YOEL 3 - Ao Naga CL Bible - SQC Edition (BSI)

Tsüngremi Kintem O Bendangtsü

¹ Kechiyong ajiang, item anogo nung, aser iba mapang nung, kodang Yihuda aser Yirusalem tepuokba tanaben ni anir arudir,

² ni kin ajak anitentsü, aser Yehoshafat lenteni anir alutsü; aser ni yangji kü nübur asoshi aser kü senmang Israel asoshi, shirnoki parnok kin rongnung prokshija lir, aser kü linük lemsaa lir, parnok den ni o bendangi aitsü,

³ Aser parnoki kü nübur asoshi an toktang, aser nüktapangtar asoshi tebur chanu ka agütsü, aser parnok ajemtsü yi asoshi tetsür chanu ka ayok.

Foinika Aser Filistia Anema

⁴ Hau, Oh Tair aser Sidon, aser Filistia linük ajak, kü madang nenok kechi ali! Ni inyakba asoshi nenoki kü nem meyipa agütsütsü asü? Aser nenoki kü nem meyipa agütsüdi süra, karaa aser yakta ni nenok mapa meyipa nenok kolak manung agütsütsü!

⁵ Kechiyong nenoki kü taribi aser kü hon agiogo; aser kü rongsen tajung nenok tekülemba kidangi nenoki bener ogo.

⁶ Yihuda nunger aser Yirusalem nunger, parnok pei arrtsü nungi talangkati aenshidaktsütsü asoshi, nenoki Grik nunger dang yokogo.

⁷ Ajiang, nenoki kolen parnok yoka ali, yang nungjagi ni parnok ajungmesotsü, aser nenok mapa nenok kolak madaki meyipdaktsütsü;

⁸ Nenok jabaso aser jala Yihuda chirtem ket nung ni ayoktsü, aser parnoki talang nung aliba, Sabea nisungtem dang parnok ayoktsü, kechiyong Kibubai aji jembiogo.

Yehoshafat Lenten Nung Obendangba

⁹ Nenoki kin rongnung ibai sangdongang. Rara renemang! Temerangertem ajungmesoang, raraba nisung ajak anasa arudakjang, parnok atudakjang.

¹⁰ Nenok alu alaba merang agi nok tsüngang, aser ai alepba nok agi nü tsüngang, tashi maiteri ni tashi ita lir ta shidakjang.

¹¹ Nenok ilungang aser arung, meketa aliba kin ajak, aser nenok sasa sentepang. Oh Kibuba, ne temerangertem aludakjang.

¹² Kintem parnok sasa arimesodakjang aser Yehoshafat lenteni atudakjang; kechiyong yangji meketa aliba kin ajak o bendangtsü ni amentsü.

¹³ Ninok yokang, kechiyong alu menogo, arung nenoki netzükang, kechiaser tsükmenatzü menüngdak sünga, mori moshia ayimer, kechiyong parnok majungbaji kanga tulu lir.

¹⁴ Telok sa telok lemtet-lenten nung lir! Kechiaser lemtet lenten nung Kibuba anogo anasa lir.

¹⁵ Anü aser ita manga küma lir, aser petinutemi parnok tesangwa soter.

Kibuba Anogo

¹⁶ Kibuba Zion nungi arütsü, aser Yirusalem nungi pa ola yoktsü, aser anüng aser ali arakzütsü; saka pei nübur asoshi Kibuba jenokdak alitsü, aser Israel chirtem asoshi mitsa alitsü.

¹⁷ Yamaji nenoki ni Kibuba nenok Tsüngrem, kü temeshi tenem Zion nung alir ta metettsü; idangji Yirusalem temeshi alitsü, aser aener shinga la ajanga joko mesüitsü.

Tarutsü Israel Sentsüwangshi

¹⁸ Iba anogo nung ya ataloktsü, tenemtitemi yi tanang jenzüka yoktsü, aser tenemi mamatzü yimdaktsütsü aser Yihuda ayongnu ajak tzü ayimtsü, aser Kibuba ki nungi tzüpokdak ka adoktsü, aser Shittim lenten nung tzü agütsütsü.

¹⁹ Yihuda chirtem dak teka aiba yong, Ijip azüngmeyaka alitsü, Edom arem azüngmeyakdak asütsü, kechiaser parnok ket nung parnoki tai makaba zü tokshi.

²⁰ Saka Yihuda teti alitsü, aser putusa putu Yirusalem alitsü.

²¹ Aser parnok zü ni tayang kepzüktsü, ni aji memerenshi-i metoktsütsü, kechiaser Kibuba Zion nung alir.