YOEL 2 - Ao Naga CL Bible - SQC Edition (BSI)

Kibuba Anogo

¹ Zion nung nenoki jangzü apuang, aser kü temeshi tenem nung ar sangokjang linük alir ajaki atentendakjang, kechiyong Kibuba anogo arudagi, kechiyong aji anasa lir;

² ammang aser mangbang-sübang anogo, mepet aser ammang temelem anogo, nübur tulu aser tashi tait ka naknaka tenemtem meibanga lir; iba ama akhidang melidang mesüra oda putu ajak küm songtema ibaji mesüka parnok sülen joko malitsü.

Süngku Telok Aruba

³ Parnok jakdang mi agi meyoka adoker, aser parnok sülen milak jangrur; alimaji parnok jakdang Eden tsüki ama, saka parnok sülen azüngmeyaka arem akümer, hau parnok nungi shinga mejenbur.

⁴ Parnok tereprangtsü kor tereprangtsü ama, aser raraba kor ama parnoki asümer.

⁵ Talungtsü jajaba nanüng ama, parnoki tenem kolak nung jokoktsür; motembang meroktokba milak pela ama, tashi tait telok tongbang renema aliba ama.

⁶ Parnok tsüngdang nüburtem tuo ashir, tejak ajak pakpaka akümer.

⁷ Temerangertem ama parnoki asümer, raraba nisungtem ama parnoki atsüi sua atur; parnoki pei lenmang nung jajar aser parnoki pei taren meraksar,

⁸ Parnoki kati ka dak menungoktsür; parnok shia pei lenmang nung aor, parnoki nok o nü nungpoka aor aser parnok metemdaker.

⁹ Yimti nung parnoki jokoktsür, atsü manung parnoki asümer; parnoki kidangi atur, parnoki auür ama kichibai air.

¹⁰ Parnok tsüngdang ali-i anokshir, anüngtemi atentener; anü aser ita mangadoker, aser petinutemi parnok tesangwa soter.

¹¹ Aser Kibuba pei temeranger telok madang ola adoker kechiyong pa temeranger telok kanga tulu, shibai pa o benshir pa tashi tait lir. Kechiyong Kibuba anogo tulu aser kanga tetsübutsü ka, aser shibai aji tizüktettsü?

Temulung Meyiptsü Ajaba

¹² Kibubai ashir, Tang danga nenok temulung ajak agi nenoki lumiseta, aser jeba, aser mang yima, aser kü dangi meyipang.

¹³ Aser nenok süoshi masü nenok mulungjang shisa-ang, aser Kibuba nenok Tsüngrem dangi meyipang; kechiyong pa taochi aser aria bilemba agi sünga lir, ain adoktsü meilungi, aser yimlibilem talubosa, aser tamajung nungi pai atsü-anem akar.

¹⁴ Oda pai tanaben temulung meyiptsü, aser pa sülen temoatsü ka, oda chiyungtsü tenla aser tajemtsü tenla Kibuba nenok Tsüngrem asoshi toktsütsüa shibai metet?

¹⁵ Zion nungi jangzü apuang, lumitsüba meshitetang, temeshi sentep ka jatepang;

¹⁶ nisungtem sentepdakjang; tesentepertem meshitetang, tamburtem atenshidakjang, aser tanurtem aser mamayongertema anitenang! Kiyimsang pei taktang nungi aser kiyimla pei taktang telung nungi odakjang.

¹⁷ Putirtem, Kibuba tenzükertem, kilempok o tenladak tsüngda nung jebdakjang aser shidakjang, “Oh Kibuba, ne nübur kümzükang, aser kintemi parnok anema tansütsü o küma mejembitsü asoshi ne senmang sensamasa tekümdaktsü. Parnok Tsüngrem kong ali ta kechiba nübur rongnung shidaktsütsü?”

Kibuba i Parnok Dang Nangzükba

¹⁸ Idangji Kibubai pei lima asoshi nükmia aküm aser pei nübur dang aochi.

¹⁹ Kibubai langzüa pei nübur dang ashi, “Ajiang, ni nenok dangi tsük, yi aser totzü yoktsü aser aji agi nenok jangra atemtsü; aser kin rongnung joko nenok sensamasa ni mekümdaktsütsü”.

²⁰ Saka anüdoklentip temeranger telok talangi aenshia odaktsütsü, aser alima tapung aser azüngmeyakdaki, yakpangpur anüdoklen tzüyimi arioktsütsü, aser tesülen pur anüolen tzüyimi arioktsütsü, aser teshinem adoktsü aser tezüknem tamajung adoktsü, kechiaser pai mapa tulu inyak.

Temoatsü Talubosa Mangdang Anguba

²¹ Tetsübu, Oh alima, pela-ang aser pelashishia liang; kechiyong Kibubai mapa tulu inyakogo.

²² Tsübua teli, nenok moapu shirurutem, kechiyong arem nung chiyimdak adoka lir; kechiyong süngdongi pei tejang tangtsür, munguzünu dong aser tsükmenatzü dongi pei tashi agütsür.

²³ Anungji nenok Zion chirtem, pela-a liang, aser Kibuba nenok Tsüngrem dak pelashishia liang. Kechiyong pai nenok nem mezüngbuba tzünglu tatakzük shitak agütsür, aser nenok asoshi pai tzünglu, mezüngbuba aser tesübuba tzünglu mezüng ama arudaktsür.

²⁴ Aser motsüngnemji wheat tsük agi sünga alitsü, aser moritemji yi aser totzü agi moshitsü.

²⁵ Ni nenok rongi yokba kü temeranger telok tulu, süngku, jentoktsüba süngku, telok senzüba, joka aoba aser chimatsüba süngkutemi achiba kümtemji ni tanaben nenok nem shia agütsütsü.

²⁶ Nenok talubosa achitsü aser tipatemtsü, aser nenok dang tesüngmangtsü inyakba Kibuba nenok Tsüngrem tenüng asangtsü, aser kü nübur kodanga mak masütsü.

²⁷ Aser ni Israel rongnung lir ta, aser ni Kibuba, nenok Tsüngrem ta nenoki metettsü; aser tangar shinga mali aser kü nüburtem kodanga mak masütsü.

Tsüngrem Tanela Meküploktsüba

²⁸ Tesülen ya ataloktsü, oda ni kü nela shi ajak dak meküploktsütsü; aser ner jabaso aser ner jalatemi ainkar o shintsü, ner tamburtemi pungmang pungmangtsü, ner asangurtemi mangdang angutsü.

²⁹ Aser ano item anogo nung ni kilirtem aser kilitsürtem madaka kü nela meküploktsütsü.

³⁰ Anüng aser alima nung tesüngmangtsütem sayutsü, azü, mi aser mokozü tongshi.

³¹ Kibuba anogo tulu aser tetsübutsü marudang, anüji mangadoktsü, aser itaji azü akümtsü.

³² Aser ya ataloktsü, oda shibaisa Kibuba tenüng nung jadir kümzüktsü; kechiyong Kibubai ashi ama, tejentetpurtem Zion tenem aser Yirusalem nung alitsü, aser Kibubai ajaba tanüngba rongnung adentsü.