotsü aser nenok dangi arutsü ta ashiba nenoki angashiogo. Nenoki ni meim asübo nenoki pelala, kechiaser ni Tebu dangi aor, kechiaser Tebu kü dang tuluba.

²⁹ Kodang mapang tongdir nenoki amangtsü asoshi anojungi ni nenok dang shiogo.

³⁰ Nenok den ni joko aika mejembitsü, kechiaser ali chuba arudagi.

³¹ Pa kü madak kecha ain maka, saka ni Tebu meimer, aser Tebui kü dang melaba ama ni aji inyaker ta alimai metettsü. “Aramesoang, asenoki yang nungi odi.